Mbete 2 Kɔrenteri 10
10
Pihna ké Pɔl ƴo laɓu sa̧wu ɓa Ŋgerzah
1A bi Pɔl mi ƴo hew wuri ke law ɗeŋ pi ke suk-lah ɓay ké ur ké ta̧w Ŋgermbay pi. A bi kú-u ɓahri, ké nun woiri le mi ɓah ɓay ke kusol a voh-u. Mí-i ta haŋsekle woiri ya le, mi vbeh ɓay ke ŋgere ŋgere mí hi̧ wuri. 2Kɔkrɔya, mi ƴo goŋ wuri, ka̧hna bi ké ta̧w woiri mi sa ɓay í hi̧ mi ɓah ɓay ke ŋgere ziŋ wuri ya. Mi lek law bi ɓay ɓah ɓay ke ŋgere ziŋ nzukri ké ker ɓahri, siŋ sina wah ɓa nunu a haymun. 3Ketina, mun hay wah ɓa nunu a som siɓa gaŋ, mí nah ruh ŋgermu ke ŋgerna haymun ya. 4Fe rem-ruh ŋgermu wah ɓa fe a haymun ya. Le ŋgerna fe remu ɓa nunu a Ŋgerzah ɓay dir kuŋɓayri ké gaŋ ndururu. 5Kaŋ mí nah ƴo ɓeɓ kerɓay a ra̧h-uri, nah ƴo ɓeɓ hú̧h tulri gbam. Fe-uri leh tul ke fe tuna ké ƴo hi̧ nzuk tu Ŋgerzah. Nah ƴo mgba kɔk kerɓayri gbam mbih ɓa mgbal ɓay hi̧ kerɓayri-aw ɓá hȩk Ŋgermbay. 6Nah ƴo tul bɔk ɓay i ŋgerna sam mbá nzak Ŋgermbayri gbam ke sa̧wseh ké suk-lah ɓay woiri ten mun ke gelu gbam.
7Í ko ketina ké ƴo pol woiri. Gelke law nzuk tu ɓahri, ke ɓa nunu a Ŋgermbay le, ké el ko kerɓay ye ɓa teh-u ɓahri se, a ye ké-e ɓa nunu a Ŋgermbay ra, a wah kara nah ɓa nunu a Ŋgermbay pi. 8Mí gelke mi vba̧ haŋ bi ɓay ŋgerna ké Gaŋ tul feri riw kan tul bi kara su̧hru ta se mi ya. Riŋ ɗina-aw na ɓay hi̧ sa̧w nzuk yeri ɓá hu̧h, ta ɓa ɓay ik tul woiri ma siɓa ya. 9Ɓay mbete vbehna biri-aw ɓá tokro tem mun woiri ra le, ta ɓa kerɓay bi ya. 10Ɓay fe le nzuk a ɓoruri ƴo ɓahri, mbeteri ké a bi Pɔl mi vbeh-aw kpuh mbamba, ŋger mbamba pi, mí-i gi ka̧h sakra woiri ke mun bi le, mi na gɔɓ kaŋ. Ɓay ɓahna bi ké pol nzukri kara rih lahna ya pi. Ku ɓah kaŋ. 11Mí sam nzuk ké ɓah ɓay kandɔkaw, ké tu te-teh ɓahri, gelke nah ka̧h sakra woiri le, ŋgerna fe laɓna wah ɓay ŋger kandɔk ŋgerna mbete vbehna wah ké nah ta-a-aw ra kaŋ pi. 12Sam nzuk a haniri ké sɔk mun woyri ke mun ra, a wah nah ta mgba ma̧ra ziŋ niri ya, nah ta mgba ŋgerna wah tuh ke ŋgerna woyri ya. Fe laɓna woyri ɓa nunu a haymun. A woyri-aw ku leh tul woyri ke haniri, ku mgba ŋgerna woyri tuh ke haniri. Kerɓay woyri ta-a. 13A wah ra nah ta a̧h ka̧w ya. Le vbá̧ haŋ wah na tul pihna waka ké Ŋgerzah kuŋ hi̧ na, kaŋ mí i ɓa waka-u pi, 14ɓayu ké nah ka̧h ta̧w woiri ke ɓaysuki hul Ŋgermbay hi̧ i lah ke titilu da̧y. Nah zo tul mahful sekle waka wah ya. 15Ka̧hna wah ké ta̧w woiri ra, nah mbi pihna nzuk a ɓoru vba̧ haŋ wah keni ya. Nah ɓaŋ law wah te tul suki ɓahri, kanlaw woiri ƴo hu̧h ma pol pol dale, waka kú-u kuŋ hi̧ na ƴo ahna. 16Le náh si ka-kah ɓaysuki-u ma pol ké puh a ɓoruri, mí pihna waka nzuk a ɓoru ba, nah ta mbi ɓa fe-vba̧ haŋ wah ya. 17Mí nzuk vba̧ haŋ le, ké vba̧ haŋ ɓay tul Gaŋ tul feri riw ma#10.17 Ɓayay na ɓil Mbete Jeremie 9.24.. 18Nzuk ké sɔk mun ye ke mun ta ɓa nzuk ya wara le, nzuk a a̧y ké Gaŋ tul feri riw sɔk ni mí ɓa nzuk.
Currently Selected:
Mbete 2 Kɔrenteri 10: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
