Mbete 2 Kɔrenteri 7
7
1Kandɔk ké Ŋgerzah hi̧ na a wah gun sanari fe wahɓayri ra, náh lu fe-sih mun ke fe-sih tem ma fal hi̧ law wah ɓá pu ɓa nunu a Ŋgerzah ɗeɗ ke hȩ́k ni. 2Í ya̧ na ma law woiri. Nah laɓ suya ziŋ nzuk mbew ya, nah ɓeɓ nzuk mbew ya, nah gɔɓrɔ fe nzuk mbew ya pi. 3Mi ɓah kaŋaw ɓay laɓ ɓay kan tul woiri ya. Ɓayu ké mi ɓah pol sa̧ ɓahri se, kerɓay tul woiri na law wah. Nah ƴo mbu̧h wuri hani mbew ɓil hul pi, ɓil ɔkna pi.
4Law bi teh ké tul woiri mbamba. Mi vba̧ haŋ bi ɓa ŋgi̧-u ɓay tul woiri. Law bi voh lɔm. Law rihna mbah ɓil law bi mí el zɔk gbɔh gbɔh ɓil kosehri gbam ké ziŋ na. 5Ɓayu ké ka̧hna wah ké Maseduwan ra, nah ziŋ ful ɓay ɔk mun wah ndi̧ ya. Fe zɔklɔri ɗoŋ na gbuk, ké fál haymun ɓa ŋgermu, ké fál ɓil law ba, ɓa hȩkme#7.5 Ɓay Maseduwan na ɓil Mbete 2 Kɔrenteri 2.13 pi.. 6Mí Ŋgerzah a ye nzuk ké ƴo hew ko̧hkori ra, ke voh law wah ke gina Tiɗ. 7Mí ta ɓa ɓay gina ye kaŋto ya. Wara le kerɓay ké ziŋ ni ɓay tul woiri ra voh da. Mí ke el ndazi ɓay tasa̧y laɓ suki woiri, vúh mun woiri, rí̧h si̧w woiri ɓay tul bi bale, law rihna bi el ŋgi̧ kal ŋgɔŋ. 8Ɓay fe le mi tu-tu, mbete ké mi vbeh hi̧ wuri ra hi̧ law woiri sa̧h ke kerɓay, mí keni-aw kara law bi poŋ hewna mbete bi ra ya. Law bi zɔklɔ mi le, zɔklɔ mi ké mi hi̧ law woiri sa̧h wuri nam ndi̧-aw. 9Aŋay mi zay mun bi. Mi zay mun ɓay law woiri ké sa̧h ra ya. Wara le law sa̧hna woiri-aw ra hi̧ i mbi law woiri ké tul fe laɓna suya woiri ma fal. Sa̧wu mí-i zay mun ɓay mbilaw tul suya woiri-aw. Law sa̧hna woiri ra si kandɔk ké Ŋgerzah yih ɓay rɔkɔ hewna wah ɓá ti̧h ɓa vba̧na.
10Ɓayu ké law sa̧hna ké si kandɔk ké Ŋgerzah yih ra, hi̧ nzuk ti̧h ke ndɔk hul dan ker ɓay tulu. Mí law sa̧hna a tukala ba, hi̧ nzuk ziŋ hul. 11Í ko, law sa̧hna-u ké si kandɔk ké Ŋgerzah yih ra hi̧ law woiri ŋgerna-ƴo tul láɓ suki, ŋgerna-te-teh ɓayri, ŋgerna-ko suya ɓa fe ȩm, ŋgerna-ndar suya. Law sa̧hna-u hi̧ law woiri hȩkna, tása̧y, rí̧h si̧w. Mí ɓilu-aw gbam i sɔk mun woiri ɓahri, ɓay woiri te-teh. 12Mí mbete ké mi vbeh hi̧ wuri ra mi vbeh ɓay tul nzuk ké laɓ suya ra ya, mi vbeh ɓay tul nzukri ké nzuku laɓ niri suya ra ya pi. Le mi vbeh mbete ra ɓay hi̧ suki ké i tasa̧y laɓu ɓay tul wah ɓá ten mun ɓa teh-u. Mí aŋay i tu suki ra ke mun woiri ké pol Ŋgerzah.
13Sa̧wu mí kerɓay wah voh. Dara mí law wah rih keɗ keɗ ɓay law rihna ké ziŋ Tiɗ ɓay fe le, law ye voh lɔm ɓay tul woiri gbam. 14Ɓay fe le vbá̧ haŋ bi ké pol Tiɗ ɓay tul woiri ra su̧hru se mi ya. Le vbá̧ haŋ bi si ke ketina woiri ké nah ɓah hi̧ ni, mí ke tu ke mun ye ɓahri, ɓay wah ƴo gelu gaŋ. 15Mí gelke law ye el ker ɓay si tul suk-lah ɓay woiri gbam le, law sana ye ɓay tul woiri ŋgi̧ kal ŋgɔŋ. Ke ƴo ko ani mí hȩkna ke law tona ké pol Ŋgerzah hi̧ i mgba ni ɓa suki. 16Mi zay mun bi ɓay fe le, á̧h ka̧w bi ɓay tul woiri ɓil feri gbam si ke gelu gaŋ.
Currently Selected:
Mbete 2 Kɔrenteri 7: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
