Mbete 2 Kɔrenteri 3
3
1A a̧w wa, nah el ƴo sɔk mun wah hi̧ wuri ɓa nzuk a foyuri ɓáy le wo ? Mah ɓay náh gi ke mbete-sɔk mun wah kandɔk nzuk a ɓoruri ké gi ke mbete ƴo sɔk mun woyri hi̧ wuri le ? Mini náh vbi wuri mbete-sɔk mun kandɔk nzuk a ɓoruri ké vbi wuri mbete ra le wo ? 2A woiri gaŋ mí i ɓa mbete ké vbeh kan law wah. Nzukri gbam tu-tu, nzukri gbam ki̧-ki̧. 3Ɓay woiri te-teh, i ɓa mbete vbehna Ŋgermbay gaŋ, i ɓa pihna laɓna wah. Mbete-u vbeh ke bik ya. Le mbete-u vbeh ke Tem Ŋgerzah a ye Ŋgɔhnzuk. Fe vbehna-u vbeh kan tul kasaw a felu ya#3.3 Bolkusol ké Ŋgerzah ŋga̧h ziŋ gun Izarayelri ɓa záh woyri ra, Ŋgerzah vbeh kan tul kasaw a felu hi̧ Moyiz. Í ki̧ ɓay bolkusolu ɓil Mbete-ƴah tɔh riŋri (glossaire) ké fal mbete-ay.. Le fe vbehna-u vbeh kan law nzuk pirmatulri. 4Kandɔkaw mí law wah te tulu ké pol Ŋgerzah ɓay Ŋgermbay.
5Ɓay fe le ta ɓa a wah ke mun wah mí nah ɓa fe ya. Ɓa Ŋgerzah mí hi̧ na, nah ma-mah. 6A ye mí ke hi̧ na ɓa fe ké mah na ɓa gun-laɓ pihna sal in a foyu ké-e ŋga̧h ziŋ nzukri ɓa záh woyri. Ta ɓa sal in ké-e ŋga̧h ke fe vbehna bolkusol ké kan tul kasaw a felu ya. Le ke ŋga̧h ke Tem, ɓayu ké fe vbehna bolkusol ra laɓ ɓay hul kan tul nzukri, mí Tem ba, ƴo hi̧ ɔkna#3.6 Ɓayu si mbew ke Mbete Rɔmri 7.6—8.4..
7Lewsa̧ fe vbehna bolkusol ké kan tul kasaw a felu laɓ ɓay hul kan tul nzukri kara fe riŋ ɗina bolkusolu ƴo ri. Riŋ ɗina bolkusol Ŋgerzah ké Moyiz ziŋ ra mí gun Izarayelri mah ko kona ma nun Moyiz ya ɓay tul ndu̧yna fe riŋ ɗina bolkusolu. Fe riŋ ɗina bolkusol ra ɔ-ɔh#3.7 Ɓay tu ɓay nun Moyiz ké mah kona ya, í ki̧ Mbete Exode 34.29-35.. 8Riŋ ɗina a ɓoru ké ɓa riŋ ɗina pihna Tem mí ƴo hi̧ ɔkna ra wa, ani mí pihna Tem ɓay mba tul fe riŋ ɗina mbete vbehna bolkusol ya le ?
9Gelke pihna fe vbehna bolkusol ké hi̧ salɓay hul mgba tul nzukri ra ƴo ke fe riŋ ɗina ba, ani wara mí riŋ ɗina pihna Tem ké ŋga̧h sal in Ŋgerzah ziŋ nzukri ɓa záh woyri ɓay mba tul fe riŋ ɗina-u, ya le wo ? 10Kandɔkaw mí fe riŋ ɗina fe vbehna ké ndu̧-ndu̧y ra zi ké pol riŋ ɗina Tem ké kal tul fe riŋ ɗina-u ka-kal. 11Fe vbehna bolkusol ɔh laɓ pihna ɓil riŋ ɗina ra ba, ani wara mí Tem ké ƴo ri, riŋ ɗina ye ɓay kaɓ ɓa ŋgɔh, ya le wo ?
12Kaŋ dale sam suki ké law wah te sa tulu mí nah ƴo ɓah ɓayu ɓa teh-u dan su̧hru. 13Mí nah ƴo laɓ kandɔk Moyiz ya. Ke pɔr nun ye ke gar ké pol gun Izarayelri hi̧ ku ko mahsa̧w fe riŋ ɗina bolkusolu ya. 14Ka̧h guri kara law woyri na nduŋ. Ku ki̧ mbete bolkusol ké Ŋgerzah ŋga̧h sal in a pol kara garu pɔr law woyri kɔɓ ɓáy. Nzuk ƴo mbew ke Ŋgermbay dara mí garu lu ɓáy. 15Ka̧h guri gaŋ kara, gelku-u ki̧ mbete vbehna Moyiz le, gar ra ƴo pɔr law woyri. 16Ku sɔɓ nun woyri ma ta̧w Gaŋ tul feri riw le, gar-pɔr law ra lu. 17Gaŋ tul feri riw ɓa Tempuki. Mí gel a a̧y ké Tem Gaŋ tul feri riw ƴo ri le, sél law ƴo ri pi. 18A wah gbam ké gar-pɔr law lu da, nah ƴo ko riŋ ɗina Gaŋ tul feri riw ké nun haniri kandɔk ké nah ko nun wah ɓil fe-ko tem. Nah ƴo sɔɓ eŋ ni ke riŋ ɗina ké-e ƴo hi̧ na kpu̧ru si ka̧h riŋ ɗina Gaŋ tul feri riw, a ye Tempuki.
Currently Selected:
Mbete 2 Kɔrenteri 3: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
