Mbete 2 Kɔrenteri 2
2
1Mi lek kerɓay bi ra kandɔkay : Mi sa el si ta̧w woiri ya rɔkɔ law sena ɓá ziŋ na. 2Gelke mi hi̧ law woiri se ba, a geri ɓáy mí ɓay hí̧ law bi na ɗeŋ le ? Nzukri ké mi hi̧ law woyri se-aw wa, ku hí̧ law bi na ɗeŋ ɓáy le ? 3Sa̧wu mí-i vbeh mbete a pol ra ɓay hi̧ ka̧hna bi le, mí ziŋ law sena ké ta̧w nzukri ké ɓay hi̧ law bi na ɗeŋ ra ya. Law bi te tul woiri ɓahri se, law rihna bi ɓa law rihna woiri gbam pi. 4Mi vbeh mbete-aw hi̧ wuri ke kerɓay ké ruklu law bi. Law bi se mi ɗɔk ɗɔk, mbihnun mbaŋ mi deh deh. Mi vbeh mbete ra ɓay í ziŋ law sena ya. Le mi vbeh ɓay í tu law sana ké mbah ɓil law bi zɔk gbɔh gbɔh ɓay tul woiri.
5Kandɔk ké sa̧w law sena woiri ɓa nzuk mbew ra, ta ɓa a bi mí nzuku hi̧ mi law sena ya. Le ɓa a woiri mí i ziŋ law sena-aw ndi̧ ndi̧ gbam. Kaŋ mí-i sɔkrɔ ɓayu ke ŋgerna kan tul woiri gbam ya. 6Ndarna ké nzuk a kandɔkaw ziŋ ké ta̧w daɓari ra mah seeh. 7Mí í el laɓ lawsuki ziŋ ni, í hew ni wara rɔkɔ kerɓay ɓá kal law ye kereŋ. 8Kaŋ mí-i ƴo hew wuri, í gɔh gay buma ziŋ ni sɔk keni law sana woiri. 9Sa̧wu mí-i vbeh ɓay ndarna-aw ɓil mbete a pol hi̧ wuri ɓay leh wuri ko, ko ya le ɓil feri gbam suk-lah ɓay woiri ƴo ri. 10Nzuk ké i el laɓ lawsuki ziŋ ni le, a bi kara law bi voh ké tul ye pi, ɓayu ké lawsuki ra mi la-laɓ. Ɓay tul woiri ké pol Ŋgermbay mí-i laɓu, 11rɔkɔ mbay záh tukala ɓá gɔɓrɔ na wuri. Nah tu wuri kerlaw mbay záh tukala tu-tu.
12Ka̧hna bi ké Torowa, Gaŋ tul feri riw mgbur mahful ka-kah ɓaysuki hul Ŋgermbay hi̧ mi mgbu-mgbur. 13Keni-aw kara law bi na lɔm ya ɓayu ké mi ziŋ yi̧n bi ɓil Ŋgermbay a ye Tiɗ ya, mi vbar nzuk Torowari ba, mi tɔr si Maseduwan.
14Mi el ke tumbɔl hi̧ Ŋgerzah ɓay lawsuki ye. Kpatara, ke hi̧ na, nah el ke gel ŋgermu ziŋ Ŋgermbay ké nda pol wah ruk ruk. Mí a wah nah ɓa ba̧ri Ŋgermbay ké fu̧ gelri gbam hi̧ nzukri tu ni. 15Ɓay fe le ba̧ri-u fu̧ Ŋgerzah buy buy. Ba̧ri-u fu̧ ké haŋsekle nzukri ké ƴo ke ɔkna pi, ké haŋsekle nzukri ké ƴo zi-zi pi. 16Ba̧ri-u fu̧ nzuk a zina-uri ɓa ba̧ri hul ké ƴo si ziŋ nzuk a huluri-aw ma hul. Ba̧ri-u fu̧ nzuk a ƴo ke ɔknari ɓa ba̧ri ɔkna ké ƴo si ziŋ nzuk a ɔknari ka̧h ɔkna. Ɓay na ɓa ba̧ri-u, a ge gaŋ mí mah le ? 17Nah eŋ sam nzuk a ɓoruri ké ƴo ɗam ɓay Ŋgerzah ƴah ɓil woyri keni ya. Le nah ɓah ɓay Ŋgerzah ɓa nzukri ké law woyri te-teh, ɓa nzukri ké Ŋgerzah pih niri. Ké nun Ŋgerzah mí nah ƴo ɓah ɓay mbew ziŋ Ŋgermbay.
Currently Selected:
Mbete 2 Kɔrenteri 2: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
