Mbete 2 Kɔrenteri 1
1
1A bi Pɔl gun nzak pihna Mbay Zezu kandɔk ké Ŋgerzah yih, a bi ke yi̧n wahri Timote nah vbeh mbete-ay hi̧ wuri sa̧w in Ŋgermbay ké Kɔrente, nah vbeh hi̧ sa̧w nzuk Ŋgerzah a ɓoruri gbam ké tusiɓa Akay pi. 2Nah vah wuri ke lawsuki ke ɗeŋ ké ur ké ta̧w bah wah Ŋgerzah, ké ur ké ta̧w Gaŋ tul feri riw a ye Ŋgermbay Zezu.
3Nah el ke tumbɔl hi̧ Ŋgerzah nzuk sa̧w mgbɔkɔ, a ye bah Ŋgermbay Zezu Gaŋ wah, bah law in, a ye Ŋgerzah ké hi̧ sam nzak hewnari gbam. 4Ke hew na ké ɓil koseh wah gbam hi̧ ɓo náh mah hew nzuk a ɓoruri ɓil koseh woyri ɓoɗ ɓoɗ ke nzak hewna ké-e hew na keni. 5Ɓay fe le koseh hul Ŋgermbay ŋgi̧ hɔtɔk hɔtɔk ké ta̧w wah ké nah dih fal ye, kaŋ pi mí nzak hewna ŋgi̧ hɔtɔk hɔtɔk hi̧ na ɓay Ŋgermbay pi.
6Ɓa ra koseh mí ziŋ na le, ziŋ na ɓay tul woiri hi̧ í ziŋ nzak hewna pi, í ti̧h ɓil salɓay hul pi. Ɓa ra nzak hewna mí nah ziŋ le, nah ziŋ ɓay tul woiri hi̧ í ziŋ nzak hewna ké hi̧ ŋgerna-su̧h law ɓil koseh ra kandɔk a wah ké nah ziŋ ɓil koseh-ay kaŋ. 7Ɓay tul woiri law wah te tul suki wahri ɓa kpuh-u ɓay fe le, nah tu-tu, kandɔk ké i mbu̧h ziŋ na ɓil koseh ra, kaŋ pi mí i mbu̧h ziŋ na ɓil nzak hewna pi. 8Sa̧wu mí yi̧n biri, nah sa poŋ wuri ɓa ra̧w ya. Ɓay kosehri ké ziŋ na ké tusiɓa Azi le, kal law wah kereŋ hi̧ kerɓay káɓ tukala kara lu ké law wah ƴoɗ. 9Mí nah yih ɓay í tu ɓahri, salɓay hul kuŋ ku̧ tul wah gaŋ. Fe-u laɓ kaŋ ɓay hi̧ náh ɓaŋ law kan tul mun wah ya. Le náh kan law wah tul Ŋgerzah ma, a ye ké-e hi̧ záhri ti̧h ke pa̧ymun a foyu. 10A ye mí ke ya̧ na ke nzak salɓay hulaw ra, mí ke ɓay ya̧ na gaŋ. Law wah te tul ye ké-e ɓay ya̧ na ra ɓáy. 11A woiri kara i ƴo mbu̧h ɓil ɓayaw ke vuhna woiri hi̧ Ŋgerzah ɓay tul wah ƴo hi̧ nzak daɓari el ke tumbɔl hi̧ Ŋgerzah, ɓay lawsuki ké-e laɓ ziŋ na.
12Vbá̧ haŋ wah munu. Law wah lu lakna ɓay wah ɓahri, sa̧w siŋ sina wah ur ké ta̧w Ŋgerzah, ko ɓay wah se ya, ɓay wah te-teh. Ta ɓa siŋ sina tukala ke ru̧na tukala ya. Le ɓa lawsuki Ŋgerzah mí nah si keni siŋ sina. Wara le lawsuki-aw nah si keni siŋ sina ziŋ wuri. 13Nah vbeh ɓay a ɓoru ɓoɗ ɓil mbete-ay hi̧ wuri ya. Le ɓa ɓay ké i ki̧, ké i tu. Mi ker ɓahri, i ɓay tu ɓa teh-u ka̧h ɔh tɔr ɓayu. 14Kandɔk ké i tu na ndi̧ ɓahri, nah ɓa fe-vba̧ haŋ woiri, i ɓa fe-vba̧ haŋ wah kaŋ pi ke nam Gaŋ tul feri riw a ye Zezu.
15Law bi ké te tul woiri hi̧ mi ker ɓay si ta̧w woiri pol sa̧ ɓay í ziŋ pol tehna bɔk seɗe. Mí-i ziŋ ful ya dih. 16Mi ɓahri se, mi kál ké ta̧w woiri si Maseduwan, elna bi ké Maseduwan mi gí ta̧w woiri, mí i píh mi ma Zude. 17Kaŋ dale kerɓay gahru bi ké mi lekaw ra wa, mi lek va̧h le ? Mi lek ke kerɓay tukala hi̧ ɓo mí ɓah nzak seɗe ɓahri, « kaŋ » ke « kaŋ ya » mbɔk le ?
18Ŋgerzah ƴo tul ɓay ye. Ɓay ké nah sɔk wuri ra ta ɓa « kaŋ ya » ke « kaŋ » mbɔk ya. 19Ɓay ké a bi, Silas, Timote nah ka-kah-u ké sakra woiri, ɓayu ra ɓa a ye gun Ŋgerzah Ŋgermbay Zezu. Ke ta ɓa « kaŋ ya » ke « kaŋ » mbɔk ya. Le ke ɓa « kaŋ » gaŋ. 20Ké ta̧w ye mí wahɓay Ŋgerzah gbam ɓahri, « kaŋ » gaŋ. A ye mí ke ɓa « gelu munu » hi̧ riŋ ɗina Ŋgerzah mgbe ke nzak wah. 21A ye Ŋgerzah mí ke ŋga̧h ɓay mbú̧h hani wah mbew ke Ŋgermbay ɓa kpuh-u, ke lu na ɓa nunu a Ŋgermbay. 22Ke vbeh zezele fe ye ɓil law wah ɓa nunu a ye, mí ke hi̧ Tempuki ku̧ ɓil law wah ɓa fe-ŋga̧h wahɓay ye.
23A bi ra, mi mbi Ŋgerzah ɓa nzuk te-teh ɓay bi ɓahri, mi sa el ke mahful a Kɔrente ya rɔkɔ mí hi̧ wuri law sena. 24Ɓay fe le a wah ke Timoteri nah lak mbay tul kanlaw woiri ya. Le nah ƴo mbu̧h ziŋ wuri ɓa bɔh pihnari ke law rihna woiri, ɓayu ké i ƴo ɓer gi̧w ɓil kanlaw woiri.
Currently Selected:
Mbete 2 Kɔrenteri 1: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
