Mbete 2 Kɔrenteri 11
11
1Kɔkɔ bi-ay i ɓay ik law tulu, kaŋ gaŋ mí í ik law tul kɔk ɓay ɓahna ké mi si keni ma pol polay. 2Ɓayu ké mi ƴo laɓ sere ɓay tul woiri ɓa sam sere ké ur ké ta̧w Ŋgerzah, mi mgba mbana woiri hi̧ Ŋgermbay mbew yaŋ, mi mgba wuri hi̧ ni ɓa mbana ké kɔr mun ye ke lawpuki. 3Law bi lu ɗuŋ ɗuŋ ɓahri, soy ké rɔk Eve ke ru̧na ye ra ko ya le, kerɓay woiri ra̧h pi. Kerɓay a a̧y ké zukru ya mí ɓa kerɓay ké si mbew ke Ŋgermbay. 4Mi ƴo laɓ sere ɓayu ké i ƴo poŋ ful hi̧ nzuk a ɓoruri gi ka-kah ɓay Zezu ɓoɗ ke ɓay Zezu ké nah ka-kah-u. I poŋ ful hi̧ nzuk a ɓoruri gi hi̧ wuri tem ké na ɓoɗ ke Tempuki ké i ya̧. I poŋ ful hi̧ nzuk a ɓoruri gi sɔk wuri ɓaysuki ɓoɗ ke ɓaysuki hul Ŋgermbay ké i mgba ma law woiri. Gbamaw, i toŋ ik law tulu mgbum.
5Nzukuri ra ku ɗi mun woyri ɓa gun nzak pihna a ŋgeruri, mí mi ko ɓahri, mi ta ɓa gun toŋnafal woyri ya. 6Ɓay ɓahna bi rih lahna ya kara fál a fe tuna le, mi tu sa̧wu tu-tu. Ɓil feri riw ké nah hi̧ wuri i tu ke gelu riw ra, fe-uri sɔk ɓahri, mi tu sa̧wu te-teh. 7A bi ké mi ɗiŋ tul ɓay ɔr tul woiri mí-i sɔk ɓaysuki Ŋgerzah hi̧ wuri ndikpo ra wa, mi laɓ suya munu ley ? 8Sa̧w in Ŋgermbay ké mbu̧h ké gel a ɓoruri hi̧ mi sona ɓay laɓ pihna. Sona ké mi ya̧ ra poŋ niri ndɔk zolom mí-i ziŋ ŋgerna-laɓ pihna keni hi̧ wuri. 9Seh ké mi ƴo sakra woiri ra, fe poh mi kara mi ti̧h ɓa sukna tul nzuk mbew ya ɓayu ké yi̧nri ɓil Ŋgermbay ké Maseduwan gi mbar lɔkɔ feri gbam ké poh mi. Mi mgba sa̧w mun bi ɓay rɔkɔ í mbi sukna bi, mí-i mgbá sa̧w mun bi gaŋ. 10Vbá̧ haŋ bi-aw nzuk ta gboh-u ké tusiɓa Akay ya. Ketina nunu a Ŋgermbay ƴo ziŋ mi.
11Ɓay fe mí-i sa su̧ ɓil bi ké ndɔk woiri ya le ? Ɓayu ké mi sa wuri ya le ? Ŋgerzah tu-tu, mi sa wuri sa gaŋ. 12Mí fe ké mi laɓaw ra, mi láɓ ɓáy, ɓay nzeh sa̧w kerɓay nzukri ké yih ten tul woyri hi̧ wuri í ko niri mah ziŋ na ɓil vbá̧ haŋ woyri. 13Nzukri-aw ɓa gun nzak pihna fohri, ku ɓa nzuk nzak rɔknari. Ku laɓ mun eŋ gun nzak pihna Ŋgermbay. 14Sam nzuk foh a kandɔkawri-aw, ku ɓa fe saŋ lo ? Záh tukala kara laɓ mun ye ɓa tem nzak pihna gel tehna ké ndu̧-ndu̧y pi. 15Ani mí ɓay gun-laɓ pihna yeri-aw ɓáy le ? Ku ɓay laɓ mun woyri ɓa gun-laɓ pihna sal in Ŋgerzah, mí ɔ́h tɔr woyri le, kpaŋndɔk woyri ɓay mah ke fe laɓna woyri gaŋ ba.
16Mi ɓah ra ɓáy ɓahri se, nzuk ɓá ko mi ɓa kɔkɔ ya. I yih ko mi ɓa kɔkɔ le, í ya̧ mi kandɔk kɔk nzukri-aw ge, ɓay hi̧ mí vba̧ haŋ bi ndi̧ keni. 17Ɓay ké mi ɓah-ay, ta ɓa ɓay ɓahna Gaŋ tul feri riw, mí-i mbi ɓah keni ɓay ya. Wara le mi mbi ɓay ɓahna kɔk nzuk ké vba̧ haŋ ye, mí-i ɓah keni ɓay. 18Kandɔk ké daɓa nzukri ƴo vba̧ haŋ woyri ke sam vbá̧ haŋ ké si ke ful a haymun, a bi kara mi vbá̧ haŋ bi kaŋ pi wara.
19Ɓayu ké a woiri ké i ru̧-ru̧ ra, i ƴo poŋ ful hi̧ kɔk nzukri ke law rihna. I toŋ ik law tul woyri mgbum, 20a woyri ku ɓa nzuk-laɓ wuri ɓa mgbal, nzuk-duklu ndɔk woiri, nzuk-mgba wuri ɓa kɔkɔ, nzuk-laɓ mun woyri ɓa ŋgernzuk, nzuk-vba̧ nun woiri, gbamaw mí i toŋ ik law tul nzukuri mgbum. 21Ɓay ké mi ƴo ɓah-u si ke su̧hru wah ɓahri se, a wah nah ta̧-ta̧h, mí gel ké nah ta̧-ta̧h ra nzuk a ɓoruri a̧h ka̧w ké ri. Mi mbi kɔk ɓayay. A bi kara mi á̧h ka̧w wara.
22Sa̧w woyri ɓa Ebere le ? A bi kara pi.
Ku ɓa gun Izarayelri le ? A bi kara pi.
Ku ɓa mi̧hri Abaraham le ? A bi kara pi.
23Ku ɓa gun-laɓ pihna Ŋgermbay le ? Mi ɓa kɔkɔ, mi ɓahri, a bi mi kal niri ka-kal ké ɓil pihna-u.
Ta̧hma kal ŋgɔŋ,
ná vul mgbal ka̧yri ka̧yri,
vba̧na gbu̧h-u ta-a,
sam koseh ké mah hul ɓoɗ ɓoɗ ziŋ mi ɓa ŋgi̧-u.
24Bɔk ndiɓi ké yi̧n bi ziɓri vboŋ mi ndɔk bon say falu toŋndɔk mbew#11.24 Ɓay tu ɓay sam vboŋna-aw ké ta̧w ziɓri le, í ki̧ Mbete Deutéronome 25.1-3..
25Ku ɗur mi ɓa bɔk say,
ku vbuk mi ke kasaw ɓay i mi bɔk mbew,
bɔk say kumbonri riŋ mbih ziŋ mi ɓil mahmbih, ké ɓil mahmbih mi uh mbih suŋ mbew, seh mbew. 26Ké ɓil gahru biri ɓoɗ ɓoɗ,
ɓeɓna ƴo ɗih ya ziŋ mi ɓay nduh mbihri ké gi piliɓ piliɓ, ɓay kuper-ri, ɓay sa̧w bi ziɓri kú-u yih i mi, ɓay sa̧wnzuk a ɓoruri pi,
ɓeɓna ƴo ɗih ya ziŋ mi ké ɓil puh a lukiri, ké ɓil suy, ké tul mahmbihri, ké ɓil ndɔk yi̧n bi a fohri.
27Ta̧hma ke káh rohna laɓ mi. Suŋri ŋgi̧-ŋgi̧ nam mgba nun bi ya. Ɗaka ke kɔkmbih i mi. Fe su̧na poh mi nam ŋgi̧-ŋgi̧. Mi ko seh ɓil tel pi, ɓil káɓ mun ndikpo pi. Kandɔkaw mí-i ɓa gun-laɓ pihna Ŋgermbay.
28Kosehri-aw laɓ mun bi. Law bi ba, ƴo ker ɓay tul sa̧w in Ŋgermbay ké gelri gbam. Kerɓayu kal law bi kereŋ kereŋ ke namri gbam. 29Gelke nzuk ta̧-ta̧h le, a bi kara mi ta̧h tul ye pi ya le ? Gelke ndaw mgba nzuk hi̧ ke poŋ ketina le, law bi se mi ɗɔk ɗɔk pi ya le ? 30Mi vbá̧ haŋ bi le, mi vbá̧ haŋ bi ɓay ŋgerna bi ké ta-a. 31Tumbɔl ɓa nunu a Ŋgerzah sew ke sew a ye bah Zezu Gaŋ tul feri riw ɓay mgbɔkɔ ye. Ke tu-tu, mi kuŋ ɓay ya.
32Sew ké Aretasi lak mbay, guvener ye hi̧ nzukri kɔr ka̧w puh Damas gbam ɓay mgba mi. 33Mí nzuk-kan lawri mbi mi, ku mu̧h mi ɓil tɔlɔ. Ku ŋga̧h sal ké nzaku. Ke fenetere a hani ké na mahol ké ɗoŋ Damas, ku ɗer mi keni kan kala hi̧ mi ɗuk#11.33 Ɓay ɗukna Pɔl na ɓil Mbete Fe laɓna Tempuki 9.24,25..
Currently Selected:
Mbete 2 Kɔrenteri 11: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
