Mbete 1 Kɔrenteri 16
16
1Ɓay mbu̧h fe-so sa̧w nzuk Ŋgerzahri ké Zurusalem ké mi sɔk mahfulu hi̧ sa̧w in Ŋgermbay ké gelri ɓoɗ ɓoɗ ké tusiɓa Galaɗ ra, a woiri kara í laɓ kaŋ pi. 2Nam a titilu ké ɓil dimasiri gbam a ge ge ké sakra woiri ɓá mbek fe hi̧na mah gel ŋgerna ye dara a bi mí ka̧h ɓáy, rɔkɔ ka̧hna bi le, í ƴo tul mbu̧h fe. 3Gelke mi ka̧h ta̧w woiri le, mi píh gun nzak pihnari ké i lu niri ɓay kú suk fe hi̧na lawsuki woiri. Mi píh niri ke mbete tulu ɓay kú si keni ma Zurusalem. 4Su ɓay mí si Zurusalem pi le, kú mbu̧h ful ziŋ mi.
5Mi ɓay ka̧h ta̧w woiri ke mahful a Maseduwan kandɔk ké mi ɓay kal tusiɓa-aw. 6Mi káɓ ziŋ wuri nam mah fe, ko ya le, few say ɓay hi̧ í ziŋ ful píh mi ma pol ɓa suki. 7Mi sa kuŋ nzak mberem wahri ke kalna bi ya. Mi ker ɓay kaɓ ziŋ wuri nam mah fe, gelke Gaŋ tul feri riw hi̧ mi ful. 8Aŋay mi káɓ Efeze kpu̧ru ka̧h ti̧hmbih pandekoɗ 9ɓayu ké mahful mgbur ɓa ah-u hi̧ mi ɓay mí laɓ pihna ké ti̧h suk, mí nzukbaari ŋgi̧ mbamba pi.
10Timote ka̧h ta̧w woiri le, í laɓ ger hi̧ hȩkme ɓá se ni ke nun woiri ya, ɓayu ké-e ɓa gun-laɓ pihna hi̧ Gaŋ tul feri riw kandɔk a bi pi. 11Le nzuk ɓá ko ni ɓa gun ya, mí tɔrna ye í pih ni ɗeŋ gi ta̧w bi ɓa suki. Nah ƴo geŋ ni ke nzuk yi̧n ɓil Ŋgermbayri.
12Ɓay yi̧n wahri Apolo ba, mi hew ni ɓa ŋgi̧-u ɓay ké si ta̧w woiri ke nzuk yi̧n ɓil Ŋgermbayri. Ke sa si aŋay ya ɓáy, mí ke si-u gelke-e ziŋ ful.
13Í ru̧ ke mun woiri, í ƴo ɓa kpuh-u ŋgi̧w ŋgi̧w ké ɓil kanlaw tul Ŋgermbay, í mgba mun woiri ɓa wo̧ronzuk, í ɓer gi̧w. 14Sa̧w fe laɓna woiri gbam ɓá na ɓa law sana. 15Yi̧n biri i tu wuri Etefana ke nzuk kerpuh yeri tu-tu. Ku ɓa nzuk-kan law tul Ŋgermbay a titiluri ké tusiɓa Akay. Ku mbi mun woyri ɓay laɓ pihna hi̧ sa̧w nzuk Ŋgerzahri. 16Mi hew wuri, í hȩk sam nzuk a kandɔkawri-aw ke bɔh pihna woyri gbam kú-u ƴo kah rohna ziŋ niri ɓil pihna. 17Law bi rih mi ɓay gina Etefana ke Fertuna ke Akaykus. Sonari ké i ziŋ ful laɓ ke mun woiri hi̧ mi ɔh ya ra, ku gi laɓ ɔh. 18Ku voh kerɓay bi, ku voh kerɓay woiri pi. Kaŋ le í ko sam nzuk a kandɔkawri mah nun woiri. 19Sa̧w in Ŋgermbay ké ƴo mbu̧h ké tusiɓa Azi vah wuri. Akila ke wu̧y ye Pirisil ke sa̧w in Ŋgermbay ké ƴo mbu̧h hani ké kerpuh woyri ra ku pih vahna hi̧ wuri ké i ƴo mbew ziŋ Gaŋ tul feri riw pi. 20Nzuk yi̧n ɓil Ŋgermbayri gbam vah wuri. Í vah haniri ke law in a teh-u. 21A bi Pɔl gaŋ mí-i vbeh vahna-ay ke ndɔk bi.
22Gelke nzuk sa ɓay Gaŋ tul feri riw ya le, haɓna ɓá ta ni. Mi vah wuri ke nzak arame ɓahri, maran ata, sɔk ɓahri, nah ɗi Gaŋ tul feri riw gi. 23Lawsuki Zezu Gaŋ tul feri riw ƴo ziŋ wuri. 24Law sana bi ƴo ziŋ wuri gbam. Nah ƴo wuri mbew ziŋ Mbay Zezu.
Currently Selected:
Mbete 1 Kɔrenteri 16: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
