Mbete 1 Kɔrenteri 15
15
1Yi̧n biri mi ƴo el ke fal ɓaysuki hul Ŋgermbay ké mi ka-kah-u hi̧ wuri, ké i ya̧, mí i ɓer gi̧w tulu ra. 2Ɓaysuki-aw mí ya̧ wuri kandɔk ké i ƴo tul mgbá ɓayu. I ƴo tulu ya le, kanlaw woiri na kpo̧k. 3Ɓaysuki ké mi ya̧ mí-i el hi̧ wuri ɓa ɓay a titilu ra ɓahri se, mbete Ŋgerzah sɔk ɓay hul Ŋgermbay lewsa̧, mí Ŋgermbay gi hu ɓay tul suya wah, 4ku gɔr ni, mí ke ti̧h ke puh záh ke pa̧ymun a foyu ke nam a sayu. Fe-u laɓ kandɔk ké mbete Ŋgerzah sɔk lewsa̧ ra.
5Mí ke ti̧h nun Piyer. Bol falu Ŋgermbay el ti̧h nun nzuk-dih fal ye a boh falu seɗeri#15.5 Karaŋ a haniri ɓay vbi ɓay ɓahri, a a̧w ké Zudas i tul ye da ba, ani mí ku ɓa boh falu seɗe ɓáy le ? Ɓay fe le ku mbi nzuk a ɓoru soh bol ye. Í ki̧ Mbete Fe laɓna Tempuki 1.15-26.. 6Bol falu ke ti̧h nun nzuk yi̧n ɓil Ŋgermbay a ɓoruri ké gel mbew. Ki̧na woyri kal sɔɗ sɔɗ ndiɓi. Ké mi ƴo vbeh mbete-ay, ŋgi̧na nzuk a hani-uri-aw kaɓ ke nun ɓáy, mí nzuk a ɓoruri ba, ta tukala mba. 7Bol falu ke ti̧h nun Zak dara mí ke ti̧h nun tɔr gun nzak pihnari gbam pi. 8Ɔh tɔru bale ke ti̧h nun bi, mi na kandɔk gun ké mah ye kew few mbuŋna ye, 9ɓayu ké haŋsekle gun nzak pihnari gbam mi ɓa gun. Mi mah kú-u ɗi mi ɓa gun nzak pihna ya dih ɓay fe le, lewsa̧ mi laɓ sa̧w nzuk Ŋgerzahri koseh. 10Mí tumbɔl lawsuki Ŋgerzah mí-i ti̧h ɓa nzuk ké i ko ni-ay. Lawsuki ké-e laɓ ziŋ mi ra kal ndikpo ya. Ketina le mi ta̧h ɓil pihna ka-kah ɓaysuki kal ta̧hma gun nzak pihna a ɓoruri gbam ka-kal. Ta ɓa a bi ke huhrumun bi ya. Wara le lawsuki Ŋgerzah ƴo ziŋ mi. 11Kaŋ mí ɓa a bi mini ɓa gun nzak pihna a ɓoruri kara ɓaysuki ké nah ka-kah-u ké mi ƴo el ke fal ɓayu mí na-aw. Ɓaysuki ké i ya̧ ba, mí na-aw pi.
12Nah ka-kah ɓahri se, Ŋgermbay ti̧h ke puh záh ke pa̧ymun a foyu. Ani wara mí nzuk a haniri ké sakra woiri ƴo ɓahri, hulri ta ziŋ pa̧ymun a foyu ya le wo ? 13Gelke ti̧hna nzukri ke puh záh ke pa̧ymun a foyu ta-a le, Ŋgermbay kara ti̧h ke puh záh ke pa̧ymun a foyu ya pi. 14Uwa, Ŋgermbay ti̧h ke puh záh ke pa̧ymun a foyu ya le, ka-kah ɓay wah-aw ɓa kuna. Kanlaw woiri tul Ŋgermbay kara na kpo̧k pi. 15Zíŋ pa̧ymun a foyu ta-a kandɔk kú-u ɓah ké sakra woiri le, a wah nah kuŋ ɓay kan nzak Ŋgerzah ɓay fe le, nah te-teh ɓay ye ɓahri, Ŋgerzah mí ten Ŋgermbay ke puh záh ke pa̧ymun a foyu. Mí a woyri ba, ku ɓahri, zíŋ pa̧ymun a foyu ta-a. Dale a ye Zezu ra ba, Ŋgerzah ten ni ya bale, hulri kara ta ziŋ pa̧ymun a foyu ya pi. 16Hulri ta ziŋ pa̧ymun a foyu ya kandɔk ké nzuk a haniri ɓah gaŋ le, sɔk ɓahri, Ŋgermbay kara ti̧h ke puh záh ke pa̧ymun a foyu ya pi.
17Gelke Ŋgermbay ti̧h ke puh záh ke pa̧ymun a foyu ya le, kanlaw woiri na gɔɓ, salɓay hul mgba tul woiri kɔɓ ɓáy. 18Dale nzukri ké ta tukala mba, ké riŋ Ŋgermbay mgba tul woyri ra, ku zi wu̧m pi. 19Nah ɓaŋ law wah te tul Ŋgermbay ɓay kaɓ keni tukala-ay kaŋto le, nah baseh mbamba ké sakra nzukri gbam. 20Wara le í ko wuri ketina. Ŋgermbay ti̧h pol ɗekrek ké sakra hulri. Ké haŋsekle nzukri ké na tul dakan ke eŋ tul fe pay ké ŋger pol.
21Kandɔk ké hul gi ke tul nzuk pirmatul mbew a ye Adam, ti̧hna nzukri ke pa̧ymun a foyu kara gi ke tul nzuk pirmatul mbew a ye Zezu. 22Ɓayu ké sa̧w nzukri gbam ti ke tul Adam le, ku hú-hu. Mí nzukri ké sa̧w woyri ɓa Ŋgermbay ba, gbam ɓay ɔ-ɔkna ke pa̧ymun a foyu. 23Mí a ge ge le ke toŋna-u toŋna-u. Tul fe pay ɓa a ye Ŋgermbay. Ti̧hna ye ké nun nzuk yeri dara mí ku zíŋ pa̧ymun a foyu ɓáy. 24Dale ɓa sew a ɔh tɔru munu. Ŋgermbay ƴo ɔh ziŋ záh tukalari geɓ geɓ, ɓa ra záh-lak mbayri, ɓa ra záh riŋ ɗinari, ɓa ra záh huhrumunri, gbam woyri mí ke ƴo ɔh ziŋ niri. Mí ke él ndar lák mbay hi̧ baah Ŋgerzah. 25Ɓayu ké Ŋgermbay ɓá lak mbay dɔh dɔh si ka̧h sew ké-e ɔh ke nzukbaa yeri gbam ɓa gel-ku̧ bɔk ye#15.25 Ɓayay na Mbete Siŋ 110.1-2.. 26Nzukbaa a saru mgbaɗ ké-e ɓay ɔh ziŋ ni ɓa hul, 27ɓayu ké mbete ɓahri, feri gbam na huh bɔk ye, sɔk ɓahri, feri gbam ɓa gel-ku̧ bɔk ye da, mí Ŋgerzah ké poŋ feri-aw ku̧ ndɔk ye mí mba tul ye. 28Kandɔk ké feri gbam ɓa gel-ku̧ bɔk ye ra, gun ke mun ye gaŋ ɓay el poŋ tul ye hi̧ ni a ye ké-e hi̧ feri gbam na huh bɔk ye ra dale, Ŋgerzah ɓa nzuk-ɔh tɔr feri gbam ke gelri gbam.
29Gelke hulri ta ziŋ pa̧ymun a foyu ya kandɔk ké nzuk a hani-uri ƴo ɓah-u ra wa, ɓay fe mí nzukri ƴo soh mbih ɓay tul hulri ɓáy le ? Ɓay tul fe mí ku ƴo ti̧h mbih batemaw le#15.29 Láh gel kina-ay se-se. Nzuk goso fe tunari ƴo ke kerɓay ɓoɗ ɓoɗ ɓa ŋgi̧-u ké tulu. Mí kerɓay gel ki̧na-ay ɓa mbew. Ku ɓahri, Pɔl vbeh ɓayay ɓay fe le, nzuk Kɔrente a haniri ƴo ɓahri, tí̧h ke puh záh ɓay ziŋ pa̧ymun a foyu ta-a. Mí Pɔl ƴo sɔk ɓahri, kerɓay tul ti̧hna ke puh záh ke pa̧ymun a foyu na ɓil fe laɓna woyri. Ɓay fe le ɓay ɓahna woyri ke fe laɓna woyri-aw mah hani ya. Ɓay tul ɓay sóh mbih ɓay hulri le í ki̧ mbete Nombres 19.11-19 ɓay tu ɓayu. ? 30Ti̧hna nzukri ke pa̧ymun a foyu ta-a ra wa, ɓay tul fe gaŋ mí a wah nah ƴo ndoh mun wah hi̧ hul sa̧wsehri gbam le ? 31Ketina nam ke nam mi ƴo ko hul. Mi ɓahri, i ɓa fe-vba̧ haŋ bi gaŋ. Ke riŋ Gaŋ wah Mbay Zezu ɓa ketina. 32Ŋgermu ké mi ruh ke fe mgbamri ké Efeze, mi ruh ŋgermu-aw ɓay tul kerɓay tukala kaŋto le, ti̧h mi suk fál suŋ ? Gelke hulri ta ziŋ pa̧ymun a foyu ya ra le, náh su̧ fe, náh nzo fe ɓayu ké pele le, nah hú wu̧m#15.32 Í mgba Mbete Esaïe 22.13 tuh ke kerɓay sú̧ fe, nzó fe dara mí hú ɓáy.. 33Í reh ful ya. Káɓ gel mberem kɔk ɓayri ra ƴo ɓeɓ siŋ sina a sukiri. 34Í el wuri mbi kerɓay a teh-u, í laɓ suya ya, ɓayu ké nzuk a haniri ké sakra woiri-aw tu Ŋgerzah ya. Mi ɓah kaŋ ɓay hi̧ su̧hru ɓá se wuri.
35Mí nzuk a hani ɓay ɓahri : « Ani mí záhri ɓay ziŋ pa̧ymun a foyu le ? Sam mun a suŋ mí ku él gi keni le ? » 36Kɔk nzuk, mi̧hri ké mu ruh ra, zah-u hu ya le, lawu ta ti̧h ɓa gay fe pay ya. 37Mi̧hri ké mu ruh ra, mu ruh ɓa gay fe pay ya ɓáy. Le ɓa ti̧hri naŋ mini ti̧hri fe a ɓoru mú-u ruh. 38Mí Ŋgerzah hi̧ ti̧hri fe pay gayu kandɔk ké law ye yih. Ti̧hri fe pay a suŋ suŋ le, ƴo ke gay ye gay ye. 39Mun hayri gbam mah hani ya. Ku na ɓoɗ ɓoɗ. Nzuk pirmatul ƴo ke mun hay ye ɓoɗ, nay ƴo ke mun hay ye ɓoɗ, gundoy ƴo ke mun hay ye ɓoɗ, nzuy ƴo ke mun hay ye ɓoɗ. 40Mun fe nunmbamri ƴo ri, mun fe tusiɓari ƴo ri, mí ndu̧yna mun fe nunmbamri na ɓoɗ, ndu̧yna mun fe tusiɓari na ɓoɗ. 41Ndu̧yna mun seh na ɓoɗ, ndu̧yna mun few na ɓoɗ, a ɓoru ɓáy ɓa ndu̧yna mun gunwu̧y nunmbamri. Ké sakra gunwu̧y nunmbamri kara ndu̧yna mun woyri na ɓoɗ ɓoɗ pi.
42Kaŋ pi mí ɓa ti̧hna záhri ke pa̧ymun a foyu mah hani ke mi̧hri kú-u ruh gɔl tulu ke siɓa. Nzuk pirmatul ba, ku gɔr mun ye ɓa fe a puŋu, mí ke ti̧h eŋ gay fe pay le, mun ye ta pu-puŋna mba. 43Ku gɔr mun nzuk pirmatul ɓa kɔk fe, mí ke ti̧h le, mun ye ndu̧y ɓa fe riŋ ɗina. Ku gɔr mun nzuk pirmatul ɓa ko̧hko fe, mí ke ti̧h le, mun ye ƴo ke huhrumun. 44Ku gɔr mun nzuk pirmatul ɓa a sa̧w som siɓa. Mí ke ti̧h le, mun ye ɓa a sa̧w Tempuki. Kandɔk ké sa̧w a som siɓa ƴo ri ra, sa̧w a Tempuki kara ƴo ri pi. 45Kaŋ mí ku vbeh ɓahri, Adam nzuk pirmatul a titilu ra tem ye ziŋ ɔkna#15.45 Ɓayay na ɓil Mbete Sa̧w fe 2.7.. Mí Adam a saru ba, ti̧h ɓa nzuk pirmatul ké tem mun ye ƴo hi̧ ɔkna#15.45 Ɓay ko ɓahri, Adam a saru ɓah ɓay tul Zezu, í ki̧ Mbete 1 Kɔrenteri 15.21. 46Mí ta ɓa mun nzuk pirmatul a sa̧w Tempuki mí ti̧h pol ya. Wara le mun nzuk pirmatul a sa̧w som siɓa mí ti̧h pol dara mí mun nzuk pirmatul a sa̧w Tempuki el ti̧h fal ɓáy. 47Sa̧w nzuk pirmatul a titilu ɓa tusiɓa. Sa̧w nzuk pirmatul a toŋna-u ba, ɓa nunmbam. 48Kaŋ mí mun nzuk kú-u laɓ ke som siɓa ra ɓa sam mun nzuk pirmatul ké sa̧w woyri ɓa som siɓa. Mí mun nzuk ké sa̧w ye ɓa nunmbam ba, ɓa sam mun nzuk pirmatul ké sa̧w woyri ɓa nunmbam. 49Kandɔk ké mun wah ba hani ke mun nzuk pirmatul ké sa̧wu ɓa som siɓa ra, kaŋ pi mí mun wah ɓay ba hani ke mun nzuk pirmatul ké sa̧wu ɓa nunmbam. 50Yi̧n biri, mi ɓahri se, mun ke sem ké ɓay pu-puŋ ta ya̧ puh lakna Ŋgerzah ya. Fe a a̧y ké ɓay pu-puŋ ra ta ya̧ fe a a̧y ké ɓay kaɓ kpatara ra ya.
51Mi ƴo ten sa̧wɓayay hi̧ wuri. Nah ta na tul dakan gbam ya. Wara le mun wah gbam mí ɓay kom gba̧y ɓa mun a ɓoru, ké ɓil te ta̧y nun mbew. 52Seh ké úl baw ti̧w a saru ɓay mgbe-u dale, mun hulri ɓay ti̧h ke pa̧ymun ké pu-puŋna ya, a wah mun wah ɓay sɔɓ ke mun ké pu-puŋna ya. 53Kandɔk ndóh gar, mun ké ɓay pu-puŋ ra ɓá ndoh mun ké pu-puŋna ya. Mun ké ɓay hu-hu ra ɓá ndoh mun ké kaɓ kpatara. 54Nam ké mun a pu-puŋ ɓay ndoh mun ké pu-puŋna ya, mun a hulu ɓay ndoh mun ké kaɓ kpatara dale, ɓay kú-u vbeh lewsa̧ ra ɓay laɓ ke gelu gelu. Ɓayu mí na-ay : Tul Hul gɔl gba̧y gba̧y ɓil haw ŋgermu#15.54 Ɓayay na ɓil Mbete Esaïe 25.8.. 55A wo Hul, ŋgerna-i fe wo na fál suŋ ? A wo Hul, ŋgerna-ɔr ki̧n wo na fál suŋ lo#15.55 Ɓayay na ɓil Mbete Osée 13.14. ? 56Ŋgerna-i fe hul ɓa suya, ŋgerna suya ba, ɓa bolkusol Ŋgerzah. 57Mí tumbɔl hi̧ Ŋgerzah ɓay lawsuki ye ké-e hi̧ Gaŋ wah Ŋgermbay Zezu haw ŋgermu hi̧ na. 58Kaŋ dale yi̧n biri, gun sanari, í ɓer gi̧w, í ƴo ɓa kpuh-u. Pihna Gaŋ tul feri riw ɓá ŋgi̧ ndekle ndekle kpatara ké ta̧w woiri. Ɓay fe le i tu-tu, ta̧hma woiri ɓil pihna Gaŋ tul feri riw ra kal ndikpo ya.
Currently Selected:
Mbete 1 Kɔrenteri 15: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
