Mbete 1 Kɔrenteri 14
14
1Kaŋ dale í ɗuk fal law sana. Í taw ŋgernari ké Tempuki hi̧, wara mí ŋgerna-ɓah ɓay ké Tempuki ɓaŋ ndoh ɓil law woiri mí í taw. 2Nzuk ké Tempuki hi̧ ni ŋgerna-ɓah nzak ɓay ɓahnari ɓoɗ ɓoɗ ɓa fe saŋ ra, ke ɓah ɓayu hi̧ nzuk pirmatulri ya. Ke ɓah ɓayu hi̧ Ŋgerzah, ɓayu ké nzukri ké ƴo gel-dim Ŋgerzah-aw lah ya, mí Tempuki hi̧ ni ke ɓah sa̧wɓayri ké mu̧h ké ɓil law Ŋgerzah. 3Mí nzuk a a̧y ké ƴo ɓah ɓay ké Tempuki ɓaŋ ndoh ɓil law ye ra, ke ɓah ɓayu hi̧ nzuk pirmatulri lah, ɓay kú ŋger keni, ɓay hew niri, ɓay hi̧ law nzukri ɓá voh pi. 4Nzuk ké ɓah nzak ɓay ɓahnari ɓoɗ ɓoɗ ra, a ye ke hȩk ye mí ke ŋger keni. Mí nzuk ké ɓah ɓay ké Tempuki ɓaŋ ndoh ɓil law ye ba, hi̧ sa̧w in Ŋgermbay ŋger keni.
5Mi yih ɓay a woiri gbam í ɓah nzak ɓay ɓahnari ɓoɗ ɓoɗ. Mí fe ké su mba a a̧w le, Tempuki ɓá hi̧ í ɓah ɓay ké-e ɓaŋ ndoh ɓil law woiri ma. Ɓay fe le nzuk ké ɓah ɓay ké Tempuki ɓaŋ ndoh ɓil law ye ra ƴo hi̧ sa̧w nzuk Ŋgermbayri hu̧h ma pol pol kal nzuk ké ɓah nzak ɓay ɓahnari ɓoɗ ɓoɗ ké nzuk ndazi ɓayuri ta-a. 6Í ko yi̧n biri, gelke mi gi ta̧w woiri ké gel-dim Ŋgerzah mí-i ɓah ɓay hi̧ wuri ke nzak ɓay ɓahnari ɓoɗ ɓoɗ ké i lah ya ra wa, mi ti̧h wuri suk gaŋ le wo ? Gelke mi ten sa̧wɓay ye ya, mi sɔk fe tuna ya, mi ɓah ɓay ké Tempuki ɓaŋ ndoh ɓil law bi ya, mi firma wuri ɓay Ŋgerzah ya ra wa, mi ti̧h wuri suk gaŋ le wo ? 7Ɓayu si mbew ke fe-loŋ gel kandɔk ti̧w ke nzaŋa. Gelke kusolu ti̧h ɓoɗ ɓoɗ ya le, ani mí nah tú siŋ ké nzuk-ul ti̧w ɗi, ani mí nah tú siŋ ké nzuk-haŋ nzaŋa ɗi le ? 8Gelke nzuk-haŋ tul dali zukru kusolu maŋ ba, a ge mí ɓay lek mun ye ɓay si ŋgermu le ? 9Kaŋ pi mí a woiri ké i ɓah nzak ɓay ɓahnari ɓoɗ ɓoɗ ɓa fe saŋ ra, gelke nzukri tu nzak ɓay ɓahna-aw ya le, ani mí ku lah wuri le wo ? I ƴo ɓah ɓay hi̧ kuna munu.
10Nzak ɓay ɓahnari ka̧h ani mí ké tukala ? Mí nzak a a̧y ké na gɔɓ ta-a. 11Kaŋ le mi tu nzak ké nzuk ƴo ɓah-u ya le, mi ɓa mbiki ké pol nzuk ké ƴo ɓah ɓayaw ra, mí a ye kara ke ɓa mbiki ké pol bi pi. 12Kaŋ pi mí a woiri ké i taw ŋgernari ké Tempuki hi̧ dale, í vbi ŋgerna a a̧yri ké hi̧ sa̧w nzuk Ŋgermbayri ɓá ŋger. Le i hú̧h keni ma pol pol. 13Kandɔkaw mí nzuk ké ƴo ɓah nzak ɓay ɓahnari ɓoɗ ɓoɗ ké gel-dim Ŋgerzah ra, ké goŋ Ŋgerzah ɓá hi̧ ni ŋgerna-ndazi ɓayu pi.
14Gelke mi ƴo goŋ Ŋgerzah ke nzak ɓay ɓahnari ɓoɗ ɓoɗ ɓa fe saŋ le, tem bi ƴo goŋ Ŋgerzah, tul bi ba, tu fe ké mi ƴo ɓah-u ya. 15Kaŋ ba, a fe mí-i laɓu ɓáy le ? Mi góŋ Ŋgerzah ke tem bi pi, mi góŋ Ŋgerzah ke fe tuna tul bi pi. Mi ɗí siŋ Ŋgerzah ke tem bi pi, mi ɗí siŋ Ŋgerzah ke tul bi pi. 16Mí gelke tem wo el ke tumbɔl hi̧ Ŋgerzah ke nzak ɓay ɓahnari ɓoɗ ɓoɗ ɓa fe saŋ, mí nzuk ké gi kaɓ haŋsekle woiri ké-e lah nzak ɓay ɓahna-aw ya ra wa, ke yíh, « Gelu munu » gaŋ le ? Ɓay fe le ke lah ɓay ké mu ɓah ya. 17A wo le mu ƴo el ke tumbɔl hi̧ Ŋgerzah. Fe-u su mbamba, mí a ye ba, ke ziŋ ŋgerna keni ya dih. 18Mi el ke tumbɔl hi̧ Ŋgerzah ké mi ɓah ke nzak ɓay ɓahnari ɓoɗ ɓoɗ ɓa fe saŋ mba wuri gbam mba-mba. 19Mí ké gel mbu̧h hani sa̧w nzuk Ŋgermbayri le, mi ko su-su ɓay mí ɓah ɓay a peh ya-u kaŋto ké ɓay guh law nzukri. Láɓ kandɔkaw su mba ró ɓay raɓ raɓ ke nzak ɓay ɓahnari-aw.
20Yi̧n biri, í ker ɓay kandɔk gunri ya. Ké ɓil suya le, í na ɓa gunri. Mí ɓay kerlaw le, í eŋ nzukri ké ŋger da. 21Mbete bolkusol Ŋgerzah ɓahri se : « Mi ɓáh ɓay hi̧ nzuk biri-aw ke nzak ɓay ɓahna a ɓoruri. Tul nzak a ɓoruri, mi ɓáh ɓay keni hi̧ niri dale, ku láh mi ya gaŋ#14.21 Ɓayay na ɓil Mbete Esaïe 28.11-12. »
Gaŋ tul feri riw ɓah kaŋ. 22Kaŋ le ɓáh ɓay ke nzak ɓay ɓahnari ta ɓa fe saŋ ké sɔk ɓay hi̧ nzuk-kan law tul Ŋgermbayri ya. Le sɔk ɓay haɓna tul nzukri ké saŋ Ŋgerzah. Ɓay nzukri ké saŋ ni ra ɓáh ɓay ké Tempuki ɓaŋ ndoh ɓil law nzuk-kan lawri ta ɓa fe saŋ ɓay tul woyri ya. Le ɓáh ɓay ké Tempuki ɓaŋ ndoh ɓil law ɓa fe saŋ ké sɔk ɓay hi̧ nzukri ké kan law tul Ŋgermbay. 23Gelke a woiri sa̧w in Ŋgermbay i mbu̧h haniri gel mbew, mí gbam woiri i ƴo ɓah ke nzak ɓay ɓahnari ɓoɗ ɓoɗ ra, mí nzuk hani mini nzuk ké saŋ Ŋgerzah gi rih sakra woiri le, ku ɓay ɓahri, eh mí ɗuk wuri, kaŋ ya le ? 24Mí gelke gbam woiri i ƴo ɓah ɓay ké Tempuki ɓaŋ ndoh ɓil law woiri dale, nzuk-saŋ Ŋgerzah mini nzuk a hani-u gi rih le, ɓay ké Tempuki hi̧ ni ke lah ra ƴo tuŋ ni tu-tuŋ, ɓay ké-e lah ra ƴo ki̧ fal fe laɓna ye. 25Ɓayuri ten ɓay ké mu̧h ɓil law ye ma kala dale, ke húk siɓa, ke dím Ŋgerzah ɓahri : « Ŋgerzah ƴo sakra woiri gaŋ ɓa ketina#14.25 Ɓayay na ɓil Mbete Esaïe 45.14.. »
26Mí a fe ɓáy le, yi̧n biri ? Gelke i mbú̧h hani ɓay dim Ŋgerzah le, a ge ge kara ƴo ke ŋgerna ké Tempuki hi̧ ni hi̧ ni. Nzuk mbew ƴo ke ŋgerna-ɗi siŋ-dim Ŋgerzah, nzuk a ɓoru ƴo ke ŋgerna-sɔk ɓay Ŋgerzah, nzuk a ɓoru ƴo ke ŋgerna-ten sa̧wɓay, nzuk a ɓoru ƴo ke ŋgerna-ɓah ɓay ke nzak ɓay ɓahnari ɓoɗ ɓoɗ ɓa fe saŋ, nzuk a ɓoru ƴo ke ŋgerna-ndazi ɓayu, mí fe-uri gbam ɓá laɓ ke gelu gelu hi̧ sa̧w nzuk Ŋgermbayri ɓá ŋger keni. 27Nzukri ké ƴo ke ŋgerna-ɓah ɓay ke nzak ɓay ɓahnari ra le, ɓá na ɓa nzukri seɗe, say kaŋto. Mí kú ɓah ke toŋna-u toŋna-u dara mí nzuk ké ƴo ke ŋgerna-ndazi ɓayu ɓá ƴo ri pi. 28Ta-a le, kú tuh nzak woyri ké gel mbu̧h hani sa̧w in Ŋgermbay, mí kú ɓah ɓay hi̧ Ŋgerzah ma law woyri.
29Mí nzuk a ɓoruri ké ƴo ke ŋgerna-ɓah ɓay ké Tempuki ɓaŋ ndoh ɓil law woyri, ɓá na ɓa nzukri seɗe mini say. Tɔr nzuk a ɓoruri ké gel mbu̧h hani woiri-aw ba, ɓá fakla sa̧w ɓayu ɓa teh-u ko#14.29 Í mgba Gun mbete 1 Za̧h 4.1-3 tuh ke gel ki̧na-ay. . 30Ké sakra nzukri ké ƴo lah ɓayu, Tempuki hi̧ nzuk mbew tu sa̧w fe le, nzuk ké ƴo ɓah ɓay ɓá tuh nzak ye, 31ɓayu ké gbam woiri i ƴo ke ful-ɓah ɓay ké Tempuki ɓaŋ ndoh ɓil law woiri, mí í ɓah ɓayuri ke toŋna-u toŋna-u, ɓay hi̧ nzukri gbam ɓá ziŋ fe firma pi, ɓá ziŋ nzak hewna pi. 32Nzuk ké Tempuki ɓaŋ ɓay ndoh ɓil law ye ra nzuku ƴo ke ful ɓay ɓah ɓayu, ke ɓa gaŋ tul mun ye, 33ɓayu ké Ŋgerzah ta ɓa záh-laɓ sa̧na ya, mí ke ɓa záh ké ƴo hi̧ ɗeŋ kandɔk ké fe-u ƴo laɓ ké gel-mbu̧h hani sa̧w nzuk yeri gbam.
34Wu̧yri ɓá tuh nzak woyri ké gel mbu̧h hani sa̧w in Ŋgermbay, ɓayu kú-u ta ke ful-suh ɓay ya, mí hȩkna ɓá ƴo ri kandɔk ké bolkusol#14.34 Bolkusolay ziŋ ɓil mbete Ŋgerzah ya. ɓah. 35Gelke-e yih vbi sa̧w fe a hani-u le, ké vbi wah ye ké puh. Ɓay hi̧ wu̧ynzuk ɓá suh ɓay ké gel mbu̧h hani sa̧w in Ŋgermbay ɓa su̧hru.
36Kandɔk ké gel-mbu̧h hani sa̧w nzuk Ŋgerzahri ɓa gel ké Ŋgerzah hi̧ ɗeŋ ra, mi vbi wuri ɓahri, ɓay Ŋgerzah ra ba, sa̧wu ti ké ta̧w woiri le ? Ɓayu gbu̧h sa tul woiri ke hȩk le ? 37Gelke nzuk ko mun ye ɓa nzuk ké ƴo ke ŋgerna-ɓah ɓay ké Tempuki ɓaŋ ndoh ɓil law ye le, nzuku ɓá tu ɓahri, ɓayri ké mi vbeh hi̧ wuri-ay ɓa bolkusol Gaŋ tul feri riw. 38Gelke-e sa tu kaŋ ya le, a ye kara Ŋgerzah tu ni ya pi. 39Kaŋ mí yi̧n biri, í ri̧h si̧w ɓay tul ŋgerna-ɓah ɓay ké Tempuki ɓaŋ ndoh ɓil law woiri, mí í gboh ŋgerna-ɓah nzak ɓay ɓahnari ra ya pi. 40Kandɔkaw mí feri gbam ɓá laɓ mah hȩkna ke gelu gelu.
Currently Selected:
Mbete 1 Kɔrenteri 14: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
