Mbete 1 Kɔrenteri 13
13
1Gelke mi ɓah nzak ɓay ɓahna nzuk pirmatulri, mi ɓah nzak ɓay ɓahna tem nzak pihnari pi, mí law sana ta ɓil law bi ya le, mi ɓa gɔh dali ké mgbe buktuk buktuk mini ta̧w mbara ké mgbe wɔk wɔk. 2Gelke mi ɓah ɓay ké Ŋgerzah ɓaŋ ndoh ɓil law bi, mi tu sa̧w feri gbam ké na law Ŋgerzah, mi tu goso feri gbam, mi ƴo ke sam kanlaw ké mah loh baw kasawri kara pi, mí law sana ta ɓil law bi ya le, mi na ɓa fe ndikpo. 3Gelke mi wal fe ziŋna biri gbam hi̧ nzuk sehri, mini mi poŋ mun bi hi̧ hul ɓay hi̧ fe-u ti̧h ɓa fe-vba̧ haŋ bi, mí law sana ta ɓil law bi ya le, feri-aw gbam ti̧h mi suk ya.
4Law sana ƴo ik law, law sana ƴo laɓ lawsuki ziŋ nzukri.
Law sana laɓ sere ya, a̧h ka̧w ya, hu̧h tul ya, 5laɓ fe gak ya, ƴah suki ɓay tul ye ya, pahra nzak ya, mgba suya ké nzuk laɓ ziŋ ni kan law ye ya.
6Law sana ziŋ law rihna tul fe laɓna tukala ya, ketina mí rih law ye. 7Law sana gah nzak ya, sam fe a ani ani mí toh tul ye kara law sana ƴo kan law, law sana ƴo geŋ suki kpatara, law sana ƴo su̧h law.
8Law sana ƴo ɓa ŋgɔh. Ɓayri ké Tempuki ɓaŋ ndoh ɓil law nzuk ɓay ka-kal. Ɓáh nzak ɓay ɓahna ɓoɗ ɓoɗ ɓa fe saŋ ɓay gbu̧h-u. 9Goso fe tunari ɓay ka-kal, ɓayu ké fe tuna wah gba-gba, ɓayri ké Tempuki ɓaŋ ndoh ɓil law wah kara gba-gba pi. 10Mí sew ké feri gbam ɓay ƴo gelu le, fe ké gba-gba ɓay ta mba. 11Sew ké mi ɓa gun ɓáy ra, mi ɓah ɓay ɓahna gun, mi ker ɓay kerna gun, fe tuna bi kara ɓa fe tuna gun. Mi ŋger bale, feri gbam ké ɓa fe laɓna gun ra kal ke gelu gbam. 12Mí sew a aŋay, nah ƴo ko fe-uri roh kandɔk ké nah ko tem mun wah ɓil fe-ko tem. Mí sewu-aw ra nah ɓay ko-u nun ke nun. Sew a aŋay, fe tuna bi gba-gba. Mí sewu-aw ra, mi ɓay tu ni te-teh kandɔk a ye ké-e tu mi kaŋ pi. 13Aŋay feri sayay ƴo ri : kanlaw, géŋ suki, law sana. Ké haŋsekle feri sayaw ra law sana mí mba tul tɔruri-aw.
Currently Selected:
Mbete 1 Kɔrenteri 13: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
