Mbete 1 Kɔrenteri 12
12
1Mí ɓay fe laɓna Tempuki ra mi yih ɓay a woiri yi̧n biri ké ɓil Ŋgermbay í tu ɓa teh-u. 2I tu ɓahri se, sew ké sa̧w woiri na ɓoɗ ra, tukala rah wuri ɓil fe goso záhri ɓoɗ ɓoɗ ké nzak-ɓah ɓay woyri ta-a. 3Ɓayu mí-i ƴo sɔk wuri ɓahri, nzuk ké Tem Ŋgerzah ƴo law ye le, ɓay ta ɓahri, haɓna mí ta Zezu-aw ya. Nzuk ké Tempuki ta law ye ya ba, ke ta ɓah nzak ye ɓahri, Zezu mí ɓa Gaŋ tul feri riw ya. 4Tem hi̧ nzukri ŋgerna-laɓ feri ɓoɗ ɓoɗ, mí Tem ɓa mbew yaŋ. 5Sam pihna-so nzukri ɓoɗ ɓoɗ ké Gaŋ tul feri riw hi̧ ƴo ri, mí Gaŋ tul feri riw mbew yaŋ pi. 6Sam goso pihnari ɓoɗ ɓoɗ ké Ŋgerzah hi̧ ƴo ri, mí Ŋgerzah mbew yaŋ. Ke ƴo hi̧ nzuk yi̧n ɓil Ŋgermbayri a suŋ suŋ gbam ŋgerna ye ŋgerna ye.
7Mí a ge ge le ya̧ ŋgerna fe laɓna ké Tempuki hi̧ ɓay ké ti̧h suk hi̧ yi̧n yeri ɓil Ŋgermbay. 8Tempuki hi̧ nzuk mbew ŋgerna-ɓah ɓay ru̧na ké ur ké ta̧w ye. Nzuk a ɓoru ba, Tempuki hi̧ ni ŋgerna-ten sa̧wɓay ye, mí Tempuki mbew yaŋ. 9Nzuk a ɓoru ɓáy, Tempuki a mbewaw ra hi̧ ni ŋgerna-kan law tul Ŋgerzah ké ɓil feri gbam. Nzuk a ɓoru ba, Tempuki a mbew yaŋaw hi̧ ni ŋgerna-gah senari. 10Nzuk mbew ya̧ ŋgerna-laɓ fe saŋri. Nzuk a ɓoru ɓáy ɓah ɓay ké Tempuki ɓaŋ ndoh ɓil law ye. Nzuk a ɓoru ba, Tempuki hi̧ ni ŋgerna-kehr haŋsekle fe a a̧y ké ɓa Tem Ŋgerzah ke fe a a̧y ké ɓa tem záh tukala. Nzuk a ɓoru, Tempuki hi̧ ni ɓah nzak ɓay ɓahnari ɓoɗ ɓoɗ ɓa fe saŋ. Nzuk a ɓoru ɓáy ba, Tempuki hi̧ ni ŋgerna-ten sa̧wɓayuri. 11Tempuki a mbew yaŋaw mí hi̧ nzukri gbam ŋgernari ɓoɗ ɓoɗaw. Ke wal ŋgernari-aw hi̧ nzuk a suŋ suŋ kandɔk ké-e lek ké ɓil law ye.
12Mbú̧h hani wah sa̧w in Ŋgermbay mah hani ke mun nzuk. Kandɔk ké mun ɓa mbew ra gel munri ɓoɗ ɓoɗ ƴo ri. Ndɔk ƴo ri, nun ƴo ri, gel munri ɓoɗ ɓoɗ ƴo ri. Geluri ké ɓoɗ ɓoɗ, gbamaw mí mbu̧h ɓa mun mbew. Kaŋ pi mí ɓa mun Ŋgermbay, 13ɓayu ké a wah gbam, ziɓ mini gerek, mgbal mini nzuk a garu, gbam wah nah ti̧h ɓil batem a Tempuki mbew mbu̧h ɓa mun mbew, mí nah ziŋ Tempuki mbew yaŋ ɓa mbih nzona wah mbew. 14Mun nzuk ra ɓa gel mbew ya. Le gelri ɓoɗ ɓoɗ mbu̧h ké ri.
15Gelke bɔk ɓahri : « Mi ta ɓa ndɔk ya, mi ta ɓil mun ya, » bɔk ɓah kaŋ ra wa, bɔk ta ɓa mun ya le wo ? 16Suk ɓahri : « Mi ta ɓa nun ya, mi ta ɓil mun ya. » Suk ɓah kaŋ ra wa, suk ta ɓa mun ya le wo ? 17Mun gbam ɓa nun kaŋto ba, mun ɓay lah ɓay ani le ? Mun gbam ɓa suk kaŋto ba, ba̧ri fe ɓay fu mun ani le ? 18Dale Ŋgerzah ba, laɓ gel mun ɓoɗ ɓoɗ mbu̧h ɓa mun mbew kandɔk ké-e yih. 19Mí gbamaw ɓa gel mun mbew kaŋto le, mun na fál suŋ ? 20Kaŋ dale gel mun ɓoɗ ɓoɗ ɓa ŋgi̧-u ƴo ri, mí mun ɓa mbew ɓa a wah sa̧w in Ŋgermbay.
21Ɓay nun ɓá ɓah hi̧ ndɔk ɓahri : « Mu ti̧h mi suk ya. » Le nun ta ɓah kaŋ ya. Tul kara ɓay ké ɓah hi̧ bɔk ɓahri : « Mu ti̧h mi suk ya. » Le ke ta ɓah kaŋ ya pi. 22Gel a a̧yri ké mun ké ta ke ŋgerna ya, ké eŋ fe ndikpo ra ti̧h suk mbamba. 23Gel a a̧yri ké mun ké nah ko mah dimna ya ra mí nah ƴo mbar ke fe gama ɓa suki. Gel a a̧yri ké ɓa gel su̧hru ra mí nah ƴo pɔru ke fe gama. 24Gel a a̧yri ké su̧hru ta ri ya ra nah pɔr ya, mí Ŋgerzah mbɔhlɔ gel munri hani hani hi̧ gel a a̧yri ké toŋ fal gel a polri, ke mbar niri ke dimna. 25Ŋgerzah mbɔhlɔ gel munri ɓay hi̧ kehr haniri ɓá ta-a, wara le ɓay hi̧ mgbá sa̧w hani ké gelri gbam ké mun ɓá mah hani. 26Gel mbew ké mun se-se le, tɔr gel a ɓoruri gbam ko seh ziŋ ni. Mí gel mbew ké mun ziŋ riŋ ɗina le, tɔr gel a ɓoruri gbam laɓ mun rihna ziŋ ni. 27Dale a woiri sa̧w in Ŋgermbay ra i mbu̧h ɓa mun Ŋgermbay mbew, mí ké mun Ŋgermbay mbewaw nzuk mbew ɓa gel mbew mbew. 28Mí Ŋgerzah hi̧ nzuk a suŋ suŋ ké sakra sa̧w nzuk Ŋgermbayri pihna ye pihna ye. Ŋgerpihna a titilu ti ke tul gun nzak pihna Ŋgermbayri ké-e pih. Pihna a seɗe-u na tul nzukri ké-e ɓaŋ ɓay ye ndoh ɓil law woyri. Pihna a sayu, ke hi̧ nzukri fe tuna firma nzuk a ɓoruri ɓay ye. Pihna a fá-faluri Ŋgerzah hi̧ nzukri laɓ fe saŋri dara mí ke hi̧ nzukri gah nzuk senari. Nzuk a ɓoruri so nzukri ké ɓil fe zɔklɔ, nzuk a ɓoruri ɓáy ɓa nzuk-nda pol pihnari. Ke hi̧ nzuk a ɓoruri ɓáy ɓah nzak ɓay ɓahnari ɓoɗ ɓoɗ ɓa fe saŋ.
29Gbam woyri ɓa gun nzak pihnari le wo ? Gbam woyri ke ɓaŋ ɓay ndoh ɓil law woyri le ? Gbam woyri ku ƴo firma nzukri ɓay ye le ? Gbam woyri ke hi̧ niri laɓ fe saŋri le ? 30Gbam woyri ke hi̧ niri ƴo gah nzuk senari le ? Gbam woyri ke hi̧ niri ɓah nzak ɓay ɓahnari ɓoɗ ɓoɗ le ? Gbam woyri ke hi̧ niri ƴo ndazi nzak ɓay ɓahnari ké ɓoɗ ɓoɗ ra le ? 31Uwa, i ƴo ƴah ɓay fe laɓna a ŋgeruri ké Tempuki hi̧, mí mi sɔ́k wuri mahful a ndaru ɓáy.
Currently Selected:
Mbete 1 Kɔrenteri 12: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
