Mbete 1 Kɔrenteri 11
11
1Í ndɔl fe laɓna bi-ay kandɔk ké a bi mi ndɔl fe laɓna Ŋgermbay.
2Mi pir wuri ɓay fe le, ɓil feri gbam i ƴo ker ɓay tul bi kandɔk fe laɓna-dim Ŋgerzah ké gel-mbu̧h hani ké mi poŋ ndoh ndɔk woiri, mí i ƴo tulu. 3Dale mi yih ɓay í tu wuri ɓayay : Tul wo̧ronzuk gbam ɓa Ŋgermbay, tul wu̧ynzuk ɓa wo̧ronzuk, tul Ŋgermbay ɓa Ŋgerzah. 4Kaŋ le wo̧ronzuk a suŋ suŋ ké ƴo goŋ Ŋgerzah mini ke ƴo ɓah ɓay ké Tempuki ɓaŋ ndoh ɓil law ye, mí ke guɓ tul ye le, ke ɓaŋ su̧hru kan nun Ŋgermbay ké ɓa tul ye. 5Mí wu̧ynzuk a suŋ suŋ ké ƴo goŋ Ŋgerzah mini ke ƴo ɓah ɓay ké Tempuki ɓaŋ ndoh ɓil law ye, mí ke ƴo tul ndikpo le, ke ɓaŋ su̧hru kan nun wo̧ronzuk ké ɓa tul ye. Fe laɓna ye mah hani bin ke fe laɓna suya wu̧y a a̧y ké su̧h tul ye su̧h. 6Ké gel-mbu̧h hani ra gelke wu̧ynzuk sa guɓ tul ye ya le, ké su̧h tul ye. Mí su̧hru sú̧h tul mini séŋ tul se ni dale, ké guɓ tul ye guɓ. 7Wo̧ronzuk ta guɓ tul ya ɓay fe le, riŋ ɗina Ŋgerzah kan tul ye, ke eŋ ni, mí wu̧ynzuk ba, riŋ ɗina wo̧ronzuk kan tul ye, 8ɓayu ké sa̧w wo̧ronzuk ur ké ta̧w wu̧ynzuk ya. Wara le sa̧w wu̧ynzuk mí ur ké ta̧w wo̧ronzuk. 9Ŋgerzah laɓ wo̧ronzuk ɓay wu̧ynzuk ya. Le wu̧ynzuk mí ke laɓ ni ɓay wo̧ronzuk. 10Sa̧wu mí ɓay tem nzak pihnari ké ƴo ko gel ma tul dimna Ŋgerzah woiri-aw ra wu̧ynzuk ɓá guɓ tul ye ɓa fe-sɔk ŋgerna-u.
11Mí keni-aw kara ké nun Gaŋ tul feri riw wu̧ynzuk ke wo̧ronzuk ɓa fe mbew. Wu̧ynzuk ƴo ke tul mun ye ya, wo̧ronzuk kara ƴo ke tul mun ye ya pi. 12Kandɔk ké sa̧w wu̧ynzuk ur ké ta̧w wo̧ronzuk, wo̧ronzuk kara ti̧h ke ɓil wu̧ynzuk pi. Mí sa̧w feri gbam ur ké ta̧w Ŋgerzah. 13Í lu lakna ɓayay ke mun woiri : ɓay wu̧ynzuk ɓá goŋ Ŋgerzah ké gel-mbu̧h hani dan guɓ tul ye ra wa si ke gelu gaŋ le ? 14Feri ké Ŋgerzah laɓ gaŋ kara ƴo sɔk wuri ɓahri, pirmatul wo̧ronzuk sa ɓa peh-u le, ɓa su̧hru hi̧ wo̧ronzuk. 15Pirmatul wu̧ynzuk ba, sa-sa le ɓa fe gama ye ɓay fe le, Ŋgerzah hi̧ ni pirmatul ɓay pɔr tul ye. 16Kandɔkaw mí nzuk a hani ko su-su ɓay fah ɓay tul fe laɓna-ay le, a wah nah tu sam fe laɓna a ɓoru ya pi, sa̧w in Ŋgerzah kara tu ya pi.
Zɔmna ɓay mbi huru ke nzo sem Ŋgermbay ké nzak fe su̧na
17Nzak pihnari ké mi yih ɓah hi̧ wuri-ay, mi ta pir wuri ya ɓay fe le, mbú̧h hani woiri si ziŋ wuri ma pol ya. Le el ziŋ wuri ma fal. 18Ŋger ɓayu mí na-ay : Ku sɔk mi ɓahri se, ké gel-mbu̧h hani sa̧w in Ŋgermbay woiri, kéhr nzukri ƴo ri. Mi ya̧ ɓayu ɓa ketina ndi̧, 19ɓayu ké kéhr hani ɓá ƴo ri ké sakra woiri ɓay ten tehɓay nzukri ké ɓay woyri te-teh.
20Pirna ta-a ɓay fe le, gelke i mbu̧h hani ké nzak fe su̧na ke riŋ Ŋgermbay ɓay nzo sem ke lak huru le, ta ɓa fe su̧na Ŋgermbay mí i su̧ mba, 21ɓayu ké nzuk a suŋ suŋ kara takra mbi fe su̧na ye, fe su̧na ye mí ke el kaɓ keni poŋ mbaŋ yeri kaɓ ɗaka. Nzuk a ɓoruri ba, mbah ɓil woyri ke yim#11.21 Lewsa̧ su̧ peŋ ke nzo sem Ŋgermbay laɓ ké nzak fe su̧na. Ŋgernzuk misoŋ ƴo ri mini ta-a kara nzuk-kan law tul Ŋgermbayri mbu̧h haniri ké kerpuh. Ku gi kaɓ nzak fe su̧na le, ku gɔh peŋ wal su̧, ku wal koɓ mbew ɓa sem Ŋgermbay nzo dara mí ku su̧ fe ke haniri ɓáy. Fe laɓna-u kú-u ɗi ke nzak faraŋse ɓa sainte cène. . 22Uwa, ké kerpuh woiri fe su̧na, fe nzona ta-a wa ? Ko ya le i ko mbú̧h hani sa̧w in Ŋgerzah ɓa kɔk fe, mí i ƴo ɓaŋ su̧hru kan nun nzukri ké ta ke fe ya le ? A̧w ba, mi ɓáh ani hi̧ wuri ɓáy le ? Ké ɓil fe laɓna-aw ra wa, mí pir wuri ley ? Mi ta pir wuri ya.
23Ɓayu ké a bi sa̧w fe laɓna ké mi ya̧ ké ta̧w Gaŋ tul feri riw mi el ndoh fe laɓna-u ké ndɔk woiri kandɔkay : Zezu Gaŋ tul feri riw ra dara kú te ni hi̧ ku mgba ni ndoh ndɔk nzuk a ɓoruri ra le, ke mbi peŋ ke suŋaw, 24ke el ke tumbɔl hi̧ Ŋgerzah, mí ke gɔh. Ke ɓahri se : « Peŋay ɓa mun bi ké mi poŋ hi̧ hul ɓay tul woiri. I ƴo tul laɓ fe laɓna bi-ay le, i mbu̧h ziŋ mi ɓilu#11.24 Nzak faraŋse ɓahri, faites ceci en mémoire de moi mí karaŋri ɓahri, kerɓay tul nzuk ké hu sɔk ɓahri, nzuku ra ta mba, ke hu wu̧m. Le Zezu ɓah kaŋ ya. Kaŋ dale nzuk-sɔɓ mbeteri vbeh ɓahri, i mbu̧h ziŋ mi ɓilu, ɓay hi̧ karaŋri ɓá tu ɓahri, ke ƴo ri ɓayu ké-e el ke puh záh ke kpa̧y mun a foyu.. »
25Fal fe su̧na bale ke mbi koɓ kaŋ pi. Ke ɓahri se : « Koɓay ɓa sem bi ké ŋga̧h sal in ɓa a foyu. Seh ké i laɓ kaŋ le, i mbu̧h ziŋ mi ɓilu. »
26Kpatara ké i ƴo su̧ peŋay, i ƴo nzo yim koɓay le, i ƴo sɔk ɓay hul Gaŋ tul feri riw hi̧ nzukri kpu̧ru ka̧h nam elna ye keni.
27Kaŋ mí a ge ge ké su̧ peŋ Gaŋ tul feri riw, ké nzo yimu va̧h dan hȩkna le, ke laɓ ɓay kan tul ye ke mun ye gaŋ ɓay mun Gaŋ tul feri riw ke sem ye ké-e hȩk ya. 28A ge ge le ɓá hekre siŋ sina ye ɓa teh-u, ani mí ke su̧ walna peŋ, ani mí ke nzo walna yimaw ɓáy, 29ɓayu ké nzuk ké su̧ peŋaw, nzo yim koɓaw va̧h dan ker ɓahri, mun Ŋgermbay#11.29 Mun Ŋgermbay ƴo ke kerɓay seɗe ɓilu. A mbewu ɓah ɓay tul peŋaw. A seɗe-u ba, ɓah ɓay sa̧w in ye ɓa nzukri. Í mgba Mbete Efezeri 1.20,21 tuh keni. na ɓoɗ le, ke su̧-u, ke nzo-u, mí salɓay mgba tul ye ke mun gaŋ. 30Sa̧wu mí nzukri ɓa ŋgi̧-u ké sakra woiri ta̧-ta̧h, nzuk a ɓoruri na sena, nzuk a ɓoruri ba, hu pi.
31Mí gelke nah hekre siŋ sina wah ɓa teh-u ke mun wah le, salɓay Ŋgerzah ta mgba tul wah ya. 32Mí gelke salɓayu ƴo mgba tul wah le, Ŋgermbay ƴo ndar na hi̧ ɓay hul ɓá mgba tul wah ziŋ nzuk tukalari ya. 33Kaŋ mí yi̧n biri, gelke i mbu̧h hani ɓay lak huru ke riŋ Ŋgermbay le, í geŋ haniri. 34Mí ɗaka i nzuk a hani le, ké su̧ fe ké puh ye dara ké gi gel-mbu̧h hani ɓáy, rɔkɔ mbú̧h hani woiri ɓá laɓ ɓay kan tul woiri.
Tɔr ɓay a ɓoruri le, mi ƴo geŋ nam ké mi ká̧h ta̧w woiri ɓay mí te-teh ɓayuri hi̧ wuri ɓáy.
Currently Selected:
Mbete 1 Kɔrenteri 11: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
