Mbete 1 Kɔrenteri 10
10
1Yi̧n biri mi yih ɓay í tu ɓay mgbá tul bi-ay ra. Ɓay fe le sew ké Ŋgerzah ten zih wahri ke ɓil mgbal lewsa̧ ra, gbam woyri ku kal ké haŋsekle mahmbih a si̧h-u ɓa fe saŋ. Sina woyri ma tusiɓa Kana, ɗikmambam pɔr niri gbam mí maŋ niri. 2Gbam woyri ku ti̧h mbih batem nunu a Moyiz : ku ti̧h mbih batemaw ɓil mahmbih pi, ɓil ɗikmambam pi#10.2 Ɓay lah ɓay ti̧hna gun Izarayelri ɓil mahmbih, í ki̧ Mbete Exode mah-u 13 ke 14.. 3Gbam woyri ku su̧ fe su̧na ké sa̧wu ɓa Tempuki ke haniri#10.3 Ɓay lah ɓay fe su̧na ké gun Izarayelri su̧, í ki̧ Mbete Exode mah-u 16.. 4Mí gbam woyri ku nzo mbih ké sa̧wu ɓa Tempuki. Mbih ké sa̧wu ɓa Tempuki ra lu ké ɓil baw kasaw ké ƴo dih fal woyri, mí ku nzo. Kasaw a lewsa̧-aw ra mí ɓa Ŋgermbay#10.4 Ɓay lah ɓay kasawu, í ki̧ Mbete Za̧h 7.37-39, mbete Nombres 20.7-11, Mbete Exode 17.1-7..
5Keni-aw kara law Ŋgerzah rih tul ŋgi̧na nzukri ké sakra woyri ya. Sa̧wu mí hul woyri ku̧ mgbarak mgbarak ké gel sina woyri ɓil lawkɔr. 6Feri-ay ɓah ɓay hi̧ na a wah ké aŋay pi rɔkɔ nun wah ɓá pu pih ké tul fe suya kandɔk nun woyri ké pu pih tul fe suya kaŋ. 7Ké sakra woyri ra nzuk a haniri ƴo dim záhri, mí a woiri ba, í dim záhri ya. Ɓay tul woyri ku vbeh lewsa̧ ɓahri, ké gel kani záh-aw nzukri kaɓ su̧ fe, ku nzo fe, mí ku el ur nday#10.7 Ɓayay na ɓil Mbete Exode 32.6.. 8Nzuk a haniri ké sakra woyri laɓ nunpuki ra, mí nzukri sɔɗ sɔɗ boh gel bon seɗe falu say (23.000) hu mburuk mburuk ɓil nam mbew. A wah ba, náh laɓ nunpuki ya. 9Náh fah Ŋgermbay ya. Nzuk a haniri ké sakra woyri fah ni bale, soy te niri mí ku hu. 10Í kazi ɓay ya. Nzuk a haniri ké sakra woyri kazi ɓay, mí Hul i niri. 11Feri ké ziŋ niri-aw ɓah ɓay hi̧ na a wah ké aŋay, mí ku vbeh ku̧ mbete ɓa bakna hi̧ na, ku vbeh ɓay hi̧ na a wah ké nah ƴo ɓil sew a gbu̧h-ay pi. 12Kandɔkaw mí nzuk ké ker ɓahri, ke ɓer gi̧w le, ké ru̧ ke mun ye rɔkɔ ké lih.
13Fe-leh lawri ké ziŋ wuri-aw ɓa fe ké ziŋ nzuk pirmatulri gbam. Mí ndɔk Ŋgerzah ɓa ndɔk ké ɗɔr sal in ya. Ke ta hi̧ fe-leh law ɓá kal ŋgerna woiri ya. Wara le fe-leh law a suŋ suŋ ziŋ wuri kara ke ƴo hi̧ wuri ŋgerna ɓay fe-u ɓá mba wuri ya, mí i tí̧h ke ɓilu.
14Kaŋ dale maŋlaw biri, í ɗi-ɗih ke dím záh a ɓoruri. 15Mi ɓah ɓay hi̧ wuri kandɔk nzukri ké ru̧-ru̧ da. A woiri, í lu lakna ɓay ké mi ƴo ɓah-u-ay : 16koɓ mgbɔkɔ Ŋgerzah ké nah ƴo nzo keni sem Ŋgermbay, ké nah ƴo el ke tumbɔl ɓayu hi̧ ni ra mbu̧h na mbew ɓil sem Ŋgermbay, kaŋ ya le ? Peŋ ké nah gɔh su̧ ra mí mbu̧h na mbew ke mun Ŋgermbay, kaŋ ya le ? 17Peŋ mbew ké nah su̧, tul wah ro-ro kara sɔk ɓahri se, mbu̧h na ɓa mun mbew, ɓayu ké riw wah nah mbu̧h ndɔk mbew gɔh peŋ a mbewaw su̧. 18Í ko wuri ziɓri a woyri gun Izarayelri a sa̧w tusiɓa. A woyri kú-u gi ke fe puhna hi̧ Ŋgerzah mí ku su̧ fe-u ra wa, ku mbu̧h mbew ke fe puhna-u, kaŋ ya le#10.18 Ɓay tu ɓay fe puhna ké Ŋgerzah sɔk ziɓri kú-u su̧ ra, í ki̧ Mbete Deutéronome 14.22-27. ? 19A fe mí-i yih ɓah-u le ? Mi ɓah ɓay fe puhna hi̧ záhri ké ɓa fe ndikpo ya, mi ɓah ɓay záhri kú-u ɓa fe ndikpo ya pi. 20Mi ɓahri se, fe puhna ké nzukri puh ra, ku puh hi̧ Ŋgerzah ya, ku puh hi̧ záhri. Kaŋ dale mi sa ɓay í mbu̧h ziŋ záhri ya. 21Mahful ɓay í nzo sem Gaŋ tul feri riw dara mí el nzo fe puhna záh ta-a. Mahful ɓay í mbu̧h ndɔk mbew su̧ fe ké nzak fe su̧na Gaŋ tul feri riw dara mí el mbu̧h ndɔk mbew su̧ fe ké gel fe puhna záh ta-a. 22Mini nah yih tur nun Gaŋ tul feri riw ɓay ko sere ye le ? Uwa, nah ŋger mba ni lo ?
23Nzuk a haniri ɓahri : « Fe laɓnari gbam mi mah laɓu. » Gelu munu, mí fe laɓnari gbam ɔh ɓa suki ya. « Fe laɓnari gbam, mi mah laɓu », mí fe laɓnari gbam hi̧ sa̧w in Ŋgermbay ŋger ma pol ya. 24Nzuk ɓá lu kerɓay tul ye ma fal. Le ké ker si tul nzuk a ɓoruri ma. 25Sam hay a suŋ suŋ kú-u ɗam ké lumu, í yeh, í su̧ dan vbi sa̧wu rɔkɔ law woiri ɓá ziŋ fahɓay tul hay fe puhna hi̧ záhri kú-u yeh ziŋ wuri ké lumu, 26ɓayu ké tusiɓa ke feri gbam ké na ɓilu ɓa nunu a ye Gaŋ tul feri riw#10.26 Ɓayay na ɓil Mbete Siŋ (Psaumes) 24.1.. 27Mí nzuk ké kan law tul Ŋgermbay ya ɗi wuri ɓay kaɓ nzak fe su̧na, mí i si le, feri gbam ké-e kan pol woiri, í su̧ dan vbi sa̧wu rɔkɔ law woiri ɓá ziŋ fahɓay. 28Mí gelke nzuk a hani ɓahri : « A a̧y ɓa fe puhna hi̧ záhri » dale, í su̧ ya ɓay tul nzuk ké sɔk wuri pi ɓay rɔkɔ law ɓá ziŋ fahɓay. 29Mi ɓah ɓay fahɓay woiri ya. Wara le mi ɓah ɓay fahɓay nzuk a ɓoru ké ɓah ɓayu hi̧ wuri-aw. Ɓay fe ba mí kerɓay nzuk a ɓoru ɓay laɓ ɓay kan tul bi le ? 30Gelke mi el ke tumbɔl hi̧ Ŋgerzah ɓay fe su̧na ké mi su̧, ani wara mí nzuk zɔm mi ɓay fe su̧na ké mi el ke tumbɔl ɓayu ra le ? 31Kaŋ dale seh ké i su̧ fe, i nzo fe, i laɓ ra fe a suŋ suŋ kara í laɓ fe-uri ɓay hi̧ riŋ ɗina Ŋgerzah ɓá mgbe. 32Í hi̧ fe laɓna woiri ɓá na ɓa gburka-nde ziɓri ya pi, nde sa̧wnzuk a ɓoruri ya pi, nde sa̧w in Ŋgerzah ya pi. 33Kandɔk a bi ké mi ruh mun bi ɓay rih law nzukri gbam ra mi ƴah suki ɓay tul bi ya, wara le mi ƴah suki ɓay tul daɓa nzukri ɓay ya̧ niri hi̧ Ŋgermbay.
Currently Selected:
Mbete 1 Kɔrenteri 10: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
