SAKALIA 2
2
Te tagata mo te uka fuafua
1Nee hiki leva oku mata, o sio, pea koeni, nee i ai he tagata ae nee ina too i tona nima he uka fuafua. 2Nee au ui leva: Pe e ke alu ki fea? Pea nee ina ui mai leva: E au alu o fua ia Selusalemi, ke sioi pe e fia te loa mo te laulahi ae e tonu ke ina mau. 3Pea koeni, nee fakaovi mai leva kia au te aselo ae nee palalau mo au, pea nee hau leva he tahi ake aselo o fakafelavei mai kia ia. 4Pea nee ina ui leva ki te aselo ae nee hau: Lele o palalau ki te tama aena, o ui: E liliu anai ia Selusalemi ko he kolo ava, o tupu ko te kaugamalie o te u tagata mo te u manu ae e nonofo anai i ai; 5pea nee ui leva e te Eteleno: E au liliu anai kia ia ko he kaupa afi i tona takatakai katoa, pea e au liliu anai ko tona kololia i lotomalie o ona.
Kololia o Selusalemi i te temi ka hau
6Koutou feholaki, koutou feholaki i te fenua o te noleto!
E ui e te Eteleno:
Koteuhi nee au fakamavetevete koutou ki te u potupotu e fa o te atu lagi,
E ui e te Eteleno.
7Ke ke hola, Sione,
Ia koe ae e nofo i te fale o te taahine o Papilone!
8Koteuhi e folafola te Eteleno o te atu fua tau, o ui:
I te hili o te mea aia, e hau anai te kololia!
Nee ina fekaui au ki te u puleaga ae nee natou fakamasisivai ia koutou;
Koteuhi ko ae e fafa kia koutou e fafa ki te kanoi mata o tona foi mata.
9Koeni, e au hiki toku nima ki te atu puleaga,
Pea e natou liliu anai ko te meakai a natou ae nee popula kia natou.
Pea e koutou iloi anai ko te Eteleno o te atu fua tau ae nee ina fekaui au.
10Taahine o Sione,
Ke ke fai ni kalaga fakafiafia pea ke ke nekenekea!
Koteuhi koeni, e au hau, pea e au nofo anai i te lotomalie o ou,
E ui e te Eteleno.
11I te aho aia e kaugamalie anai te u puleaga ae e pipiki anai ki te Eteleno,
Pea e natou liliu anai ko taku hahai.
E au nofo anai i lotomalie o ou,
Pea e ke iloi anai nee fekaui mai au kia koe e te Eteleno o te atu fua tau.
12E mau anai e te Eteleno ia Suta ko tona vaega
I te kele maonioni,
Pea e ina toe filifili anai Selusalemi.
13Ke fakalologo te hahai fuli i mua o te Eteleno!
Koteuhi kua ala ia ia o hau mai tona nofoaga maonioni.
Currently Selected:
SAKALIA 2: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
