SAKALIA 1
1
Kalaga ki te fakahemala
1I te mahina valu o te tau lua o Taliusi, nee tuku leva te folafola a te Eteleno ki te polofeta ko Sakalia, foha o Pelekia, foha o Ito, o ui:
2Nee itaita te Eteleno ki akoutou tamai. 3Koia fakaha kia natou: E folafola te Eteleno o te atu fua tau, o ui: Koutou toe liliu mai kia au; pea e au toe liliu mai anai kia koutou, e folafola te Eteleno o te atu fua tau. 4Aua naa koutou hage ko akoutou tamai, ae nee palalau ki ai te kau polofeta i mua atu, o ui: E folafola te Eteleno o te atu fua tau: Koutou maliu mai okotou ala kovi, pea mo akoutou gaue kovi! Kae nee mole natou fakalogo, pea nee mole pe natou tokaga kia au, e folafola te Eteleno. 5Ko akoutou tamai, kofea natou? Pea ko te kau polofeta, pe e feala ke natou mauli o heegata? 6Pe nee mole lave ki akoutou tamai aku folafola mo aku fakatotonu ae nee au tuku ki aku tagata faifekau ko te kau polofeta? Nee natou maliu mai, pea nee natou ui: Kua fai e te Eteleno o te atu fua tau kia tatou o mulimuli ki te mea ae nee ina fakapapau ke fai kia tatou o mulimuli ki otatou ala mo atatou gaue.
Te u hosi
7I te aho uafulu ma fa o te mahina hogofulu ma tahi, te mahina o Sepate, i te tau lua o Taliusi, nee tuku leva te folafola a te Eteleno kia Sakalia, foha o Pelekia, foha o Ito, te polofeta, o ui:
8Nee au sio i te pouli, pea koeni, nee heka he tagata i he hosi kula, pea nee tuu ia ia i lotomalie o ni mila i he kogamea malumalu; nee tutuu i muli ni hosi kula, mo ni hosi uli, pea mo ni hosi hina. 9Nee au ui leva: Ko ai ape te u hosi aeni, oi toku aliki? Pea nee ui leva e te aselo ae nee palalau mai kia au: E au fakasio anai ia koe ki te mauhiga o te u hosi aeni. 10Ko te tagata ae nee tuu i lotomalie o te u mila nee palalau leva, o ui: Ko natou ae nee fekaui mai e te Eteleno ke foli i te kele. 11Pea nee natou palalau leva ki te aselo a te Eteleno, ae nee tuu i lotomalie o te u mila, pea nee natou ui leva: Kua matou foli i te kele katoa, pea koeni, e malolo mo tokalelei te kele katoa.
Fakapapau ki Selusalemi
12Pea nee folafola leva te aselo a te Eteleno, o ui: Eteleno o te atu fua tau, e kaku anai ki afea tau nofo e mole ke ofa ki Selusalemi mo te u kolo o Suta, ae nee ke itaita ki ai talu maia tau e fitugofulu? 13Nee tali leva e te Eteleno ki te aselo ae nee palalau mai kia au aki ni kupu lelei pea mo ni kupu fakafimalie.
14Pea nee ui mai leva kia au e te aselo ae nee palalau mai kia au: Kalaga, o ui: E folafola te Eteleno o te atu fua tau, o ui: Kua au finenonofo lahi o tupu ko Selusalemi mo Sione, 15pea kua au mamahi lahi ki te u puleaga fiamealahi; koteuhi nee siisii pe toku mamahi i mua atu, kae kua natou fakalahi ia ia. 16Koia e folafola te Eteleno, o ui: E au toe liliu mai ki Selusalemi mo he ofa mamahi; e toe fakatuu anai toku fale i ai, pea e toe toho anai te fua i Selusalemi. 17Ke ke toe kalaga o ui: Koeni te folafola a te Eteleno o te atu fua tau: E toe mau anai e oku kolo onatou koloa o lahi osi, e toe fakafimaliei anai e te Eteleno ia Sione, pea e ina toe filifili anai ia Selusalemi.
Tala e fa mo tagata faiukamea e toko fa
18Nee hiki ake leva oku mata, pea nee au sio leva, pea koeni, nee i ai ni tala e fa. 19Nee au ui leva ki te aselo ae nee palalau mai kia au: Kotea te uhiga o te u tala aeni? Pea nee ina ui mai leva kia au: Ko te u tala aena ae nee natou fakamavetevete ia Suta, mo Iselaele, pea mo Selusalemi.
20Nee toe fakasio leva au e te Eteleno ki ni tagata faiukamea e toko fa. 21Nee au ui leva: Kotea te mea ae e natou omai o fai? Pea nee ina ui leva: Ko te u tala aena ae nee natou fakamavetevete ia Suta, pea ko te u tagata faiukamea aena ae nee omai o fakamatakui natou, pea mo maumaui te u tala o te u puleaga, ae nee natou laga onatou tala ki te fenua o Suta, ke veteki ai tana hahai.
Currently Selected:
SAKALIA 1: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
