SAKALIA 3
3
Sosue, te pule faisakilifisio
1Nee ina fakasio leva au kia Sosue, te tagata faisakilifisio lahi, ae nee tuu i mua o te aselo a te Eteleno, pea mo Satana ae nee tuu i tona fahai matau o fakalakahalai ia ia. 2Nee folafola leva te Eteleno kia Satana: Ke valoki ia koe, Satana, e te Eteleno! Ke valoki ia koe e te Eteleno, ae kua ina filifili ia Selusalemi! Pe e mole ko he motumotu kakaha ia koe kua tatai mai te afi? 3Ka koeni, nee kofu e Sosue ni kofu fakalialia, pe nee tuu ia ia i oluga ia mua o te aselo. 4Pea nee ui leva e te aselo kia natou ae nee tutuu i ona mua: Koutou hui ona kofu fakalialia! Kae nee ina ui leva kia Sosue: Sio, e au too maia koe tau agakovi, pea e au fakakofu ia koe ki ni kofu foou. 5Nee au ui leva: Ke hili ki tona ulu he pale maa! Pea nee natou hili leva he pale maa ki tona ulu, pea nee natou tui leva kia ia ni kofu. Nee tuu i ai te aselo a te Eteleno.
6Pea nee fai leva e te aselo a te Eteleno te fakapapau aeni kia Sosue, o ui: 7E folafola te Eteleno o te atu fua tau, o ui: Kapau e ke haele i oku ala, pea kapau e ke tauhi aku fakatotonu, e ke fakamaaui anai toku fale pea e ke tauhi anai oku lotoa tapu, pea e au tuku anai kia koe ke ke ulu faifaitaliha kia natou ae e nonofo i heni. 8Koia fakalogo mai Sosue, tagata faisakilifisio lahi, ia koe mo ou kaumea ae e felalai i ou mua! – Koteuhi ko ni tagata ae ka liliu anai ko ni fakailoga. – Koeni, e au aumai anai taku tagata faifekau, te pulapula. 9Koteuhi koeni, kua au fakatuu he foi maka ia mua o Sosue; pea e i ai ni foi mata e fitu i te foi maka aena e tahi; e au togi anai i ai, e au totonu, te mea ae e tonu ke togi i ai, e folafola te Eteleno o te atu fua tau, pea e au too anai te agahala a te fenua aeni, i he aho e tahi. 10Koteuhi e folafola te Eteleno o te atu fua tau, o ui: I te aho aia e koutou fefakaafeaki anai i lalo o te vite pea mo lalo o te fiki.
Currently Selected:
SAKALIA 3: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
