NAUME 3
3
Tupuaga o te maumaui o Ninive
1Malaia ki te kolo pani toto,
Ae kua fonu i te loi, kua fonu i te agamalohi,
Ae e mole toe gata tana kaihaa!…
2E logo ki te patato o te suipi,
Ki te gugulu o te u teka o te u saliote,
Ki te patato o te lele o te u hosi,
Ki te gugulu o te u saliote tau.
3Kua oho te u tagata heka hosi, kua tapa te heleta, kua tapa gigila te tao o hage ko he hila…
Mole kei ma lau te u mate!…
Kua haele i oluga te u mate!…
4O tupu ko te lahi o te u faiaga a te fafine faiaga,
Ae nee poto i tona teuteui ke matalelei,
Ae nee ina fakapopulai te atu puleaga aki ana faiaga
Pea mo te atu hahai aki ana kaka.
5Koeni, e au mamafa kia koe, e folafola te Eteleno o te atu fua tau,
E au huei anai ou tapai kofu o kaku ki ou mata,
E au fakaha anai tou telefua ki te atu puleaga,
Pea mo tou ufiufi ki te atu puleaga hau.
6E au laku anai kia koe ni uli,
E au ulihi anai ia koe,
E au fakatuu anai ia koe ko he mea ke sioi.
7Ko natou fuli ae e sisio anai kia koe e feholaki anai o mamao ia koe.
Pea e ui anai: Kua maumau ia Ninive!
Ko ai e tagi anai kia ia?
E mau anai i fea ni ihi ke natou fakapelepelei ia koe?
8Ninive, pe e ke lelei age i No-Amoni,
Ae nee hekaheka i lotomalie o te u vaitafe,
Ae nee takatakai e te atu vai,
Ae nee puipui e te tai,
Ae nee kaupa malohi ki te tai?
9Nee fai tona malohi e Etiopia mo Esipito ae nee kaugamalie ona hahai,
Pea nee tokoni kia ia ia Puti mo te kau Lipia.
10Kae logo ai te mea aia, kua alu ia ia ki he fenua kehe,
Kua ave ia ia ki te popula;
Kua laliki ana fanau i te u tafatafa o te u ala fuli;
Kua vahe ona aliki,
Kua hai ona pule tau fuli aki ni seini.
11Ko koe foki, Ninive, e ke konahia anai, e ke nono anai;
Ko koe foki, e ke kumi anai he nonoaga i te fili.
12Ko ou kolo tau fuli e tatau
Mo ni tafito fiki mo ni fua kua momoho;
Ka luui natou,
E natou maluluku ki te gutu o ae e fia kai kia natou.
13Koeni, ko tau hahai, ko ni fafine i lotomalie o ou;
Kua ava te u matapa o tou fenua ki ou fili;
Kua tutu e te afi te u ukamea fakamau o ou matapa.
14Ohu he vai ki te tau!
Fakamalohii ou kolo tau!
Ulu ki te pela, malamalaki te kele pupulu!
Toe fakatuu te gutuumu fau piliki!
15I hena, e kai anai ia koe e te afi,
E tuusi anai ia koe e te heleta,
E ina kai anai ia koe o hage ko ni hee.
Ke ke fakatuuga o hage ko ni hee!
Ke ke fakatuuga o hage ko ni hee!
16Ko au tagata faikoloa, ae e kaugamalie age
I te u fetuu o te lagi,
E hage ko te hee ae e ina avahi ona pakakau o lele.
17E hage ou aliki ko te u hee,
E hage ou pule tau ko he ao hee,
Ae e hifo ki te u a akau i te temi o te momoko:
Ka ha te laa, e natou felelei,
Pea e mole toe iloi te kogamea ae nee natou nonofo ai.
18E tulemoe au tagata tauhi manu, hau o Asilia,
E malolo au tagata tau malohi;
Kua mavetevete tau hahai i te atu mouga,
Pea e mole he tahi e ina fakatahii ia ia.
19E mole he faitoo ki tou lavea,
E mateia tou matai lavea.
Ko natou fuli ae e logo anai ki te palalau kia koe
E pasipasi anai onatou nima kia koe;
Koteuhi ko ai ae nee mole kaku ki ai tau agakovi?
Currently Selected:
NAUME 3: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
