NAUME 2
2
Logo fakafiafia
1Koeni i oluga o te u mouga
Te u vae o te tagata avelogo ae e ina fakaha te tokalelei!
Suta, fai ou aho lalahi, fakahoko au fakapapau!
Koteuhi e mole toe alu anai te tagata agakovi i lotomalie o ou,
Kua motuhi osi ia ia…
2Kua haele te tagata maumau kia koe, Ninive.
Taupau te kolo tau!
Leoleo te ala! Teuteu te tau!
Tanaki tou malohi katoa!…
3Koteuhi e toe fakatuu e te Eteleno te kololia o Sakopo
Pea mo te kololia o Iselaele,
Koteuhi nee kaihaa natou e te kau kaihaa,
Pea nee natou maumaui te u tafito vite.
4Kua kula te u paletau o ana tagata toa,
Kua kofu kula te u tagata tau.
Kua ha te u saliote mo te ukamea ae kua gigila,
I te aho ae nee ina fakatuutuu ki te tau,
Pea kua hiki te u tao.
5Kua feohofi te u saliote i te u ala,
Kua natou felelei ki te u lapalasi o te u kolo;
I te sio kia natou, kua natou hage ko ni uloi afi,
E natou felelei o hage ko ni hila.
6E manatu te hau o Ninive ki ana kau tagata toa,
Kae e natou fetokai i tanatou haele.
Kua fakavilivili ki te u kaupa,
Pea kua teuteu ki te tau.
7Kae fokifa kua ava te u matapa o te u vaitafe lalahi,
Pea kua holo te fale hau!
8Kua osi ia ia: Kua telefua ia Ninive, kua ave ia ia.
Kua tagi laulau ana fafine faifekau o hage ko ni lupe,
Pea kua natou pa onatou fatafata.
9Nee hage ia Ninive i te temi mua ko he foi tane nee fonu i te vai;
Kae koeni kua mafaa ia ia, pea kua natou feholaki…
Koutou tutuu! Koutou tutuu!…
Kae e mole toe mafuli he tahi…
10Koutou kaihaa te siliva! Koutou kaihaa te aulo!
E i ai ni koloa hee osi,
Ni koloa mauhiga kehekehe.
11E kaihaa, e maumaui, e fetuku!
Pea kua gaegae te u loto,
Kua mapelu te u tuli ki lalo,
Kua mamahi te u ifiifi,
Kua fakapoopootetea te u mata.
12Kua feafeai te nofoaga aena o te u laione,
Te kogamea ae e olo ki ai te laione tagata, mo te laione fafine, pea mo te uhii laione,
Pea e mole toe fakafihi he tahi kia natou?
13Nee hae e te laione tagata ki ona uhi,
Pea nee ina tamatei ki ana laione fafine;
Nee ina fakafonu ona ana aki te u meakai Pea mo ona nofoaga aki te u mate.
14Koeni, e au mafasia kia koe, e ui e te Eteleno o te atu fua tau:
E au fakaliliu anai au saliote tau o lefulefu,
E kai anai e te heleta ou uhii laione,
E au taaki anai tau meakai mai te fenua,
Pea e mole toe logo anai ki te leo o au tagata faifekau.
Currently Selected:
NAUME 2: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
