HAPAKUKE 1
1
Ko te tagi a Hapakuke
1Ko te folafola kikite nee fakaha ki te polofeta ko Hapakuke.
2E kaku anai ki afea, oi Eteleno?… Nee au tagi,
Kae e mole ke fakalogo mai!
Nee au kalaga kia koe o tupu ko te agamalohi,
Kae e mole ke tokoni mai!
3Kotea e ke fakasio ai au ki te agakovi,
Pea e ke sio ai ki te hee faitotonu?
Kotea e tuu ai te fakataga mo te fakamalohi i oku mua?
I te u kogamea fuli, e malaga ake ni fakamaau mo ni ke.
4Koia e mole kei mauli ai te lao,
E mole kei malohi ai te faitotonu:
Koteuhi kua malo te tagata agakovi i te tagata faitotonu,
Pea kua halahala te u fakamaau.
Fakaha o te tautea o Suta
5Koutou haga okotou mata ki te atu puleaga, pea koutou sisio,
Pea koutou punamauli, pea koutou matataku!
Koteuhi e au fai anai he gaue i tokotou temi,
Ae e mole koutou tui anai ki ai moka fakamatala ia ia.
6Koeni, e au lagai anai te kau Kaletea,
He hahai itaita mo malolohi,
Ae e haele i ni fenua lalahi o too ni nofoaga o ni ihi.
7Ko he hahai mamalu mo fakamatakutaku;
E fakalogo pe ia ia kia ia mo tona malohi.
8E gaholo age ana hosi i te u leopale*,
Pea e natou makamu age i te u lupo o te afiafi.
E haele ana tagata heka hosi i te fiamealahi,
E omai ana tagata heka hosi mai mamao,
E natou felelei o hage ko te akuila ae e oho ki tana meakai.
9E omai te hahai katoa aia ki te kaihaa.
E sio ona mata manumanu ki mua,
Pea e ina fakatahii ni kau pilisoni o hage ko te one.
10E kata ia ia ki te u hau,
Pea e nukinuki ia ia ki te u pule.
E kata ia ia ki te u kolo tau fuli,
E ina fakatuuga ni kele, pea e ina too natou.
11Pea e ina liuga lua tona malohi,
E ina hoko atu tana haele, pea e asilisili age tana agahala.
Ko tona malohi o ona, koena tona atua!
12Pe e mole ke afio mai te heegata,
Eteleno, toku Atua, toku Sagato?
E mole matou mamate anai!
Oi Eteleno, nee ke fakanofo te hahai aeni ke ina fai au fakamaauaga;
Oi toku utu, nee ke lagai ia ia ke ina tuku au tautea.
13E maa osi ou mata ke sio ki te kovi,
Pea e mole feala ke ke sio ki te agakovi.
Kotea e ke sio ai anai ki te kau agatuu, pea ke fakaheeheegu anai,
Kae lolotoga kai e te tagata agakovi ia ia ae e agatonu age ia ia?
14Pe e ke fai anai ki te tagata o hage ko te u ika o te tai,
O hage ko te manu totolo ae e mole hona pule?
15E ina toho ake natou fuli aki te matau,
E ina aumai natou ki tona kupega,
E ina tanaki natou ki ana kenu.
Koteuhi e lahi anai tona fiafia mo tona nekenekea ia natou.
16Koia e ina momoli ai ni sakilifisio ki tona kupega,
E ina tutu he iseso aki ana kenu;
Koteuhi e ina mau ni meakai gako mo kano lelei i te u mea aia.
17Pe e gata anai afea tana toho tona kupega?
Pe e gata anai afea tana tamatei kovii te atu puleaga?
Currently Selected:
HAPAKUKE 1: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
