HAPAKUKE 2
2
Te tui malohi a Hapakuke
1Nee au nofo i toku nofoaga,
pea nee au tuu i oluga o te tule;
Nee au alaala, ke sio ki te mea ae e fakaha mai anai kia au e te Eteleno,
Pea mo te mea ae e au tali anai i te osi o taku tagi.
2Nee palalau mai leva te Eteleno kia au, o ui:
Tohi te folafola fakakikite:
Togi ia ia i ni laupapa, o tupu ke lau tuumau ia ia.
3Koteuhi ko he folafola kikite ae kua osi tona temi i te fakatuutuu,
E haele ia ia ki tona fakahoko, pea e mole loi anai ia ia;
Kapau e tuai ia ia, talitali ki ai,
Koteuhi e hoko anai ia ia,
E hoko mooni anai ia ia.
4Koeni, nee makita tona laumalie, e mole totonu ia ia i tona loto;
Kae e mauli anai te tagata agatonu i tana tui.
Fakamaaui o te tagata fakataga
5Tatau mo ae e kona mo matasoka,
E mole feala ke fimalie te tagata fiamealahi;
E ina avahi laulahi tona gutu o hage ko te nofoaga o te kau mate,
E mole makona ia ia i he temi o hage ko te mate,
E ina aumai kia ia te atu puleaga fuli,
E ina fakatahii ki ona tafa te u hahai fuli.
6Pe e mole liliu anai ia ia ki te hahai fuli ko ni mea fakakatakata,
Mo he mea nukinuki mo he mea fakaofolele?
E ui anai:
Malaia ki te tagata ae e ina fakatuuga te u mea ae e mole ko ni ana mea!
E kaku anai ki afea?…
Malaia ki te tagata ae e ina fakatuuga ona maua!
7Pe e mole malaga fakapunamauli ake anai natou ae e ke tuu maua ki ai?
Pe e mole alaala ake anai natou ae nee ke popula ki ai?
Io, e ke liliu anai ko tanatou meakai.
8O tupu nee ke kaihaa ni puleaga kaugamalie osi,
E kaihaa anai ia koe e te toega fuli o te hahai;
Koteuhi nee ke liligi te toto o ni tagata,
Nee ke fai ni agamalohi i te fenua,
Ki te kolo mo tana hahai katoa.
9Malaia ki ae e ina tanaki ki tona fale ni totogi kaihaa,
O tupu ke fakatuu tona fatai i he kogamea maoluga,
Ke hao ai mai te nima o te malaia!
10Ko te matagafua aena o tou fale totonu aena kua ke fakatuu,
I tau maumaui ni hahai kaugamalie,
Pea ko koe totonu ae kua ke agahala ki ai.
11Koteuhi e kalaga te maka i lotomalie o te kaupa,
Pea e tali ki ai te akau ae e ina fakahohoko te kanofale.
12Malaia ki ae e ina fakatuu he kolo aki te toto,
Ae e ina fakatuu he kolo aki te agakovi!
13Koeni, kua fakapapau te Eteleno o te atu fua tau:
E gaue te hahai ki te afi,
E kinakina noa te atu puleaga.
14Koteuhi e fonu anai te kele i te iloilo o te kololia o te Eteleno,
O hage ko te takele o te moana ae e fonu i te vai ae e ina uufi ia ia.
15Malaia ki ae e ina fakainu tona oloi,
Kia koe ae e ina liligi tau hina vino ke fakainu ai ia ia ke kona,
O tupu ke sio ki tona telefua!
16E ke makona anai i te ufiufi o lahi age i te kololia;
Ke ke inu foki mo koe totonu, pea ke ke nofo telefua!
E maliu anai kia koe te ipu o te nima matau o te Eteleno,
Pea e ulihi anai tou kololia e te ufiufi.
17Koteuhi e to anai kia koe te u agamalohi ae nee fai ki Lipane,
Pea e fakamatakutakui anai ia koe e te u maumau o te u manu,
O tupu nee ke liligi te toto o ni tagata,
Pea nee ke fai ni agamalohi i te fenua,
Ki te kolo mo tana hahai fuli.
18Kotea te aoga o he fakatata togi, ke tupu ai tona ta e he tagata tufuga?
Kotea te aoga o te fakatata ukamea haka ae e ina ako te loi,
Ke tupu ai te tuku e te tagata tana falala kia ia,
Kae ko te mooni e ina lolotoga fau ni taulaatua gutu mate?
19Malaia ki ae e ui ki te akau: Tuu ki oluga!
Ki he foi maka gutu mate: Alaala!
Pe e ina fakaha anai he mea?
Koeni, e teuteui ia ia aki te aulo mo te siliva,
Kae e mole mau ia ia he laumalie ae e ina fakamauli ia ia.
20E nofo te Eteleno i tona fale tapu maonioni.
Ke fakalologo te kele katoa i ona mua!
Currently Selected:
HAPAKUKE 2: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
