EKESOTE 4
4
Te mataku a Moisese
1Pea nee tali leva e Moisese: Koeni, e mole natou tui anai kia au, pea e mole natou fakalogo anai ki toku leo. Kae e natou ui anai: Nee mole ha te Eteleno kia koe.
2Pea nee ui leva e te Eteleno kia ia: Kotea i tou nima? Pea nee ina tali leva: Ko he tokotoko. 3Pea nee ui leva e te Eteleno: Li te tokotoko ki te kele. Pea nee li leva ia e Moisese ki te kele, pea nee liliu leva te tokotoko ko he gata. Pea nee hola leva ia Moisese i ona mua. 4Pea nee ui leva e te Eteleno kia Moisese: Faoi tou nima, o too ia ia i tona hiku. Pea nee ina faoi leva tona nima o too ia ia; pea nee toe liliu leva te gata ko he tokotoko i tona nima. 5Nee ui leva e te Eteleno: Koena te mea ae e tonu ke ke fai, ke natou tui anai nee ha kia koe te Eteleno, te Atua o anatou tamai, te Atua o Apalahamo, te Atua o Isaake, te Atua o Sakopo.
6Nee toe ui leva e te Eteleno kia ia: Hili tou nima ki tou fatafata. Pea nee ina hili leva tona nima ki tona fatafata; pea nee ina toe too ake leva tona nima, pea koeni, kua kilia katoa tona nima, pea kua hihina katoa ia ia o hage ko te nive. 7Nee ui leva e te Eteleno: Toe hili tou nima ki tou fatafata. Pea nee ina toe hili tona nima ki tona fatafata; pea nee ina too ake leva tona nima mai tona fatafata, pea koeni, kua toe liliu ia ia o tatau mo tona kakano. 8Pea nee ui leva e te Eteleno: Kapau e mole natou tui anai kia koe, pea kapau e mole natou fakalogo anai ki te leo o te uluaki fakailoga, kae e natou tui anai ki te leo o te fakailoga fakamuli. 9Pea kapau e mole natou tui anai ki te u fakailoga aena e lua, pea kapau e mole natou fakalogo ki tou leo, e ke too anai he vai mai te vaitafe, pea ke liligi anai ia ki te kele, pea e liliu anai te vai aia ko he toto i te kele.
10Nee ui leva e Moisese ki te Eteleno: Oi toku Aliki, e mole ko he tagata au ae e palalau faigafua, pea e mole pe ko he mea mai anaafi, pe ko te aho ae atu, pe ko te aho ae nee ke kamata palalau ai ki tau tagata faifekau; koteuhi e vale toku gutu mo toku alelo. 11Nee ui leva e te Eteleno kia ia: ko ai nee ina fakatupu te gutu o te tagata? Pea ko ai e ina fakaliliu te tagata o gutu mate, mo tuli, mo sio pee kivi? Pe e mole ko au ae ko te Eteleno? 12Ke ke alu, e au nofo anai mo tou gutu, pea e au ako anai kia koe te mea ae e tonu ke ke fakaha. 13Nee ui leva e Moisese: Oi toku Aliki, e au kole atu kia koe ke ke fekau he tahi ake ae e ke loto anai ki ai. 14Pea nee ita leva te Eteleno kia Moisese, o ui: Pe e mole ko tou tehina ia Alone, te tagata Levi? E au iloi e palalau faigafua ia ia. Pea koeni ia ia totonu e hau kia koe; pea ka sio anai ia ia kia koe, e fiafia anai ia i tona loto. 15E ke palalau anai kia ia, pea e ke tuku anai au palalau ki tona gutu, pea ko au e au nofo anai mo tou gutu pea mo tona gutu, pea e au ako anai kia kolua te mea ae e tonu ke kolua fai. 16E ina fakahoko anai au palalau ki te hahai; pea e liliu anai ia ia kia koe ko tou gutu, pea e ke liliu anai kia ia ko te fakafofoga o te Atua. 17Too i tou nima te tokotoko aena, ae e ke fai anai ki ai te u fakailoga.
Liliu a Moisese ki Esipito
18Nee alu leva ia Moisese; pea nee liliu leva ia ia kia Setelo, tana tamai, pea nee ina ui leva kia ia: E au kole atu kia koe, ke ke tuku mai au ke au alu o fakafelavei ki oku tehina ae e nonofo i Esipito, o sio pe kei natou mauuli. Nee ui leva e Setelo kia Moisese: alu i te tokalelei.
19Nee ui leva e te Eteleno kia Moisese, i Matiane: alu, o toe liliu ki Esipito, koteuhi kua mamate natou fuli ae nee natou kumi ki tou mauli. 20Nee too leva e Moisese tona ohoana mo ona foha, o fakaheka natou ki ni asino, pea nee toe liliu leva ia ia ki te fenua o Esipito. Nee ina too i tona nima te tokotoko o te Atua. 21Nee ui leva e te Eteleno kia Moisese: E ke toe liliu anai ki Esipito, sio, kua au tuku te u mea fakamanamana kehekehe ki tou nima: E ke fai anai natou ia mua o Falaone. Pea ko au, e au fakafefeka anai tona loto, pea e mole ina tuku anai te hahai ke olo. 22E ke ui anai kia Falaone: E palalau te Eteleno, o ui: Ko toku foha ia Iselaele, taku uluaki. 23E au ui atu kia koe: Tuku toku foha ke alu, o tupu ke tauhi ia ia kia au; kapau e ke fakafisi ke tuku ia ia ke alu, pea e au tamatei anai tou foha uluaki.
24I te lolotoga o tona fagona, i he kogamea ae nee moe ai leva ia Moisese i te pouli, nee ohofi leva ia ia e te Eteleno, pea nee loto leva ia ia ke tamatei ia Moisese. 25Kae nee too leva e Sefola he foi maka masila, o tuusi ai te moi kili o tona foha, o li ia ia kia vae o Moisese, o ui: Ko koe ko he ohoana o te toto kia au! 26Pea nee tuku leva e te Eteleno ia Moisese. Pea nee ui leva e te fafine: Ohoana o te toto! O tupu ko te silikosisio.
27Nee ui leva e te Eteleno kia Alone: Alu i te toafa kia mua o Moisese. Pea nee alu leva ia Alone; pea nee felavei leva ia ia mo Moisese i te mouga o te Atua; nee uma leva ia ia kia Moisese. 28Pea nee fakaha leva e Moisese kia Alone te u folafola fuli a te Eteleno, ae nee ina fekaui ia ia, mo te u fakailoga fuli ae nee ina fakatotonu ke fai. 29Nee hoko atu leva te fagona o Moisese mo Alone, pea nee na fakatahii leva te kau matua fuli o te u fanau o Iselaele. 30Pea nee fakaha leva e Alone te u folafola fuli ae nee tuku e te Eteleno kia Moisese, pea nee ina fakahoko leva te u fakailoga fuli ia mua o te hahai. 31Pea nee tui leva te hahai. Nee natou iloi leva kua ahiahi te Eteleno ki te u fanau a Iselaele, pea kua sio ia ia ki tonatou mamahi; pea nee natou tulolo leva ki te kele, o fakafetai.
Currently Selected:
EKESOTE 4: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
