EKESOTE 3
3
Te ulu vao kakaha; paui o Moisese
1Nee fafaga e Moisese te faga manu o tana tamai, te tagata faisakilifisio o Matiane; pea nee ina ave leva te faga manu ki muli o te toafa, pea nee kaku leva ia ia ki te mouga o te Atua, i Olepe. 2Nee ha leva te aselo a te Eteleno kia ia i he ulo mo he afi, i lotomalie o he kii ulu vao. Nee sio leva ia Moisese; pea koeni, nee ulo te ulu vao katoa, kae nee mole osiosi ia.
3Nee ui leva e Moisese: E au loto mua ke au afe o sio pe kotea te mea fakapunamauli aeni, pe kotea e mole osiosi ai te ulu vao. 4Pea nee sio leva te Eteleno kua afe ia Moisese ke sio; pea nee paui leva te Atua mai loto o te ulu vao, o ui: Moisese! Moisese! Pea nee tali leva e Moisese: Koeni au! 5Nee ui leva e te Atua: Aua naa ke fakaovi mai ki heni, too ou sulie mai ou vae, koteuhi ko te kogamea aeni e ke tuu ai ko he kele taputapu ia. 6Pea nee ina toe hoko atu leva: Ko te Atua au o tau tamai, ko te Atua o Apalahamo, ko te Atua o Isaake, pea ko te Atua o Sakopo. Pea nee uufi leva e Moisese ona mata, koteuhi nee mataku leva ia i te sio ki te Atua.
7Nee ui leva e te Eteleno: Kua au sio ki te mamahi o taku hahai i Esipito, pea kua au logo ki anatou tagi o tupu ko tonatou gaohi kovii e onatou pule; pea e au iloi onatou mamahi. 8Kua au hifo mai o fakamauli natou maia nima o te kau Esipito, mo fakamavae natou mai te fenua aena ki he fenua lelei mo laulahi, ki he fenua ae e tafe ai te hua huhu mo te meli, ki te fenua ae e nonofo ai te kau Kanaane, mo te kau Eti, mo te kau Amole, mo te kau Felesi, mo te kau Evi, pea mo te kau Sepusi. 9Koeni, kua kaku mai te u tagi a Iselaele kia au, pea kua au sio ki tonatou fakatagai e te kau Esipito. 10Koia, i te aho nei, e au fekau anai ia koe ke ke alu kia Falaone, pea e ke fakamavae anai mai Esipito taku hahai, te u fanau a Iselaele.
11Nee ui leva e Moisese ki te Atua: Ko ai ia au, ke au alu kia Falaone, pea ke au fakamavae mai Esipito te u fanau a Iselaele? 12Nee ui leva e te Atua: E au nofo anai mo koe; pea koeni te fakailoga kia koe ko au ae e ina fekaui ia koe: I te osi anai o tau fakamavae te hahai mai Esipito, e kotou atolasio anai kia au i te mouga aeni.
Gaue a Moisese
13Nee ui leva e Moisese ki te Atua: E au alu anai ki te u fanau a Iselaele, pea e au ui anai kia natou: Ko te Atua o akotou tamai e ina fekaui mai au kia koutou. Kae, kapau e natou fehui mai anai kia au pe ko ai tona higoa, kotea anai taku tali kia natou? 14Nee ui leva e te Atua kia Moisese: Ko au ko ia ae e afio. Pea nee ina toe hoko atu: E fenei anai tau tali ki te u fanau a Iselaele: Ko ia ae e higoa «ko Au» nee ina fekaui mai au kia koutou. 15Nee toe ui foki e te Atua kia Moisese: E ke palalau anai ki te u fanau a Iselaele, o ui: Ko te Eteleno, te Atua o akoutou tamai, te Atua o Apalahamo, te Atua o Isaake, pea ko te Atua o Sakopo, e ina fekaui mai au kia koutou. Koena toku huafa ki te heegata, koena toku huafa ki te taitupu mo te taitupu. 16Ke ke alu, pea ke fakatahii te kau matua o Iselaele, pea e ke ui anai kia natou: Ko te Eteleno, te Atua o akotou tamai, te Atua o Apalahamo, mo Isaake, mo Sakopo, nee ha mai kia au. Pea nee ina ui mai: Kua au sio kia koutou, pea kua au sio ki te mea ae e fai kia koutou i Esipito, 17pea kua au ui: E au fakamavae anai koutou mai Esipito, mai te kogamea ae e kotou mamahi ai, pea e au ave anai koutou ki te fenua o te kau Kanaane, mo te kau Eti, mo te kau Amole, mo te kau Felesi, mo te kau Evi, mo te kau Sepusi, ki he fenua ae e tafe ai te hua manu mo te meli. 18E natou fakalogo anai ki tou leo; pea e ke alu anai, ia koe mo te kau matua o Iselaele ki te hau o Esipito, pea e koutou ui anai kia ia: Ko te Eteleno, te Atua o te kau Hepeleo, nee ha mai kia matou. Fakagafua mai ke matou olo o haele i ni aho e tolu i te toafa, o momoli ai ni sakilifisio ki te Eteleno, tomatou Atua. 19E au iloi e mole tuku anai koutou e te hau o Esipito ke kotou olo, mo kapau e mole fafa anai he nima malohi kia ia. 20E au faoi anai toku nima, pea e au tauteai anai Esipito aki te u mea fakamanamana kehekehe ae e au fakahoko anai i te fenua. I te osi anai o te u mea aia, e ina tuku anai ke kotou olo. 21E au toe fakagafua anai ki te kau Esipito, ke natou fai ni meaofa ki te hahai: koia i te aho ae e kotou mavae ai anai, e mole kotou mavae atea anai. 22E kole anai e te fafine taki toko tahi o Iselaele ki te fafine o Esipito ae e nofo i tona fale pe i ona tafatafa ni ipu siliva, mo ni ipu aulo, pea mo ni kofu, pea e kotou fakaamo anai natou ki okotou foha mo okotou ofafine. Pea e kotou fakamasivai anai te kau Esipito.
Currently Selected:
EKESOTE 3: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
