EKESOTE 5
5
Fakafehagai a Falaone
1Nee olo leva ia Moisese mo Alone kia Falaone, o ui kia ia: Koeni te folafola a te Eteleno, ko te Atua o Iselaele: Tuku ke olo taku hahai, ke natou fai he aho fakafiafia kia au. 2Nee tali e Falaone: Ko ai te Eteleno ke au fakalogo ki tona leo, pea ke au tuku ke alu ia Iselaele? E mole pe au iloi te Eteleno, pea e mole au tuku anai ke alu ia Iselaele. 3Nee na ui leva: Kua ha mai te Atua o te kau Hepeleo kia maua. Fakagafua mai ke matou fai ni aho haele e tolu i te toafa, pea ke matou momoli ni sakilifisio ki te Eteleno, o tupu ke aua naa ina tauteai matou aki te taimahaki mo te heleta. 4Pea nee ui leva e te hau o Esipito kia naua: Moisese mo Alone, kotea e kolua taofi ai te gaue a te hahai aeni? Kotou olo ki akotou gaue.
5Nee ui leva e Falaone: Koeni, kua kaugamalie osi te hahai aeni i te fenua, pea e kolua taofi anai tana gaue! 6I te aho pe aia, nee tuku leva e Falaone te fakatotonu aeni ki te kau pule o te hahai mo te kau pule gaue: 7E mole kotou toe foaki anai he luna moamoa ki te hahai ke fai ai te u piliki o hage ko mua atu; kae ke natou olo totonu anai o tae luna moamoa. 8E kotou fakamaua anai kia natou te lahi o te piliki ae e natou fai mahani, e mole kotou toe too anai he mea, koteuhi ko te kau pipiko ia natou; koia ae e natou kalaga ai, o ui: Tou olo o momoli ni sakilifisio ki totatou Atua! 9Ke fakalahi ni gaue ki te hahai aena, ke natou maua ai, pea e mole natou toe tokaga anai ki ni palalau noa.
10Pea nee olo leva te kau pule o te hahai mo te kau pule gaue, o ui ki te hahai: Koeni te palalau a Falaone: E mole au toe foaki anai kia koutou he luna moamoa; 11ke koutou olo, koutou totonu, o tae mai hakoutou luna moamoa mai te kogamea ae e koutou mau ai anai ia ia, koteuhi e mole toe too anai he mea i takotou gaue. 12Nee mafolafola leva te hahai i te fenua katoa o Esipito, o tae kaui fulumeto moamoa o fetogi ai te luna moamoa. 13Nee ekenaki kovii natou e te kau pule gaue, o ui: Kotou fai ke osi lelei te gaue o te aho, o hage ko te temi ae nee mau ai te luna moamoa. 14Nee toe ta foki te kau pule gaue o te u fanau a Iselaele, ae nee fakanofo e te kau pule a Falaone; nee natou ui leva: Kotea nee mole katoa ai anafi mo te aho nei o hage ko te mahani, te u piliki ae nee tonu ke kotou fau?
15Nee olo leva te u pule gaue o te u fanau a Iselaele o tagi kia Falaone, o ui kia ia: Kotea e ke gaohi feiai ai au tagata faifekau? 16E mole kei foaki he luna moamoa ki au tagata faifekau, pea kua ui mai kia matou: Kotou fai ni piliki! Pea koeni, e toe tamatei foki au tagata faifekau, o hage la kua fai e tau hahai he hala. 17Nee tali leva e Falaone: Ko ni kau pipikoelo ia koutou, ko ni kau pipikoelo! Koia ae e kotou ui ai: Tou olo o momoli ni sakilifisio ki te Eteleno! 18Ke kotou olo nei o gaue; E mole toe foaki atu anai kia koutou he luna moamoa, kae ke kotou fai ke katoa te piliki o hage ko te mahani.
19Nee sisio leva te kau pule gaue o te u fanau a Iselaele kua gaohi kovii natou, i te ui: E mole kotou too anai he mea pe e tahi i akotou piliki; e mole fetogi anai te gaue o te aho. 20Pea nee natou mavae leva mai te fale o Falaone, pea nee natou felavei leva mo Moisese mo Alone ae nee talitali kia natou. 21Nee natou ui leva kia naua: Ke sio mai te Eteleno kia kolua, pea ke ina fakamaaui! Kua kolua fakaliliu matou o fakalialia kia mata o Falaone mo ana tagata faifekau, pea kua kolua hili he heleta ki onatou nima ke tamatei ai matou.
22Nee toe liliu leva ia Moisese ki te Eteleno, o ui: Aliki, kotea kua ke fai ai te mea kovi ki te hahai aeni? Kotea nee ke fekaui mai ai au? 23Talu taku alu kia Falaone o palalau i tou huafa, mo tana gaohi kovii te hahai aeni, pea nee mole pe ke haofaki tau hahai.
Currently Selected:
EKESOTE 5: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
