EKESOTE 33
33
Fakamolemole a te Atua
1Nee ui leva e te Eteleno kia Moisese: Alu, mavae i heni, ia koe mo te hahai ae nee ke fakamavae mai te fenua o Esipito; hake ki te fenua ae nee au fakapapau ke foaki kia Apalahamo, mo Isaake, mo Sakopo, o ui: E au foaki anai te fenua ki tou hakoga. 2E au fekaui anai i ou mua he aselo, pea e au kapu anai te kau Kanaane, mo te kau Amole, mo te kau Eti, mo te kua Felesi, mo te kau Evi, mo te kau Sepusi. 3Hake ki te fenua aena ae e tafe ai te hua manu mo te meli. Kae e mole au hake anai i te lotomalie o ou, koteuhi ke aua naa au pulihi anai ia koe i te ala, koteuhi ko he hahai kia fefeka ia koe.
4I te logo leva a te hahai ki te u palalau fakamatakutaku aia, nee natou fetagihi leva; pea nee mole tui leva e he tahi ona mea fakateuteu. 5Pea nee ui leva e te Eteleno kia Moisese: Tala ki te u fanau a Iselaele: Ko he hahai kia fefeka koutou, kapau e au alu i he kii temi siisii pe i lotomalie o koutou, e au pulihi anai koutou. Koia ke kotou hui okotou mea fakateuteu, pea e au sio anai pe kotea te mea ae e au fai anai kia koutou. 6Nee vete leva e te u fanau a Iselaele onatou mea fakateuteu, pea nee natou fakamamao leva mai te mouga o Olepe.
Te falela o te felavei i tua o te nofoaga
7Nee hiki leva e Moisese te falela, o fakatuu ia tua o te nofoaga, o mamao i te nofoaga. Nee ina fakahigoa leva ia ko te falela o te felavei; pea ko natou fuli ae nee natou fia felavei mo te Eteleno nee olo leva ki te falela o te felavei ia tua o te nofoaga. 8Ka alu ia Moisese ki te falela, nee tutuu leva te hahai katoa ki oluga; nee tahi tuu te tagata ia mua o tona falela o sio kia Moisese, o kaku ki tana ulu ki te falela. 9Ka ulu ia Moisese ki te falela, nee hifo leva te pou ao, o tuu i te uluaga o te falela, pea nee palalau leva te Eteleno mo Moisese. 10Nee sisio te hahai katoa ki te pou ao ae nee tuu i te matapa o te falela, pea nee tutuu te hahai katoa ki oluga, o hu ia mua o onatou falela. 11Nee palalau leva te Eteleno mo Moisese o fehagaaki te u mata ki te u mata, o hage ko he tagata ae nee palalau mo tona kaumea. Pea osi, nee toe liliu leva ia Moisese ki te nofoaga; kae ko tana tagata faifekau tupulaga ko Sosue, foha o Nune, nee mole mavae leva ia mai loto o te falela.
Sio a Moisese ki te kololia o te Atua
12Nee ui leva e Moisese ki te Eteleno: Koeni, e ke ui mai kia au: Taki te hahai aeni! Pea e mole ke fakaha mai kia au pe ko ai ae e ke fekaui anai mo au. Kae kua ke ui: E au iloi ia koe i tou higoa totonu, pea kua ke ofa kia au. 13I te temi nei, kapau kua au mau tou ofa, fakaha mai kia au ou ala; pea e au iloi mooni anai ia koe, pea e au toe mau anai tou ofa. Ke aua naa galo kia koe ko te hahai aeni ko tau hahai totonu. 14Nee tali leva e te Eteleno: E au alu anai mo koe, pea e au foaki anai kia koe he maloloaga. 15Nee tali leva e Moisese: Kapau e mole ke haele ia koe totonu mo matou, pea ke aua naa ke fakamavae matou i heni. 16Kapau e mole ke haele ia koe totonu mo matou, pe e matou iloi feafeai anai kua ke ofa kia au mo tau hahai? Pe e mole ko te temi anai ae e ke haele ai anai ia koe totonu mo matou, pea e ke fakakehei ai anai au mo tau hahai i te u hahai fuli i oluga o te kele? 17Nee ui leva e te Eteleno kia Moisese: E au fai anai te mea ae e ke kole mai ki ai, koteuhi kua au ofa kia koe, pea e au iloi ia koe i tou higoa. 18Nee ui leva e Moisese: Fakasio au ki tou kololia! 19Nee tali leva e te Eteleno: E au haele anai i ou mua pea e au fakaha anai kia koe toku agalelei katoa, pea e au kalagai anai i ou mua te huafa o te Eteleno; e au foaki toku ofa ki ae e au ofa ki ai, pea e au manavaofa ki ae e au manavaofa ki ai. 20Nee ui leva e te Eteleno: E mole feala ke ke sio ki oku mata, koteuhi e mole feala ke sio te tagata kia au pea mauli. 21Nee ui leva e te Eteleno: Koeni he kogamea i oku tafa: E ke tuu anai i oluga o te utu. 22Ka fakalaka anai toku kololia, e au tuku anai ia koe ki he mafaa o te utu, pea e au uufi anai ia koe aki toku nima o kaku ki taku fakalaka. 23Pea ka au too anai toku nima, e ke sio mai anai kia au mai muli; kae e mole feala anai ke ke sio ki oku mata.
Currently Selected:
EKESOTE 33: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
