EKESOTE 34
34
Fakafoou o te hai mo Iselaele
1Nee ui leva e te Eteleno kia Moisese: Ta ni maka laulapa e lua o hage ko te u uluaki maka, pea e au tohi anai i ai te u folafola ae nee tuu i te u uluaki maka ae nee ke maumaui. 2Teuteu ki te uhu apogipogi, pea ke hake leva i te uhu ki te mouga o Sinai; e ke tuu anai i oku mua, i te tumutumu o te mouga. 3Ke aua naa hake anai he tahi mo koe, pea ke aua naa ha anai he tahi i te mouga katoa; pea ke aua naa kai anai ni ovi, mo ni pipi i te mouga aena. 4Nee ta leva e Moisese te u maka laulapa e lua o hage ko te u uluaki maka; pea nee tuu ake leva ia ia kei uhu, o hake ki te mouga o Sinai, o mulimuli ki te fakatotonu ae nee fai kia ia e te Eteleno, pea nee ina too leva i tona nima te u maka laulapa e lua.
5Nee hifo age leva te Eteleno i he ao, o tuu i ona tafa i te mouga, pea nee ina fakaha leva te huafa o te Eteleno. 6Pea nee alu leva te Eteleno i ona mua, o kalaga: Eteleno, Eteleno, Atua manavaofa mo lotoofa, mo kataki fualoa, mo mau koloa i te agalelei mo te agatonu, 7ae e ina taupau tona ofa o kaku ki te u taitupu e afe, ae e ina fakamolemole te agakovi, mo te logogataa, pea mo te agahala, kae e mole ina tukunoa ae e agahala, pea e ina fakatua te agakovi a te u tamai ki te u fanau mo te u mokopuna o kaku ki te tolu mo te fa taitupu.
Te vokasio foou
8I te lakaga pe aia, nee fakamapee leva ia Moisese ki te kele, o hu. 9Pea nee ina ui leva: Aliki, kapau kua au mau he kalasia i ou mua, pea ke haele te Aliki i te lotomalie o matou, koteuhi ko he hahai kia fefeka ia; fakamolemole ki amatou agahala mo amatou agakovi, pea ke too matou ko tou tofiga.
10Nee tali leva e te Eteleno: Koeni, e au fai anai he hai. E au fai anai ia mua o tau hahai katoa, ni mea fakamanamana ae nee heeki pe hoko i he fenua pee ko he puleaga; e sisio anai te hahai katoa aena e natou takatakai ia koe ki te gaue a te Eteleno, pea e fakamatakutaku anai te mea ae e au fakahoko anai kia koe. 11Tokaga ki te mea ae e au fakatotonu kia koe i te aho nei. Koeni, e au kapu anai i ou mua te kau Amole, mo te kau Kanaane, mo te kau Eti, mo te kau Felesi, mo te kau Evi, mo te kau Sepusi. 12Tokaga kia koe, ke aua naa ke fai he hai mo te u hahai o te fenua ae e tonu ke ke ulu ki ai, koteuhi e natou liliu anai ko he puleaki kaka kia koe. 13Kae e kotou maumaui anai onatou aletale, e kotou laliki anai anatou fakatata, pea e kotou tokatokahi anai anatou akau tapu. 14E mole ke punou anai ki he atua kehe; koteuhi e mau e te Eteleno te higoa ko finenonofo, ko he Atua finenonofo ia ia. 15Tokaga pe kia koe, ke aua naa ke fai he hai mo te hahai o te fenua, koteuhi ke aua naa ke tauhi ki onatou atua pea mo ke momoli ni sakilifisio kia natou, pea ke natou fakaafe anai ia koe, o ke kai anai ki anatou vikitima; 16koteuhi ke aua naa ke too onatou ofafine ki ou foha, pea ko onatou ofafine, ae e tauhi ki onatou atua, ke aua naa natou toho ou foha ke natou tauhi ki onatou atua. 17E mole ke fai anai kia koe he atua aki he ukamea kua haka.
18E ke tauhi anai te aho o te u pane hala fakatupu, i ni aho e fitu, i te temi ae kua fakatuutuu ki ai i te mahina ko Apipi: E ke kai anai ni pane hala fakatupu, o hage ko te mea ae nee au fakatotonu atu kia koe, koteuhi nee ke mavae i te mahina aia mai Esipito.
19Ko te u uluaki tupu fuli a aku, tatau mo te u uluaki manu tagata fuli i te faga manu, pee ko te u pipi, mo te u ovi, mo te u tao. 20E ke totogi anai ki he akeno te uluaki o te asino; pea kapau e mole ke totogi ia ia, e ke fasii anai tona kia. E ke totogi anai te u uluaki fuli o ou foha; pea e mole hau anai ki oku mua mo te u nima atea.
21E ke gaue anai i te u aho e ono, pea e ke malolo anai i te fitu aho, e ke malolo anai, tatau pe pee ko te temi gaue i te u gaueaga pee ko te temi tanaki o te u fua.
22E ke taupau anai te aho o te Penikosite, te aho o te temi tanaki o te u uluaki fua o te fulumeto pea mo te aho o te tanaki o te u fua i te fakaosi o te tau.
23E tua tolu i te tau, e fakatahi anai te u tagata fuli ia mua o te Aliki, te Eteleno, ko te Atua o Iselaele. 24Koteuhi e au kapu anai te u puleaga i ou mua, pea e au fakalahi anai tou fenua; pea e mole manumanu anai he tahi ki tou fenua, i te temi ae e ke hake ai anai kia mua o te Eteleno, tou Atua, o tua tolu i te tau.
25E mole ke momoli fakatahi anai mo he pane fakatupu te toto o te vikitima ae kua momoli mai kia au; pea e mole ke tuku anai te sakilifisio o te Pasikate mai te pouli ke kaku ki te uhu.
26E ke aumai anai ki te fale o te Eteleno, tou Atua, te u uluaki fua o te kele. E mole ke haka anai he uhii tao i te hua huhu o tana fae.
27Nee ui leva e te Eteleno kia Moisese: Tohi te u folafola aeni; koteuhi kua au fai te hai mo koe mo Iselaele, o mulimuli ki te u folafola aeni.
28Nee nofo leva ia Moisese mo te Eteleno i te kogamea aia i te u aho e fagofulu mo po e fagofulu. Nee mole ina kai leva he pane, pee nee ina inu he vai. Pea nee tohi leva e te Eteleno i te u maka te u folafola o te hai, te u folafola e hogofulu.
Gigila o te u mata o Moisese
29Nee hifo leva ia Moisese mai te mouga o Sinai, pea nee ina too leva i ona nima te u maka e lua o te hai; nee mole ina iloi leva kua gigila ona mata, koteuhi nee palalau ia ia mo te Eteleno. 30Nee sio leva ia Alone mo te u fanau fuli o Iselaele kia Moisese, pea koeni, kua gigila te kili o ona mata; pea nee natou matataku leva i te fakaoviovi age kia ia. 31Nee paui leva natou e Moisese: pea nee olo leva ia Alone mo te kau pule o te hahai kia ia, pea nee palalau leva ia ia kia natou. 32I te osi o te mea aia, nee fakaoviovi age leva te u fanau fuli o Iselaele, pea nee ina tuku leva kia natou te u fakatotonu fuli ae nee ina tali mai te Eteleno, i te mouga o Sinai. 33I te osi o te palalau a Moisese kia natou, nee ina puloui leva ona mata aki he kie. 34I te temi fuli ae nee ulu ai leva ia Moisese kia mua o te Eteleno o palalau kia ia, nee ina too leva te kie i ona mata, o kaku ki te temi ae nee mavae ai leva ia ia; pea ka ulu leva ia ia ki fafo, o fakaha ki te u fanau a Iselaele te mea ae nee fakatotonu age kia ia e te Eteleno. 35Nee sio leva te u fanau a Iselaele ki te u mata o Moisese, pea nee natou sio leva kua gigila ia ia; pea nee toe puloui leva e Moisese ona mata o kaku ki tana toe ulu o palalau mo te Eteleno.
Currently Selected:
EKESOTE 34: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
