EKESOTE 32
32
Te uhii pipi aulo
1I te sio a te hahai kua tuai te hifo mai a Moisese mai te mouga, nee natou fakatahi leva kia Alone, o ui kia ia: Tuu ki oluga o fai he atua ke haele i omatou mua, koteuhi ko Moisese, te tagata ae nee ina fakamavae matou mai te fenua o Esipito, e mole matou iloi tona aluaga. 2Nee ui leva e Alone kia natou: Kotou motuhi te u hoai hau aulo mai te u taliga o okotou ohoana, mo okotou foha, pea mo okotou ofafine, pea kotou aumai ia kia au. 3Pea nee natou too fuli leva te u hoai hau aulo ae nee pipiki i onatou taliga, o ave kia Alone. 4Nee too leva e Alone te u mea aia mai onatou nima, o laku natou ki he kulo, pea nee ina fai leva he fakatata ko he uhii pipi aki te aulo ae nee haka. Pea nee ui leva e te hahai: Iselaele! Koeni tou atua, ae nee ina fakamavae koe mai te fenua o Esipito. 5I te sio a Alone ki te mea aia, nee ina fakatuu leva he aletale i ona mua, pea nee kalaga leva ia ia: I apogipogi, e fai anai he aho lahi fakafiafia ki te Eteleno! 6I te aho ake ae, nee natou aala leva i te uhu pea nee natou momoli leva ni failaulau mo ni sakilifisio fakafetai. Pea nee felalai leva te hahai ki lalo o kakai mo iinu; pea nee natou tutuu ake leva ki oluga o fakafiafia.
Ita o te Eteleno ki Iselaele
7Nee ui leva e te Eteleno kia Moisese: Alu, hifo vave ki lalo, koteuhi ko tau hahai ae nee ke fakamavae mai te fenua o Esipito, kua natou fai ni mea fakalialia. 8Kua natou maliu fakavilivili mai te ala ae nee au fakaha kia natou; pea kua natou fai he uhii pipi aki te aulo haka, pea kua natou punou i ona mua, o momoli ki ai ni sakilifisio, pea kua natou ui: Iselaele! Koeni tou atua, ae nee ina fakamavae ia koe mai te fenua o Esipito. 9Pea nee ui leva e te Eteleno kia Moisese: E au sio ko te hahai aena ko he hahai kia fefeka. 10I te lakaga nei, aua naa ke taofi au; e mu anai toku hauhau kia natou, pea e au pulihi anai natou; kae e au fakaliliu anai ia koe ko he puleaga lahi.
Tagi a Moisese o uhiga mo Iselaele
11Nee tagi leva ia Moisese ki te Eteleno, tona Atua, o ui: Eteleno! Kotea e to anai tou hauhau ki tau hahai, ae nee ke fakamavae mai te fenua o Esipito aki tou malohi lahi mo tou nima malohi? 12Kotea e ui ai e te kau Esipito: Nee ina fakamavae natou o tupu ke natou malaia, ke tamatei natou i te u mouga, pea ke natou pupuli osi i te kele. Maliu mai tou ita lahi, pea ke fakahemala ki te kovi ae kua ke loto ke fai ki tau hahai. 13Manatui ia Apalahamo, mo Isaake, pea mo Iselaele, au tagata faifekau ae nee ke fakapapau totonu ki ai, o ke ui: E au liuliuga anai tokotou hakoga o hage ko te u fetuu o te lagi, e au foaki anai ki okotou hakoga te fenua katoa ae nee au palalau ki ai, pea e natou mau anai ia o heegata.
14Pea nee fakahemala leva te Eteleno ki te kovi ae nee ina fakaha, ae nee ina loto ke fai ki tana hahai.
Tautea o te kau agahala
15Nee toe liliu leva ia Moisese, pea nee hifo leva mai te mouga, mo te u maka e lua o te fakamooni ae nee ina too i tona nima; nee tohi te u maka i ona fahai e lua, io, nee tohi naua i te fahai ae mo te fahai ae. 16Nee fai te u maka e te Atua, mo te faitohi ko te faitohi totonu a te Atua, ae nee togi ki te maka. 17Nee logo leva ia Sosue ki te logoaa a te hahai ae nee taukalaga, pea nee ina ui leva kia Moisese: E i ai he kalaga tau i te nofoaga. 18Nee tali leva e Moisese: E mole ko he kalaga o te malo, pee ko he kalaga o te to; ko te mea ae e au logo ki ai, ko te logoaa a he hahai ae e hiva. 19I tana kaku leva ki te nofoaga, nee na sio leva ki te uhii pipi mo te u mako. Nee mu leva te hauhau o Moisese, pea nee ina siaki leva te u maka mai ona nima, o foa liki i lalo o te mouga. 20Pea nee too leva e Moisese te uhii pipi ae nee natou fai, o li ki te afi; pea nee ina fakaliliu leva ia ke lefulefu; pea nee ina laku leva te lefulefu aia ki te vai, pea nee ina fakainu leva te vai aia ki te u fanau a Iselaele.
21Nee ui leva e Moisese kia Alone: Kotea nee fai e te hahai aeni kia koe, ke ke tuku ai ke natou fai he agahala lahi fenei? 22Nee tali leva e Alone: Ke aua naa ita toku aliki! E ke iloi lelei e koe totonu, e higa vave te hahai aeni ki te kovi. 23Nee natou ui mai kia au: Fai mai kia matou he atua ae e haele i omatou mua; koteuhi ko Moisese, te tagata ae nee ina fakamavae matou mai te fenua o Esipito, e mole matou iloi tona aluaga. 24Nee au ui leva kia natou: Ko natou ae e natou mau he aulo, ke natou too o aumai kia au! Pea nee natou aumai leva ia kia au; pea nee au li leva te aulo ki te afi, pea nee mau leva mai ai te uhii pipi aeni.
25Nee sio leva ia Moisese kua telefua te hahai, pea nee tuku leva natou e Alone i te telefua aena, ke katai natou e onatou fili. 26Nee alu leva ia Moisese o tuu i te matapa o te nofoaga, o ui: Kia au natou ae e kau ki te Eteleno! Pea ko te u fanau fuli o Levi nee fakatahi age leva kia ia. 27Pea nee ina ui leva kia natou: Koeni te folafola a te Eteleno, te Atua o Iselaele: Kotou tahi too tana heleta i tona fahai; kotou folii katoa te nofoaga mai ae matapa ki ae matapa, pea kotou tahi tamatei tona tehina, tona kaiga. 28Nee fai leva e te u fanau o Levi te mea ae nee fakatotonu e Moisese; pea nee mamate leva ni toko tolu afe o te hahai i te aho aia. 29Nee ui leva e Moisese: Kotou fakatapui koutou i te aho nei ki te Eteleno, o tahi momoli e te tagata pee ko tona foha, pee ko tona tehina, o tupu ke foaki atu e te Eteleno kia koutou i te aho nei he tapuaki.
Tagi a Moisese ki te Eteleno
30I te aho ake ae nee ui leva e Moisese ki te hahai: Kua kotou fai he agahala lahi. E au hake i te lakaga nei ki te Eteleno: E lagi au mau anai te fakamolemole o takotou agahala. 31Nee toe liliu leva ia Moisese ki te Eteleno, o ui: Kua fai e te hahai aeni he agahala lahi. Nee natou fai he atua aulo kia natou. 32Fakamolemole i te aho nei tanatou agahala! Pea kapau e kailoa, holoi au i tau tohi ae kua ke tohi. 33Nee ui leva e te Eteleno kia Moisese: Ko te tagata ae nee agahala kia au, ko ia ae e au holoi anai i taku tohi. 34Alu, taki te hahai ki te kogamea ae nee au ui atu ki ai. Koeni, e haele anai taku aselo i ou mua, kae i te aho o toku lagavaka, e au tautea anai natou i tanatou agahala.
35Nee tautea leva e te Eteleno te hahai, koteuhi nee natou fai te uhii pipi aulo, ae nee fau e Alone.
Currently Selected:
EKESOTE 32: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
