EKESOTE 31
31
Tagata tufuga fonu i te Laumalie
1Nee palalau leva te Eteleno kia Moisese, o ui: 2Ke ke iloi kua au filifili ia Petesaleele, foha o Uli, foha o Ulu, mai te faahiga o Suta. 3Kua au fakafonu ia ia aki te Laumalie o te Atua, i te poto, mo te atamai, pea mo te malama i te u gaue fakatufuga kehekehe fuli. 4Kua au fakaliliu ia ia ke poto i te fakatupu o ni mea foou, pea mo te gauei o te aulo, mo te siliva, pea mo te sila, 5i te togi mo te fakapipiki o te u maka fakateuteu, i te gauei o te akau, pea mo te fai o te u gaue kehekehe. 6Pea koeni, kua au foaki kia ia he tokoni ko Oholiape, foha Ahisamake, mai te fahaiga o Tane. Kua au tuku he poto ki te u loto o te kau tagata tufuga fuli ke natou fai te u gaue fuli ae nee au fakatotonu atu kia koe: 7Te falela tapu, mo te aleka o te fakamooni, mo te nofoaga o te manavaofa ae e hili anai i oluga, pea mo te u mea gaue fuli o te falela; 8mo te laupapa mo ona mea gaue, mo te malama aulo maa mo ona mea gaue fuli, 9mo te aletale o te u kaloni; mo te aletale o te u failaulau mo ona mea gaue fuli; mo te tanoa sila mo tona tuuaga; 10mo te u kofu gaue, mo te u kofu tapu o te tagata faisakilifisio ko Alone, mo te u kofu o ona foha ki te gaue fakapelepitelo; 11mo te lolo pani tapu, pea mo te kaloni fakamagoni ki te sagatualio. E natou fai anai o fakatatau ki te u mea fuli ae nee au fakatotonu atu kia koe.
Fakamanatu o te sapato
12Nee palalau leva te Eteleno kia Moisese, o ui: 13Palalau ki te u fanau a Iselaele, pea ke ui kia natou: E kotou tokaga anai o tauhi fakamalotoloto aku sapato, koteuhi ko te fakailoga aena ke tuumau ia koutou mo au pea mo okotou hakoga ke iloi ai ko au ko te Eteleno ae nee ina filifili koutou ke liliu ko taku hahai. 14E kotou tauhi anai te sapato, koteuhi ko he aho tapu aia kia koutou. Ko ae e ina maumaui anai ia ia, e tua anai ia ki te mate; ko ae e ina fai anai he gaue i te aho aia, e motuhi anai ia mai tana hahai. 15E gaue anai i te u aho e ono; kae ko te fitu aho ko te sapato, ko te aho malolo ia kua fakatapui ki te Eteleno. Ko ae e ina fai anai he gaue i te aho o te sapato, e tua anai ia ki te mate. 16E tauhi anai e te u fanau a Iselaele te sapato, o tokaga ki ai i te taitupu mo te taitupu, koteuhi ko he hai heegata ia. 17E liliu anai te aho aia ko he fakailoga ia au mo te u fanau a Iselaele, o heegata: koteuhi nee fakatupu e te Eteleno te atu lagi mo te kele i te u aho e ono, kae nee ina tuku leva tana gaue i te fitu aho, pea nee malolo leva ia ia.
18I te osi o te palalau a te Eteleno kia Moisese i te mouga o Sinai, nee ina foaki leva kia Moisese, te u maka e lua o te fakamooni, ae nee tohi e te nima o te Atua.
Currently Selected:
EKESOTE 31: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
