EKESOTE 30
30
Te aletale o kaloni
1E ke fai anai he aletale ke tutu ai te u kaloni, e ke fai anai ia aki te akasia. 2Ko tona loa ko satimeta e nimagofulu, ko tona laulahi ko satimeta e nimagofulu; e tapa fa tatau anai ia ia, pea e meta tahi anai tona maoluga. E ke fai anai ni tala ae e ulu mai te aletale. 3E ke aofi anai te aletale aki te aulo maa, mo tona fuga oluga, mo ona fahai i te takafoli, pea mo ona tala, pea e ke fai anai he tapatapa aulo i tona takatakai katoa. 4E ke fai anai ni kavei aulo e lua i lalo o te tapatapa o te aletale, o kaku ki ona tuliki e lua; e ke fai anai i ona fahai e lua, ke fakaulu ai te u amo ae ke amo aki. 5E ke fai anai te u amo aki te akasia, pea e ke aofi anai naua aki te aulo. 6E ke fakatuu anai te aletale i te tua lito, ae e tau i mua o te aleka o te fakamooni, i mua o te nofoaga o te manavaofa ae e hili i oluga o te aleka o te fakamooni, te kogamea ae e au felavei ai anai mo koe. 7E tutu anai e Alone te kaloni fakamagoni; e ina tutu anai i te u uhu fuli, i te temi ae e ina fakamaa ai te u malama. 8E ina toe tutu foki te kaloni fakamagoni i te afiafi, i te temi ae e ina teuteui ai te u malama. Pea e tutu tuumau feia anai te kaloni fakamagoni ia mua o te Eteleno i okotou taitupu fuli. 9E mole koutou momoli anai i te aletale he kaloni kehe, pee ko he failaulau, pee ko he molaga, pea e mole kotou liligi anai i ai he molaga vino. 10E tua tahi i te tau, e fai anai e Alone te fakalelei i te u tala o te aletale aki te toto o te failaulau faifakalelei o te agahala; e ina fai tua tahi anai i te tau ni fakalelei ki te agahala i te aletale, i okotou taitupu fuli. Ko he mea maonioni lahi aia ki te Eteleno.
Te totogi o te tagata taki toko tahi
11Nee palalau leva te Eteleno kia Moisese, o ui: 12Ka ke lau anai te kaugamalie o te u fanau a Iselaele, e foaki anai e te tagata taki toko tahi ki te Eteleno te totogi o tona mauli, o tupu ke aua naa hoko anai kia ia he tautea i te temi ae e lau ai te hahai. 13Koeni te mea ae e foaki anai e natou fuli ae e kau anai i te tohi: ko he vaeluai sikele*, o mulimuli ki te sikele o te sagatualio, ae ko te uafulu foi kela; ko te vaeluai sikele ko te meaofa aena ae e foaki anai ki te Eteleno. 14E totogi anai e te tagata fuli ae e kau i te tohi, mai te tau uafulu o fai ki oluga, te meaofa aena ki te Eteleno. 15E mole totogi anai e te tagata mau koloa o fakalaka i te vaeluai sikele, pea e mole totogi anai e te tagata masiva o siisii i te vaeluai sikele: e totogi anai e te tagata taki toko tahi ki te Eteleno te totogi ae kua fakatotonu ke fakamauli ai tona laumalie. 16E ke tali anai mai te u fanau a Iselaele te paaga o tonatou totogi, pea e ke fakaaoga anai ia ia ki te gaue o te falela tapu; ko he tauhiofa anai aena ki te u fanau a Iselaele, i mua o te Eteleno, ki te totogi o onatou laumalie.
Te tanoa sila
17Nee palalau leva te Eteleno kia Moisese, o ui: 18E ke fai anai he tanoa sila, mo hona tuuaga sila, ki te fanofano. E ke fakatuu anai te tanoa i te vaha o te falela mo te aletale, pea e ke fakafonu anai ia ia aki he vai, 19pea e fufulu anai e Alone mo ona foha onatou nima mo onatou vae aki te vai aena. 20Ka natou ulu anai ki te falela, e natou fakamaa anai aki te vai aia, o tupu ke aua naa natou mamate; pea e toe tatau foki moka natou fakaovi anai ki te aletale o gaue mo momoli ni sakilifisio ki te Eteleno. 21E natou fakamaa anai onatou nima mo onatou vae, o tupu ke aua naa natou mamate. Ko he lao aena ke tuu mau anai kia Alone, mo ona foha, pea mo onatou hakoga.
Te lolo tapu mo te kaloni tapu
22Nee palalau leva te Eteleno kia Moisese, o ui: 23Too kia koe te u kaloni lelei tukupau: te mila, ko ni sikele e nimageau o te mila ae e hali toko tahi; mo te sinamome*, ko ni sikele e luageau nimagofulu; mo ni kanele magoni, ko ni sikele e luageau nimagofulu; 24mo te kase*, ko ni sikele e teau nimagofulu, o mulimuli ki te sikele o te sagatualio; mo he lolo olive, ko he ini e tahi. 25E ke fai anai ki te u mea aia he lolo ki te fakatapu, o mulimuli ki te poto o te tagata fai lolo. Ko te lolo pani tapu anai aena. 26E ke pani anai ki ai te falela mo te aleka o te fakapapau, 27mo te laupapa mo ona mea gaue fuli, mo te tuuaga malama mo ona mea gaue, mo te aletale o te u kaloni, 28mo te aletale o te u failaulau mo ona mea gaue fuli, mo te tanoa sila mo tona tuuaga. 29E ke fakatapui anai te u mea fuli aia, pea e natou liliu anai o maonioni, pea ko te u mea fuli ae e lave anai ki ai e maonioni anai. 30E ke pani lolo anai Alone mo ona foha, pea e ke fakatapui anai natou, o tupu ke natou gaue kia au i te gaue fakapelepitelo. 31E ke palalau anai ki te u fanau a Iselaele, pea e ke ui anai: ko te lolo pani tapu aia kia au, i okotou hakoga. 32E mole vali anai te sino o he tagata aki te lolo aena, pea e mole koutou fai anai he lolo ke tatau mo ia, i ona fuafua; e maonioni anai ia ia, pea e maonioni anai ia ia kia koutou. 33Ko ae e ina fai anai he lolo o hage ko te lolo aena, pe e pani anai ki ai he tagata kehe, e motuhi anai ia ia mai tana hahai.
Te iseso: kole mo fakafetai
34Nee ui leva e te Eteleno kia Moisese: too ni mea fakamagoni: he setakite*, mo he onika*, mo he kalipanume*, pea mo he iseso maa, o fua fakatatau fuli natou. 35E ke fai anai ki te u mea aia he kaloni o mulimuli ki te poto o te tagata fai kaloni; e konakona anai ia, mo maa, mo maonioni. 36E ke tuki anai ia ke hage ko he pauta, pea e ke tuku anai ia ki mua o te aleka o te fakamooni, i loto o te falela tapu ae e au felavei ai anai mo koe. Ko he mea maonioni anai aia kia koutou. 37E mole koutou fai anai he kaloni fena kia koutou, i ona fuafua fuli; e tapu anai ia kia koutou, koteuhi e tuku ia ki te Eteleno toko tahi. 38Ko ae e ina fai anai he kaloni fena ke magoni ia ia ki ai, e motuhi anai ia ia mai tana hahai.
Currently Selected:
EKESOTE 30: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
