EKESOTE 29
29
Fakatapui e Alone te u tagata faisakilifisio
1Koeni te mea ae e ke fai anai ke fakatapui ai natou, o tupu ke natou gaue mai kia au i te gaue fakapelepitelo. Too he pipi tagata mui mo ni ovi tagata e lua hee mele. 2Fai ki he falaoa fulumeto ni pane hala fakatupu, mo ni keke hala fakatupu kua natu aki te lolo, pea mo ni fakapaku hala fakatupu kua vali aki te lolo. 3E ke fafao anai natou ki he kato, pea e ke ave anai natou ki te sagatualio, mo te pipi tagata mui pea mo ni ovi tagata e lua.
4E ke taki anai ia Alone mo ona foha ki te matapa ulu o te falela, pea e ke fakamaanu anai natou ki he vai. 5E ke too anai te u kofu tapu, o ke fakatui kia Alone te kofu loloa mo te kofu o te efote* mo te peketolale*, pea e ke nonoo anai kia ia te nonoo fakateuteu ke taofi ai te efote. 6E ke hili anai te puloga ki tona ulu, pea e ke hai anai te pale o te maonioni ki te puloga. 7E ke too anai te lolo tapu, pea e ke liligi anai he lolo ki tona ulu, pea e ke pani anai ia ia. 8E ke fakaovi mai anai ona foha kia koe, pea e ke fakatui anai kia natou te u kofu hina loloa. 9E ke tui anai te kilii pipi kia Alone mo ona foha, pea e ke fakapipiki anai te u puloga hina ki te u ulu o te u foha o Alone. E natou mau anai te gaue fakapelepitelo, pea ko he lao aia ke tuumau i te taitupu mo te taitupu. Pea e ke fakanofo anai Alone mo ona foha ke liliu ko ni tagata faisakilifisio.
10E ke aumai anai te pipi tagata mui ki mua o te falela tapu, pea e hili anai e Alone mo ona foha onatou nima ki te ulu o te pipi tagata. 11E ke tamatei anai te pipi tagata ia mua o te Eteleno, i te mua matapa o te falela tapu. 12E ke too anai he toto i te toto o te pipi tagata, pea e ke vali anai ki ai te u tala o te aletale aki tou kaui tuhi, pea e ke liligi anai te toto katoa ae nee toe ki lalo o te aletale. 13E ke too anai te gako loto o te u tootooga, mo te magai ate lahi, mo te u foi ifiifi e lua, pea mo te gako ae e ina kofu te u ifiifi, pea e ke tutu anai te u mea fuli aia i te aletale. 14Kae e ke tutu anai i te afi, i fafo o te nofoaga, te sino o te pipi, mo tona kili, pea mo ona gakau: ko he sakilifisio aia ki te agahala.
15E ke too anai he ovi e tahi o te u ovi tagata e lua, pea e hili anai e Alone mo ona foha onatou nima ki te ulu o te ovi tagata. 16E ke tamatei anai te ovi tagata; e ke too anai tona toto, pea e ke liligi anai ia i oluga o te aletale i tona takafoli katoa. 17E ke tuutuusi anai te ovi tagata, pea ke fakamaa anai ona gakau mo ona vae, ae e ke hili anai ki oluga o te u inasi mo te foi ulu. 18E ke tutu anai te ovi tagata katoa i te aletale; ko he failaulau aia ki te Eteleno, ko he sakilifisio ae e tutu e te afi, pea e magoni lelei ia ki te Eteleno.
19E ke too anai te ovi tagata ake ae, pea e hili anai e Alone mo ona foha onatou nima ki te ulu o te ovi tagata. 20E ke tamatei anai te ovi tagata; pea e ke too anai he toto i tona toto, pea e ke vali anai ki ai te potu oluga o te taliga matau o Alone mo te u taliga o ona foha, pea e ke vali anai aki te toto te u kaui tuhi matua o onatou nima matau mo te kaui tuhi matua o onatou vae matau, pea e ke liligi anai te toe o te toto ki oluga o te aletale i te tafatafa katoa. 21E ke too anai he toto mai te toto ae e tuku i oluga o te aletale pea mo he lolo tapu, pea e ke afuhi anai ki ai Alone mo ona kofu, pea mo ona foha mo onatou kofu. E ke fakatapui anai i ai Alone mo ona kofu, pea mo ona foha mo onatou kofu. 22E ke too anai te gako o te ovi tagata, mo te hiku, mo te gako loto ae e ina kofu te u tootooga, mo te magai ate lahi, mo te u ifiifi e lua, mo te gako ae nee kofu aki, pea mo te alaga mua matau, koteuhi ko he ovi tagata ia ia o te fakatapu; 23e ke too anai mai te kato pane hala fakatupu, ae e tuku ia mua o te Eteleno, he foi pane e tahi, mo he foi keke e tahi nee natu aki te lolo, pea mo he foi fakapaku e tahi. 24E ke hili anai te u mea fuli aena kia nima o Alone mo te u nima o ona foha, pea e ke feliaki anai natou kia ae fahai mo ae fahai ia mua o te Eteleno. 25E ke too anai te u mea aia i onatou nima, pea e ke tutu anai natou i te aletale, i oluga o te failaulau; ko he sakilifisio tutu katoa ia ia i te afi ia mua o te Eteleno, pea e magoni lelei ia ia ki te Eteleno.
Meakai a te kau faisakilifisio
26E ke too anai te fatafata o te ovi tagata, ae nee momoli ki te fakatapu o Alone, pea e ke feliaki anai ia ia ki ae fahai mo ae fahai ia mua o te Eteleno: Ko tou vaega anai aia. 27E ke fakatapui anai te fatafata mo te alaga mua o te ovi tagata, ae nee fakaaoga ki te fakanofo o Alone mo ona foha, io, te fatafata i tau feliaki ia ia mai te fahai ae ki te fahai ae, mo te alaga mua i tau hiki ia ia ki oluga. 28E tuu anai ia ia ko he lao ke tuku holo i te taitupu mo te taitupu i te u fanau a Iselaele: E foaki anai te u inasi aia kia Alone mo ona foha, i te u manu fuli ae e momoli mai kia au e te u fanau a Iselaele i anatou sakilifisio fakafetai.
29Ka mate anai ia Alone, pea e tuku anai ona teu tapu ki ona foha. E natou tui anai te u teu aia, i te aho ae e fakatapui ai natou mo fakanofo ai natou ki te gaue fakapelepitelo. 30E tui anai te u kofu aia i te u aho e fitu e ae i ona foha e ina fetogi anai ia ia i te gaue fakapelepitelo, ae e ulu anai ki te falela tapu o fai te gaue i te potu taputapu.
31E ke too anai te ovi tagata o te fakatapu, pea e ke fakamoho anai te kakano i he kogamea tapu. 32E kai anai e Alone mo ona foha te kakano o te ovi tagata, pea mo te foi pane ae e tuku i te kato, i te uluaga o te falela tapu. 33Pea e natou kai anai te u mea aia, ae nee fai ki ai te fakalelei, o tupu ke fakatapui ai mo fakanofo ai natou ki te gaue fakapelepitelo. E mole kai anai he tahi kehe ki te u mea aia, koteuhi ko te u mea tapu natou. 34Kapau e toe anai he kanoi manu mo he pane ki te uhu, pea e ke tutu anai ia ia i te afi; e mole kai anai ia, koteuhi ko te mea tapu ia.
35E ke fai anai kia Alone mo ona foha o mulimuli ki te u fakatotonu fuli ae nee au tuku atu kia koe. E ke fai anai ia aho e fitu tonatou fakatapui. 36E ke momoli anai i te u aho taki tahi he pipi tagata ki te sakilifisio fakamolemole o te u agahala; e ke fakamaa anai te aletale ki te sakilifisio aia, pea e ke pani lolo anai ia ke fakatapui. 37E ke fai anai te tootooga aia lolotoga aho e fitu; e liliu anai te aletale o maonioni, pea e maonioni anai te u mea fuli e lave anai ki ai.
Te failaulau heegata
38Koeni te mea ae e ke momoli anai i te aletale: ko ni akeno e lua e taki tau tahi, i te u aho taki tahi, o tuumau. 39E ke momoli anai he tahi akeno i te uhu, pea ko te tahi akeno i te afiafi. 40E ke momoli fakatahi anai mo te uluaki akeno he falaoa maa, ko te vaega hogofulu e tahi o te efa, ae kua natu aki he lite lolo olive tuki e tahi vaelua, pea mo he vino, ko te lite e tahi vaelua. 41E ke momoli anai te lua akeno i te afiafi, mo he molaga magisi pea mo he vino o hage ko ae i te uhu; ko he sakilifisio tutu aia i te afi, pea e magoni lelei ia ia ki te Eteleno. 42Koena anai te failaulau ae e tonu ke fai tuumau e okotou hakoga i mua o te uluaga o te falela tapu, i mua o te Eteleno: ko te kogamea aia e au felavei ai anai mo koutou pea e au palalau ai anai kia koe. 43E au felavei anai i ai mo te u fanau a Iselaele, pea e maonioni anai te kogamea aia o tupu ko toku kololia. 44E au fakatapui anai te falela mo te aletale; pea e au fakatapui anai Alone mo ona foha, o tupu ke natou gaue kia au i te gaue fakapelepitelo. 45E au nofo anai i lotomalie o te u fanau a Iselaele, pea e au liliu anai ko tonatou Atua. 46E natou iloi anai ko au ko te Eteleno, ko tonatou Atua, ae nee ina fakamavae natou mai te fenua ko Esipito, o tupu ke au nofo i te lotolotoga o natou. Ko au ko te Eteleno, ko tonatou Atua.
Currently Selected:
EKESOTE 29: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
