EKESOTE 20
20
Folafola e hogofulu
1Nee folafola te Atua, o ui: 2Ko au ko te Eteleno, ko tou Atua, ae nee ina fakamavae koe mai te fenua o Esipito, mai te fale o te popula.
3E mole ke mau anai ni atua kehe i oku mua.
4E mole ke fau anai kia koe he fakatata maka, pee ko he paaki o he mea pe e ke mau i oluga o te atu lagi, pee ko he mea ae e ke mau i lalo i te kele, pee ko he mea e mau i te tai ae e malalo age i te kele. 5E mole ke punou anai i mua o te u mea aia, pea e mole ke tauhi anai kia natou; koteuhi ko au ko te Eteleno, tou Atua, ko au ko he Atua e finenonofo, ae e ina tauteai te agakovi a te tamai ki ana fanau, o kaku ki te tolu mo te fa o te taitupu o natou ae e agatuu mai kia au, 6pea e manavaofa o kaku ki te afe taitupu kia natou ae e oofa mai kia au mo fakalogo ki aku folafola.
7E mole ke takua noa anai te huafa o te Eteleno, ko tou Atua; koteuhi e tauteai anai e te Eteleno ia ia ae e ina takua noa tona huafa.
8Manatui te aho o te sapato, o fakamaonionii ia ia. 9E ke gaue anai ia aho e ono, o ke fai ai au gaue fuli. 10Kae ko te fitu aho ko te aho malolo aia o te Eteleno, tou Atua: E mole ke toe fai anai he gaue, ia koe, o feia ki tou foha, mo tou ofafine, mo tau tagata faifekau, pea mo tau fafine faifekau, mo tau manu, pea mo te matapule ae e nofo i tou lotoa. 11Koteuhi nee fai e te Eteleno ia aho e ono, te atu lagi mo te kele, mo te tai pea mo te u mea fuli i ai, pea nee malolo leva ia ia i te fitu aho: koia ae nee tapuaki ai te Eteleno ki te aho o te sapato, pea nee ina fakatapui ai ia ia.
12Fakaapaapa ki tau tamai mo tau fae, o tupu ke tologa tou mauli i te fenua ae e foaki atu anai kia koe e te Eteleno tou Atua.
13E mole ke fakapo anai.
14E mole ke tono anai.
15E mole ke kaihaa anai.
16E mole ke fakamooni loi anai ki tou oloi. 17E mole ke manumanu anai ki te fale o tou oloi; aua naa ke manumanu ki te ohoana o tou oloi, pee ko tana tagata faifekau, pee ko tana fafine faifekau, pee ko tana pipi, pee ko tana asino, pee ko he mea pe ae e mau e tou oloi.
18Nee logo te hahai katoa ki te gugulu o te mana mo te tagi o te fakatagi pupuhi; pea nee natou sisio ki te uloulo o te mouga mo tona kokohu. I te mea aia, nee tete leva te hahai i te mataku, pea nee natou holomuli, o tutuu mai mamao. 19Nee natou ui leva kia Moisese: Ke ke palalau mai ia koe totonu kia matou, pea e matou fakalogo atu anai; kae ke aua naa palalau mai te Atua totonu kia matou, koteuhi ke aua naa matou mamate. 20Nee ui leva e Moisese ki te hahai: Aua naa kotou matataku; koteuhi nee hau te Atua kia koutou, o ahiahii koutou, o tupu ke kotou mau te mataku kia ia, pea ke aua naa kotou agahala. 21Nee tutuu leva te hahai mai mamao; kae nee fakaovi leva ia Moisese ki te ao matolu ae nee nofo ai te Atua.
22Nee ui leva e te Eteleno kia Moisese: E ke palalau fenei anai ki te u fanau a Iselaele: Kua kotou sisio mata ki taku palalau mai te atu lagi kia koutou. 23E mole kotou fai anai ni taulaatua siliva, pee ko ni taulaatua aulo, ke kotou fakatatau kia au, o kotou tauhi anai ki ai; ke aua naa kotou fau ni taulaatua. 24E ke fakatuu anai kia au he aletale kele, pea e ke momoli anai i ai au failaulau mo au sakilifisio fakafetai, mo au ovi fafine, mo au pipi tagata. I te kogamea fuli ae e au fakamanatu ai toku huafa, e au hau anai kia koe, pea e au tapuaki anai kia koe. 25Kapau e ke fakatuu mai anai he aletale maka kia au, pea e mole ke fai anai ia aki ni maka ta; koteuhi i tau ta te maka aki te siso, e ke ulihi anai te maka. 26E mole ke hake anai ki toku aletale, i ni matatuuga, koteuhi ke aua naa ha tou telefua.
Currently Selected:
EKESOTE 20: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
