EKESOTE 21
21
Maua o te pule mo te tagata popula
1Koeni te u lao ae e ke tuku anai kia natou.
2Kapau e ke totogi he tagata popula hepeleo, e faifekau anai ia kia koe lolotoga tau e ono; kae i te fitu tau, e mavae anai ia ia i te ateaina, e mole ina totogi anai he mea. 3Kapau nee alu toko tahi atu ia ia, pea e mavae toko tahi anai ia; pea kapau nee i ai hona ohoana, pea e mavae anai ia mo tona ohoana. 4Kapau ko tona pule ae nee ina foaki kia ia tona ohoana, pea nee ina mau mai tona ohoana, ni foha pee ko ni ofafine, e mau anai te fafine mo te u fanau e tona pule, kae e mavae anai ia ia toko tahi i te ateaina. 5Kapau e ui e te tagata popula: E au ofa ki toku pule, mo toku ohoana, mo aku fanau, pea e mole au loto ke au mavae i te ateaina, 6e taki anai ia ia e tona pule kia mua o te Atua, e fakaovi anai ia ia ki te matapa, pee ko he pou o te matapa, pea e puuhi anai e tona pule tona taliga aki he hui, pea e gaue anai ia ia ki tona pule o tuumau.
7Kapau e fakatau e he tagata hona ofafine ke liliu o popula, pea e mole mavae anai te taahine aia o hage ko te mavae o te kau popula mahani. 8Kapau e mole lelei ia ia kia mata o tona pule, ae nee loto ke ohoana mo ia, pea e ina fakafaigafua tona totogi, kae e mole gafua anai kia ia ke ina fakatau te fafine ki ni hahai kehe, i te osi o tana fekaui ia ia, e ina tuku anai ki te tamai ke ina toe totogi ia ia. 9Kapau nee ina totogi te taahine o fakatuhatuha ki tona foha, pea e ina fai anai ki te taahine o mulimuli ki te u lao o uhiga mo te u taahine. 10Kapau e ina toe too anai he tahi age fafine, pea e mole toe too anai he mea mai te uluaki fafine, tatau aipe i te meakai, mo te mea laofi, mo te maua fakataumatua. 11Pea kapau e mole fai anai e te tagata te u mea aia e tolu ki te fafine, pea e feala anai ke mavae te fafine, kae e mole ina totogi anai he mea, pee ko he paaga.
Lao ki te sino mo te tua
12Ko ia ae ka ina taai he tagata o mate, e tua anai ia ki te mate. 13Kapau nee mole ina fai he puleaki kaka, kae ko te Atua ae nee ina tuku te tagata aia ki tona nima, e au fakatuhatuha atu anai te kogamea ae e feala ke hola ia ia ki ai. 14Pea kapau i tona loto kovi ki tona oloi, e haga anai he tahi o fai he puleaki kaka ke tamatei ia ia, e ke tatai anai ia ia, o tatau aipe pee mai toku aletale, o tamatei ia ia.
15Ko ia ae e ina taai tana tamai pee ko tana fae, e tauteai anai ia ki te mate.
16Ko ia ae e ina kaihaa te tagata, pea e ina fakatau ia ia, pe e ina taofi anai ia ia i tona fale, e tua anai ia ki te mate. 17Ko ia ae e palalau kovi anai ki tana tamai pee ko tana fae, e tua anai ia ki te mate.
18Kapau e fekeaki anai ni tagata, pea nee taai e he tahi ia naua ia ia ae aki he foi maka pee ko tona foi tuke, pea e mole mate anai ia ia, kae e tonu anai ke malolo ia ia i tona palepale, 19e mole fakatua anai te tagata ae nee ina taai te tagata aia, mo kapau e toe tuu ake anai ia ia ae o haele i fafo mo tona tokotoko. Kae e totogi anai e te tagata aia i te temi ae nee malolo ai te tagata ake ae i tana gaue, pea e ina toe totogi foki tona faitoo o kaku ki tona kua lelei.
20Kapau e taai anai e he tagata aki he akau tana tagata faifekau, pee ko tana fafine faifekau, o mate i tona nima, e fakatua anai te pule. 21Kae kapau e mauli anai ia ia i he aho e tahi pee ko ni aho e lua, e mole fakatua anai te pule; koteuhi ko tana paaga aia.
22Kapau e fekeaki ni tagata, o lavea ai he fafine faitama, o to ai tana fanau, pea nee gata ai tona kovi: e fakatua anai te u tagata aia ki te tua ae e fakatotonu anai e te ohoana o te fafine, pea e na totogi anai ia ia ia mua o ni tuifakamaau. 23Kae kapau e hoko anai he tuutamaki, pea e ke totogi anai te mauli ki te mauli, 24te mata ki te mata, te nifo ki te nifo, te nima ki te nima, te vae ki te vae, 25te vela ki te vela, te lavea ki te lavea, te uusi ki te uusi.
26Kapau e taai anai e he tagata te mata o tana tagata faifekau, pee ko tana fafine faifekau, o tupu ai te kovi o tona mata, e tonu leva ke ina fakaateainai te tagata aia, ke totogi ai tona mata. 27Pea kapau e to anai he nifo o tana tagata faifekau, pee ko tana fafine faifekau, pea e tonu leva ke ina fakaateainai ia ia, ke totogi ai tona nifo.
28Kapau e taai e he pipi aki ona tala he tagata pee ko he fafine, o tupu ai tona mate, e tuki makai anai te pipi aia ke mate, pea e mole kai anai tona sino, pea e mole fakatua anai tona pule. 29Kae kapau nee mahani te pipi i mua atu ki te aga aia, pea kua valoki foki tona pule, kae nee mole ina leoleo ia ia, e tuki makai anai te pipi ke mate, mo kapau nee ina taai he tagata pee ko he fafine o mate, pea e fakatua anai tona pule ki te mate. 30Pea kapau e fakamaua ki te pule aia he taau paaga, ke totogi ai tona mauli, pea e ina totogi anai te taau paaga katoa ae nee fakaha age kia ia. 31Pea kapau e taai e te pipi he fanau tagata pee ko he fanau fafine o mate, e fai anai kia ia te lao o te fakamaau. 32Pea kapau e tamatei e te pipi he tagata faifekau pee ko he fafine faifekau, pea e tonu leva ke foaki ni foi sikele* siliva e tolugofulu ki te pule o te tagata faifekau, pea e tuki makai anai te pipi ke mate.
33Kapau e fakaateainai e he tagata he luo, pea kapau e keli e he tagata he luo, kae e mole ina puloui ia ia, pea kapau e to anai ki ai he pipi pee ko he asino, 34e totogi anai e te tagata aia ki te pule o te manu te totogi o tana manu, kae e ina mau anai te manu ae kua mate.
35Kapau nee taai e te pipi a he tagata aki ona tala, te pipi a he tahi age tagata, o mate ai, e na fakatau anai te pipi ae e mauli, pea e na vaeluai anai tona totogi; e na toe vaeluai foki mo te pipi mate. 36Kae kapau nee iloi i mua atu e itaita te pipi, pea nee mole leoleo ia e tona pule, e totogi anai e te pule aia te pipi aki he tahi age pipi pea e nofo anai ia ia mo te pipi mate.
Currently Selected:
EKESOTE 21: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
