EKESOTE 15
15
Katiko a Moisese mo Iselaele
1Pea nee hiva leva e Moisese mo te u fanau a Iselaele te katiko aeni ki te Eteleno. Nee natou ui:
E au hiva anai ki te Eteleno, koteuhi kua ina fakamapa tona kololia;
Kua ina laku ki te tai te hosi mo te tagata heka hosi.
2Ko te Eteleno ko toku malohiaga, pea ko te tupuaga aia o aku fakavikiviki;
Ko ia ae nee ina haofaki au.
Ko ia ko toku Atua: E au fakavikiviki anai kia ia;
Ko ia ko te Atua o taku tamai: E au fakaha anai tona mauhiga.
3Ko te Eteleno ko he tagata tau toa ia ia;
Ko te Eteleno ko tona higoa aia.
4Kua ina li ki te tai te u saliote a Falaone mo tana fua tau.
Kua folo e te tai Kula ana tagata tau malolohi.
5Kua natou malemo i te tai:
Kua natou fetooki ki te takele o te tai
o hage ko ni maka.
6Kua fakaha e tou nima matau, io Eteleno! tona malohi;
Kua laliki e tou nima matau, io Eteleno! te fili.
7Ki te lahi o tou mafimafi,
E ke laku ki te kele natou ae e agatuu kia koe;
E ke liligi tou hauhau:
E ina tutu natou o hage ko te vao moamoa.
8I te tuku manava o ou pogaihu, nee fetanaki te vai,
Nee tanaki te u vaitafe o hage ko he kaupa,
Nee natou fefeka i lotomalie o te tai.
9Nee ui leva e te fili: E au tuli anai, pea e au mau anai,
E au vahe anai te koloa o te fili;
E au fakamakona anai toku fia lagavaka,
E au tohoi anai te heleta, pea e maumaui anai natou e toku nima.
10Nee ke pupuhi tau tukumanava:
Pea nee natou lofia i te tai;
Nee natou mou o hage ko ni koga pulu,
O kaku ki te takele o te moana.
11Eteleno, ko ai te atua e tatau mo koe?
Ko ai e tatau mo koe ae e gigila i te maonioni,
Ae e gali mo te u fakavikiviki,
Ae e ina fai te u mea fakamanamana?
12Nee ke faoi tou nima matau:
Pea nee folo natou e te kele.
13Nee ke haofaki tau hahai!
Nee ke taki ia ia i tou manavaofa,
Nee ke taki ia ia aki tou malohi,
Ki te nofoaga o tou maonioni.
14E logo te u hahai ki te mea aia,
Pea e natou tete:
E kaku te mataku ki te kau Filisitini;
15Kua hevaia te u pule o Etome;
Kua manavahe te u tagata tau o Moape;
Pea kua matataku te u hahai fuli o Kanaane.
16Kua mautoka natou e te lumaea mo te mataku;
I te malohi o tou nima,
E natou liliu anai o gutu mate o hage ko ni maka
O kaku ki te fakalaka o tau hahai, Eteleno!
O kaku ki te fakalaka o te hahai, ae nee ke totogi.
17E ke aumai anai natou pea e ke fakanofo anai natou i te mouga o tou tofiga,
I te kogamea ae nee ke teuteui ko tou nofoaga, io Eteleno!
I te sagatualio, Aliki! ae nee fakatuu e ou nima.
18E hau anai te Eteleno o heegata!
19Koteuhi kua ulu ki te tai te u hosi a Falaone, mo ana saliote, pea mo tana kau heka hosi,
Pea kua toe aumai e te Eteleno kia natou te u vai o te tai;
Kae nee haele te u fanau a Iselaele i lotomalie o te tai mamaha.
20Nee too leva e Malia, ko te fafine polofeta, tuagaane o Alone, he kii foi nafa veliveli i tona nima, pea nee mulimuli leva ia ia te u fafine fuli mo ni nafa liliki, o natou meemee ai. 21Nee tali leva e Malia ki te u fanau a Iselaele, o ui:
Koutou hiva ki te Eteleno, koteuhi kua ina fakaha tona kololia;
Nee ina laku ki te tai te hosi mo te tagata heka hosi.
Ko vai o Mala
22Nee ave leva e Moisese ia Iselaele mai te tai Kula, pea nee natou too leva te ala ki te toafa o Suli. Pea nee natou fagona leva lolotoga aho e tolu i te toafa, pea nee mole natou mau foki he vai. 23Nee natou kaku ki Mala; kae nee mole feala ke natou inu ki te vai o Mala, koteuhi nee kona ia. Koia ae nee fakahigoa ai te kogamea aia ko Mala. 24Nee mumuna leva te hahai kia Moisese, o ui: Kotea anai ka matou inu? 25Nee kalaga leva ia Moisese ki te Eteleno; pea nee fakaha leva e te Eteleno kia ia he akau, ae ke ina li ki te vai. Pea nee liliu leva te vai aia o malie. Koena te kogamea ae nee foaki ai e te Eteleno ki te hahai ni lao mo ni fakatotonu, pea ko te kogamea aia ae nee ahiahii ai e te Eteleno te hahai. 26Nee ina ui leva: Kapau e ke tokaga lelei ki te leo o te Eteleno tou Atua, kapau e ke fai te mea ae e totonu ki ona mata, kapau e fakalogo tou taliga ki ana fakatotonu, kapau e ke tauhi ana lao fuli, pea e mole au tautea anai ia koe ki he mahaki i te u mahaki ae nee au tauteai ai te kau Esipito; koteuhi ko au ko te Eteleno ae e ina fakamauli ia koe.
27Nee natou kaku leva ki Elimi, ae nee tuu ai te u matapuna vai e hogofulu ma lua mo te u fuu palemie* e fitugofulu. Nee natou nonofo leva i ai, ia tafa o te vai.
Currently Selected:
EKESOTE 15: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
