EKESOTE 14
14
Fakalaka i te tai Kula
1Nee palalau leva te Eteleno kia Moisese, o ui: 2Palalau ki te u fanau a Iselaele; ke natou afe, pea ke natou fakatuu tonatou nofoaga ia mua o Pi-Ailoti, i te vaha o Miketoli mo te tai, o hagahaga ki Paale-Sefoni; e kotou nonofo anai i mua o te kogamea aia, ia tafa o te tai. 3Koteuhi e ui e Falaone o uhiga mo te u fanau a Iselaele: Kua natou hehe i te fenua; kua takatakai natou e te toafa. 4E au fakafefeka anai te loto o Falaone, pea e ina tuli anai koutou; kae e au fakaaoga anai ia Falaone mo tana solia katoa ke fakaha ai toku kololia, pea e iloi anai e te kau Esipito ko au ko te Eteleno. Pea nee fai leva ki ai te u fanau a Iselaele.
5Nee fakaha leva ki te hau o Esipito kua feholaki te hahai o Iselaele. Pea nee fetogi leva te loto o Falaone mo te loto o ana tagata faifekau, ki te hahai o Iselaele. Nee natou ui leva: Kotea kua tou fai ai te mea aia, ke tou tuku ai ia Iselaele ke olo, kae e mole tou toe mau anai anatou gaue lelei? 6Pea nee teuteui leva e Falaone tana saliote, pea nee alu leva ia mo tana hahai. 7Nee ina ave leva ni saliote tau e onogeau, pea mo te u saliote fuli o Esipito, nee fofonu fuli te u saliote ko te tagata tau. 8Nee fakafefeka leva e te Eteleno te loto o Falaone, hau o Esipito, pea nee tuli leva e Falaone te u fanau a Iselaele. Nee mavae leva te u fanau a Iselaele mo te u nima nee hiki ki oluga. 9Nee tuli leva natou e te kau Esipito; pea ko te u hosi fuli, mo te u saliote a Falaone, mo ana tagata heka hosi pea mo tana solia, nee natou mau leva te hahai o Iselaele ae nee nonofo o ovi ki te tai, i Pi-Ailoti, i mua o Paale-Sefoni.
10Nee fakaovi leva ia Falaone kia natou. Pea nee sio leva te u fanau a Iselaele, pea koeni kua omai te kau Esipito i onatou muli. Pea nee mataku lahi leva te u fanau a Iselaele, pea nee natou kalaga leva ki te Eteleno. 11Pea nee natou ui leva kia Moisese: Pe nee mole mau ni tanuma i Esipito, pe nee aoga ke aumai matou ke mamate i te toafa? Kotea nee ke fakamavae ai matou i Esipito? 12Pe nee mole ko te mea aeni nee matou ui atu ki ai i Esipito: Tuku matou ke matou faifekau ki te kau Esipito, koteuhi e matou lelei ia age te faifekau ki te kau Esipito i te mamate i te toafa? 13Nee tali leva e Moisese ki te hahai: Aua pe naa koutou mataku ki he mea e tahi, koutou nofo mau, pea e koutou sisio anai ki te haofaki ae ka fakahoko anai e te Eteleno kia koutou i te aho nei; koteuhi ko te kau Esipito ae e kotou sisio ki ai i te aho nei, e mole kotou toe sisio anai ki ai i he aho. 14E tau anai te Eteleno o fetogi ia koutou, kae ko koutou, ke koutou fakalologo.
15Nee ui leva e te Eteleno kia Moisese: Kotea te u kalaga aeni? Palalau ki te u fanau a Iselaele, pea ke natou haele. 16Ko koe, hiki tou tokotoko, faoi tou nima ki te tai, o fakavaeluai te tai; pea e haele anai te u fanau a Iselaele i te tai mamaha. 17Ko au, e au fakafefeka anai te loto o te kau Esipito, pea e natou olo anai i okotou muli pea e fakaha anai toku kololia e Falaone, mo tana solia katoa, mo ana saliote, pea mo tana kau heka hosi. 18Pea e iloi anai e te kau Esipito ko au ko te Eteleno, moka fakaha anai toku kololia e Falaone, mo ana saliote, pea mo tana kau heka hosi.
19Pea nee alu leva te aselo a te Atua, ae nee haele ia mua o te fua tau o Iselaele o tuu i onatou muli; pea nee hiki leva te pou ao ae nee alu i onatou mua, o alu o tuu i onatou muli. 20Nee tuu leva te ao i te vaha o te fua tau o te kau Esipito mo te fua tau a te kau Iselaele. Nee fakapouli te ao aia i te tahi fahai, pea nee ina fakamalamai i te tahi ake fahai te pouli. Pea nee mole feala leva ke fakaovi te u fua tau e lua i te po katoa.
21Nee faoi leva e Moisese tona nima ki te tai. Pea nee tatafi leva e te Eteleno te tai aki he matagi malohi mai te potu esite ae nee agi leva i te po katoa; pea nee ina fakamamaha leva te tai pea nee ina vaeluai leva te vai. 22Nee feulufi leva te u fanau a Iselaele ki lotomalie o te tai ae kua mamaha, pea nee tuu leva te u vai o fakakaua i te fahai matau mo te fahai hema. 23Nee muli leva te kau Esipito ia natou; pea nee ulu leva te u hosi fuli a Falaone, mo ana saliote, pea mo tana kau heka hosi, i onatou muli ki lotomalie o te tai. 24I te mafoata, nee sio leva te Eteleno mai te pou afi mo te ao, ki te fua tau a te kau Esipito, pea nee ina fakamaveuveu leva te fua tau a te kau Esipito. 25Nee ina too leva te u teka o anatou saliote ke faigataa ai tanatou haele. Pea nee ui leva e te kau Esipito: Tou feholaki ia mua o Iselaele, koteuhi kua kau te Eteleno mo ia o tau ki te kau Esipito.
26Pea nee ui leva e te Eteleno kia Moisese: Hiki tou nima ki te tai, pea e toe liliu anai te tai ki te kau Esipito, mo anatou saliote, pea mo tanatou kau heka hosi. 27Nee hiki leva e Moisese tona nima ki te tai; pea i te uhu aia, nee toe liliu te tai ki tona nofoaga mahani; pea nee feholaki leva te kau Esipito i onatou mua; kae nee laku leva natou e te Eteleno i lotomalie o te tai. 28Nee toe liliu leva te tai ki te mahani, o lofia ai te u saliote, mo te kau heka hosi, pea mo te fua tau katoa a Falaone, ae nee feulufi leva ki te tai i muli o te u fanau a Iselaele; pea nee mole toe hao leva he foi toko tahi. 29Kae nee haele leva te u fanau a Iselaele i te magemage i lotomalie o te tai, pea nee tanaki te vai o fakakaua i tonatou fahai matau mo tonatou fahai hema.
30I te aho aia, nee haofaki leva e te Eteleno ia Iselaele mai te nima o te kau Esipito; pea nee sio leva ia Iselaele i te matatai ki te kau Esipito ae kua mamate. 31Nee sio leva ia Iselaele ki te nima malohi o te Eteleno ae nee to ki te kau Esipito. Pea nee mataku leva te hahai ki te Eteleno, pea nee natou tui leva ki te Eteleno mo Moisese, tana tagata faifekau.
Currently Selected:
EKESOTE 14: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
