EKESOTE 13
13
Fakatapui o uluaki tupu ki te Eteleno
1Nee palalau leva te Eteleno kia Moisese, o ui: 2Momoli mai kia au te u uluaki fuli, te u uluaki fuli o te u fanau a Iselaele, tatau pe te u tagata mo te u manu: ko toku vaega natou.
3Nee ui leva e Moisese ki te hahai: Koutou manatui te aho aeni, te aho ae nee koutou mavae ai i Esipito i te fale o te popula, koteuhi ko te nima malohi o te Eteleno ae nee ina fakamavae koutou. E mole kai anai he pane fakatupu. 4E koutou mavae i te aho nei, i te mahina tuusi o te fulumeto. 5Ka fakaulu anai ia koe e te Eteleno ki te fenua o te kau Kanaane, mo te kau Eti, mo te kau Amole, mo te kau Evi, pea mo te kau Sepusi, fenua ae nee ina fakapapau ki au tamai ke foaki kia koe, fenua ae e tafe ai te hua huhu mo te meli, e ke fai anai ki te Eteleno te atolasio aeni i te mahina totonu aeni. 6I te u aho e fitu, e ke kai anai ni pane hala fakatupu; pea e ke fai anai i te fitu aho he aho lahi ki te Eteleno. 7E kai anai ni pane hala fakatupu ia aho e fitu; e mole mau anai i tou fale he pane fakatupu, pea e mole mau anai i tou fale he fakatupu, pea mo tou fenua katoa. 8E ke ui anai ki tou foha: E fakamanatu i te mea aeni te mea ae nee fai e te Eteleno kia au, i te aho ae nee au mavae ai i Esipito. 9E tuu anai te mea aia kia koe o hage ko he fakailoga i tou nima, o hage ko he tauhiofa i ou vahaa mata, o tupu ke mau te lao a te Eteleno i tou gutu; koteuhi ko te Eteleno ae nee ina fakamavae ia koe mai Esipito aki tona nima malohi. 10E ke taupau anai te fakatotonu aeni i te temi ae kua fakatuutuu ki ai, ia tau fuli.
11I te aho ae e fakaulu ai anai ia koe e te Eteleno ki te fenua o te kau Kanaane, o hage ko tana fakapapau kia koe mo au tamai, ke ina foaki atu kia koe. 12E ke vahei kehe anai ki te Eteleno te u uluaki fuli, tatau foki mo te u uluaki fuli o te u manu ae e ke mau anai: E mau anai e te Eteleno te u manu tagata. 13E ke totogi anai ki he akeno te uluaki o te asino; pea kapau e mole ke totogi anai ia, pea e ke fasii anai tona kia. E ke toe totogi foki te u uluaki fuli o te tagata i ou foha. 14Pea kapau e fehui atu anai e tou foha i he aho: Kotea te uhiga o te mea aia? E ke tali anai kia ia: Nee fakamavae matou e te Eteleno aki tona nima malohi mai Esipito, mai te fale o te popula; 15kae, i te fakafefeka e Falaone tona loto, o mole ina tuku matou ke matou olo, nee tamatei leva e te Eteleno te u uluaki fuli i te fenua o Esipito, mai te uluaki o te u tagata o kaku ki te u uluaki o te u manu. Koena te tupuaga o taku momoli ki te Eteleno te sakilifisio ki te u manu tagata uluaki fuli, pea mo taku totogi ai te u uluaki fuli o oku foha. 16E tuu anai te mea aia ko he fakailoga i tou nima pea ko he fakamanatu i tou lae; koteuhi nee fakamavae matou mai Esipito e te nima malohi o te Eteleno.
Haele i te tai Kula
17I te aho ae nee tuku ai leva e Falaone te hahai ke olo, nee mole taki leva e te Atua te hahai i te ala o te fenua o te kau Filisitini, logo ai tona ovi; koteuhi nee ui leva e te Atua: E feala anai ke fakahemala te hahai i tana sio ki te tau, pea ke toe liliu anai ia ia ki Esipito. 18Kae nee taki leva e te Atua te hahai i te ala o te toafa, i te fahai o te tai Kula. Nee hake leva te u fanau a Iselaele o hage ko he kau tau mai te fenua o Esipito. 19Nee too leva e Moisese te u hui o Sosefo o alu mo ia, koteuhi nee ui e Sosefo ki te u fanau a Iselaele ke natou fakapapau age kia ia: E ahiahi anai te Atua kia koutou, pea kotou hakeaki anai oku hui mo koutou ke mamao i heni.
20Nee natou mavae leva i Sukoti, pea nee natou nonofo leva i Etami, i te potupotu o te toafa. 21Nee alu leva te Eteleno i onatou mua i te aho i he foi pou ahu, o taki natou i te ala; pea i te pouli i he pou afi, o fakamalamai natou, o tupu ke natou haele i te aho mo te pouli. 22Nee mole toe puli te pou ahu ia mua o te hahai i te aho, pea nee mole toe puli te pou afi i te pouli.
Currently Selected:
EKESOTE 13: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
