EKESOTE 12
12
Fakatuu o te Pasikate
1Nee ui leva e te Eteleno kia Moisese mo Alone i te fenua o Esipito. 2E liliu anai te mahina aeni kia koutou ko te uluaki mahina o te u mahina; e liliu anai ia kia koutou ko te uluaki mahina o te tau. 3Kolua palalau ki te fakatahiga o te hahai katoa o Iselaele, pea kolua ui: I te aho hogofulu o te mahina aeni, e kotou too anai he akeno i te u famili taki tahi, he akeno i te fale. 4Kapau e toko lavaki te fale ki he akeno pea e ina too anai te akeno o fakatahi mo te fale ae e ovi age, o fakafuafua ki te kaugamalie o te hahai. E koutou fuafua anai te akeno aia o mulimuli ki te mea ae e feala ke kai e te tagata taki toko tahi. 5E kotou too anai he akeno tagata hee mele, mo tau tahi. E feala ke kotou too anai he akeno pee ko he uhii tao. 6E kotou taupau anai te manu o kaku ki te aho hogofulu ma fa o te mahina aeni; pea e tamatei anai ia ia e te fakatahiga katoa o Iselaele i te afiafi pouli o te aho aia. 7E too anai te toto o te manu, o vali ai te u pou e lua mo te kaumatapa o te matapa o te u fale ae e kai ai anai te manu. 8I te po aia, e kai anai te kakano o te manu ae kua tunu i te afi, mo ni pane hala fakatupu pea mo ni lauakau kona. 9E mole kotou kai mata anai te kakano, pee haka anai i te vai, kae e kotou tunu anai ia i te afi, o fakatahi mo te ulu, mo te u vae, pea mo te u tootooga. 10E mole kotou tuku anai he mea ke kaku ki te uhu; pea kapau e toe anai he mea ki te uhu, pea e koutou tutu anai ia i te afi. 11E kotou kai anai te manu, kae kua kotou tui anai okotou kilii pipi ki okotou vakavaka, pea kua koutou tui anai okotou sulie ki okotou vae, pea kua kotou too anai okotou tokotoko i okotou nima; pea e kotou kai fakavilivili anai te manu. Ko te Pasikate aia a te Eteleno.
12I te po aia, e au fakalaka anai i te fenua o Esipito, pea e au tamatei anai te u fanau uluaki fuli o te fenua o Esipito, mai te tagata o kaku ki te manu, pea e au fakahoko anai aku tautea ki te u atua fuli o Esipito. Ko au ko te Eteleno. 13Pea ko te toto, e liliu anai ia kia koutou ko he fakailoga i te u fale ae e kotou nonofo ai anai; e au sio anai ki te toto, pea e au fakalaka anai ia koutou pea e mole maumaui anai koutou e he tautea ke kotou mamate ai, moka e au taai anai te fenua o Esipito. 14E kotou taupau anai te fakamanatu o te aho aia, pea e kotou tauhi anai ia ko he aho lahi ki te Eteleno; e kotou tauhi anai ia o hage ko he lao ke tuku holo i okotou hakoga. 15I te u aho e fitu, e kotou kai anai ni pane hala fakatupu. E kamata anai mai te uluaki aho, e mole toe mau anai he fakatupu i okotou fale; koteuhi ko te u tagata fuli ae e kakai anai ki he pane fakatupu mai te uluaki aho o kaku ki te fitu aho, e motuhi anai ia mai Iselaele. 16I te uluaki aho, e kotou fai anai he fakatahi tapu; pea i te fitu aho, e kotou toe fai anai he fakatahi tapu. E mole fai anai he gaue i te u aho aia; ko te mea e tahi ae e fakagafua ko te teuteui o te meakai a te tagata taki toko tahi. 17E kotou tauhi anai te aho o te u pane hala fakatupu, koteuhi ko te aho aia ae nee au fakamavae ai akotou fua tau i te fenua o Esipito; e kotou taupau anai te aho aia o hage ko he lao ke tuku holo ki okotou hakoga. 18I te uluaki mahina, i te aho hogofulu ma fa o te mahina, i te afiafi, e kotou kai anai ni pane hala fakatupu o kaku ki te afiafi o te aho uafulu ma tahi. 19I te u aho e fitu, ke aua naa toe mau anai he fakatupu i okotou fale, koteuhi ko te u tagata fuli ae e kai anai ki he pane fakatupu, e motuhi anai natou mai te fakatahiga o Iselaele, tatau aipe pee ko he matapule pee ko he tagata totonu o te fenua. 20E mole kotou kai anai he pane fakatupu; i okotou nofoaga fuli, e kotou kai anai ni pane hala fakatupu.
21Nee paui leva e Moisese te kau matua fuli o Iselaele, o ui kia natou: Koutou olo o filifili he manu ki okotou famili, pea koutou momoli te Pasikate. 22E koutou too anai he toulu isopa, e koutou palapalai anai ia aki te toto ae e tuku i te pesini, pea e koutou vali anai te kaumatapa mo te u foi pou e lua o te matapa, aki te toto ae e tuku i te pesini. E mole toe mavae anai he tahi o koutou mai tona fale o kaku ki te uhu. 23Ka fakalaka anai te Eteleno o taai ia Esipito, e sio anai ia ia ki te toto i te kaumatapa mo te u foi pou e lua, pea e fakalaka anai te Eteleno i oluga o te matapa, e mole ina fakagafua anai ke ulu te aselo maumau ki okotou fale, o tamatei koutou. 24Koutou tauhi te mea aia o hage ko he lao kia koutou mo akotou fanau o heegata. 25Ka kotou feulufi anai ki te fenua ae e foaki atu kia koutou e te Eteleno, o mulimuli ki tana fakapapau, koutou taupau anai te lao taputapu aia. 26Pea kapau e fehui atu anai akotou fanau kia koutou: Kotea te uhiga o te tauhi aena? 27E koutou tali anai: Ko te sakilifisio o te Pasikate ki te Eteleno, ae nee fakalaka i oluga o te u fale o te u fanau a Iselaele i Esipito, i tana taai ia Esipito kae haofaki otatou fale. Nee punou leva te hahai ki te kele o atolasio. 28Pea nee olo leva te u fanau a Iselaele, pea nee natou fai leva te mea ae nee fakatotonu e te Eteleno kia Moisese mo Alone; nee natou fai leva ia.
Mamate o uluaki tupu fuli o Esipito
29I lotomalie o te pouli, nee tamatei leva e te Eteleno te u fanau uluaki fuli o te fenua o Esipito, mai te uluaki a Falaone, ae e heka i tona hekaaga fakahau, o kaku ki te uluaki o te u tagata popula, ae e nonofo i te pilisoni, mo te u uluaki fuli o te u manu. 30Nee tuu ake leva ia Falaone i te pouli, ia ia mo ana tagata faifekau fuli, pea mo te kau Esipito katoa, pea nee logo leva i Esipito ni tagi lalahi koteuhi nee mole hala he fale mo tona mate. 31I te po pe aia, nee paui leva e Falaone ia Moisese mo Alone, o ui kia naua: Kolua tutuu ki oluga, pea kolua mavae i taku hahai, ia kolua mo te u fanau a Iselaele. Kotou olo, pea kotou tauhi ki te Eteleno o mulimuli ki te mea ae nee kolua ui mai ki ai. 32Kotou too akotou ovi mo akotou pipi, o mulimuli ki te mea ae nee kolua ui ki ai; kotou olo, pea kotou tapuaki mai kia au. 33Nee ekenaki leva te hahai e te kau Esipito ke mavae fakavilivili i te fenua, koteuhi nee natou ui: E matou mamate fuli anai. 34Nee too leva e te hahai te falaoa kua osi i te natu kae nee heeki tupu. Nee natou kofukofu leva te u natuaga falaoa aki onatou kofu o amo natou i onatou fugauma. 35Nee fai leva e te u fanau a Iselaele te mea ae nee palalau ki ai ia Moisese, pea nee natou kole leva ki te kau Esipito ni ipu siliva, mo ni ipu aulo, pea mo ni kofu. 36Nee tuku leva e te Eteleno ke ofa te kau Esipito ki te hahai, o natou tali anatou kole. Pea nee natou fakamasivai leva te kau Esipito.
Mavae a fanau a Iselaele i Esipito
37Nee mavae leva te u fanau a Iselaele mai Lamisese ki Sukoti; nee fakaalu tonatou kaugamalie ki te toko onogeau afe tagata haele, kae nee mole lau te u fanau. 38Nee hahake fakatahi leva mo natou he hahai kehe ae nee kaugamalie; pea nee natou mau foki ni faga manu lalahi, mo ni ovi, pea mo ni pipi. 39Nee natou fakamoho leva ni keke hala fakatupu aki te falaoa ae kua natu, ae nee aumai mai Esipito kae nee heeki tupu, koteuhi nee kapu natou mai Esipito, o natou mavae fakavilivili kae nee mole natou too ni meakai ke olo mo natou. 40Ko te fualoa o te nofo o te u fanau a Iselaele i Esipito ko tau e fageau tolugofulu. 41I te katoa o te u tau aia e fageau tolugofulu, i te aho fakaosi, nee mavae leva te u fua tau fuli a te Eteleno i te fenua o Esipito. 42E fakamanatu anai te po aia ki te Eteleno, koteuhi nee ina fakamavae tana hahai i te fenua o Esipito; e tauhi anai te po aia ki te Eteleno e te u fanau fuli a Iselaele mo onatou hakoga.
43Pea nee toe ui leva e te Eteleno kia Moisese mo Alone: Koeni he fakatotonu ki te Pasikate: e mole kai anai he tagata matapule ki ai. 44E ke silikosisioi anai te u tagata faifekau fuli nee totogi siliva; pea hoki feala anai ke natou kai te Pasikate. 45E mole kai anai te Pasikate e te tagata totonu o te fenua mo te tagata gaue totogi. 46E kai anai te Pasikate i te fale; e mole koutou ave anai he kanoi manu ki fafo, pea e mole koutou fasii anai he hui pe e tahi. 47E fai anai te Pasikate e te fakatahiga katoa o Iselaele. 48Kapau e nofo anai he tagata matapule mo koe, pea e loto anai ia ia ke kau i te Pasikate o te Eteleno, e silikosisioi anai te u tagata fuli o tona fale; pea hoki fakagafua anai ke ina fai te pasikate; e tatau anai ia ia mo te tagata o Iselaele. Kae e mole kai anai te Pasikate e he tagata ae e heeki silikosisio. 49Ko te lao e tahi ki te tagata o te fenua mo te tagata matapule ae e nofo i lotomalie o koutou.
50Nee fai leva e te u fanau fuli a Iselaele te mea ae nee fakatotonu e te Eteleno kia Moisese mo Alone; nee natou fai leva o fena. 51I te aho totonu aia, nee fakamavae ai leva e te Eteleno i te fenua o Esipito te u fanau a Iselaele, o mulimuli ki onatou fua tau.
Currently Selected:
EKESOTE 12: WB2011
Highlight
Copy
Compare
Share
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
