Filipe 4
4
1Koia, ei oku fetaina alofaina, koutou ala ko loku fiafia mo loku palaa, ke kotou tuu mau i le Aliki, ei oku alofaaga !
Tokoi fakamuli
2E kau kole kia Evoti ti e kau kole kia Sinitise ke la maua se manatu loto e tasi i le Aliki.
3Ti ko koe foki, ko loku kaukau nea agatonu, io, e kau kole atu kiate koe ke ke tokoi kia laua, ala na tau fakatasi mo au ki le Evaselio, ti mo Kelemete mo la ake oku kaukau soa i le gaoi, latou ala kua tuu olatou igoa i le tosi o le mauli.
4Kotou fiafia tuumau i le Aliki, e kau toe liuga atu a ia, kotou fiafia.
5Ke iloa lokoutou agamalie e tagata fuli, kua ofi le Aliki. 6Aua na kotou tokaga mamae ki se nea e tasi, kae kotou fakasa ki le Atua a nea ala e aoga kia koutou i ni kole, mo ni kolekole, ti mo ni fakafetai, 7ti ko le tokamalie o le Atua, leia e fakalaka ake i atamai fuli, e taupau ia loa okoutou loto mo akoutou manatu ia Sesu-Kilisito.
8Fakaoki loa, fetaina, kotou tokaga ki nea fuli ala e malilie ti mo gali i le fakavikiviki : tafito a nea fuli ala e maoki, mo fakaapaapa, mo totonu, mo mea, mo aloalofa, ti mo mata malie. 9Ko le nea leia na kotou ako, mo kotou tali, ti mo kotou logo ki ai meiate au, ti mo le nea leia na kotou tio ki ai iate au, kotou fai a ia, ti e nofo loa le Atua o le tokamalie ia koutou.
Loto fakafetai o Paulo
10Na kau logoi se fiafia lasi i le Aliki i laku tio kua kotou toe fakafoou le maoki o lokoutou alofa kiate au ; ko le maoki, na kotou manatu tuumau kiate au, kae na leaise kotou maua ia fua se faigamalie ke fakasa ai a ia. 11E leaise kau fakasa le nea lena, o tupu ko le mativa, talie kua kau ako ke kau fiafia i le nofo leia e kau nofo ai. 12E kau iloa le mauli i le mativa, ti e kau iloa le mauli i le mou. I nea fuli mo ganea fuli kua kau ako le makona ti mo le fia kai, le nofo i le mou ti mo le nofo i le oge. 13E kau mafai a nea fuli i leia e fakamakeke ia au. 14Kae logo ai le nea lena, kua kotou fai se nea malie i lakoutou kau ki loku faigataaia.
15E kotou iloa e koutou totonu, kau Filipe, i le kamataaga o le akonaki o le Evaselio, i le temi leia na kau mavae ai mei le fenua o Masetonia, na leaise Ekelesia fua e tasi leia na loto fakafetai o soli mai kiate au se nea ; 16ko kotou tefua ala na fai ia le nea lena, talie i Tesalonika, na kotou aumai le nea leia e aoga kiate au, o tua lua foki. 17E leaise kau afa ni nea alofa, kae e kau afa le fua leia e fakalasi ia okoutou kau pepa. 18Kua kau maua nea fuli, ti kua kau nofo i le mou ; kua kau apele pipi i koloa, i laku tali meia Epafolotito le nea leia e au meia koutou ofaipe se kaloni manogi malie, pe se sakilifisio leia e tali e le Atua, ti e mata malie kiate ia. 19E tokaga loa loku Atua ki nea fuli ala e aoga kia koutou o mulimuli ki lona mou koloa, i le kololia, ia Sesu-Kilisito. 20Ke tuku ki lotatou Atua ko le Tamana le kololia i sekulo mo sekulo ! Amene !
Fakaalofa
21Kotou fakaalofa ake ki le kau sagato fuli ia Sesu-Kilisito. E fakaalofa atu fetaina ala e nonofo mo au. 22E fakaalofa atu kia koutou le kau sagato fuli, kae tafito latou o le fale o Sesale.
23Ko le kalasia o le Aliki ko Sesu-Kilisito ke nofo mo okoutou laumalie.
Currently Selected:
Filipe 4: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
