Filipe 3

Faifaitakiaga o Paulo

1Fakatoetoe, ei oku fetaina, kotou fiafia i le Aliki. E leaise kau kaekae fua i le tosi atu kia koutou o nea masani, talie e aoga a ia kia koutou.

2Kotou tokaga ki kuli, kotou tokaga ki tagata gaoi veveli, kotou tokaga ki le kau silikosisio loi. 3Talie ko le kau silikosisio, ko tatou, ala e fai ia ki le Atua latatou atolasio i le Laumalie o le Atua, ti e fakakololia ia Sesu-Kilisito, kae e leaise tuku ia latatou fanaki ki le kanofi.

4Ko au foki, e feala ke kau tuku laku fanaki ki le kanofi. Kapau e manatu se tasi e feala ke fanaki a ia ki le kanofi, e kau toe lasi ake, 5ko au, na silikosisio au i le valu o aso, mei le lanu o Iselaele, mei le faasiga o Pesamino, Epeleo na tupu mei se Epeleo, ti faliseo i le lao ; 6ti ki le tausi lotu, na kau fakaveliveli le Ekelesia ; ti ki le faitotonu o le lao, na kau lee mele. 7Kae ko nea ana, ala na fai kiate au pe ni fakapale, kua kau tio kia latou ofaipe ni nea ke tiaki o tupu ko Kilisito. 8Ti kua kau tio foki ki nea fuli ofaipe ni nea ke tiaki, o tupu ko le malie tukupau o le iloa o Sesu-Kilisito loku Aliki, leia kua kau fakafiti ai ki nea fuli ; ti e kau tio ki nea ana ofaipe se pela, o tupu ke maua Kilisito ; 9ti ke maua au iate ia, o leai i laku faitotonu, leia e au mei le lao, kae i le faitotonu leia e maua i le tui kia Kilisito, le faitotonu leia e au mei le Atua i le tui. 10Ti e kau iloa loa Kilisito, ti mo le makeke o lona toe tuuake, ti mo le komunio o ona mamae, i le fakatatau kiate ia i lona mate, ke kau kaku ai, 11mo kapau e kau fealagia, ki le toe tuuake mei le kau mate.

Makape ki le tauaga

12E leikiaise kau maua ia foki le fakapale, pe kua kau kaku ki le malie tukupau, kae e kau makape, o faiga ke kau kukumi a ia, talie kua kukumi foki au e Sesu-Kilisito. 13Fetaina, e leaise kau manatu kua kau kukumi a ia ; kae e kau fai se nea e tasi : e kau galoi a nea i muli, kae e kau mafao o tio ki nea i mua,

14ti e kau makape ki le tauaga, ke kau maua le fakapale o le kalaga mei lagi o le Atua ia Sesu-Kilisito.

15Koia ko tatou fuli ala ko ni tagata kua katoa, ke tou maua le manatu lena ; ti kapau e kotou maua se tasi ake manatu, e fakamalamai loa koutou e le Atua i le nea foki lena. 16Ko leia fua, i le nofo leia kua tou kaku ki ai, ke tou saele i se laka e tasi.

17Kotou faifaitaki mai kiate au, fetaina, ti kotou tio kia latou ala e saele o mulimuli ki le faifaitakiaga leia e kotou maua ia matou. 18Talie e toka api latou ala e saele ko ni fili o le koluse o Sesu-Kilisito, ala kua tua lasi laku tau masau ki ai, ti e kau toe masau atu nei ki ai mo ni tagi. 19Ko lolatou fakaoki ko le pulinoa ; e lotou atua ki olatou manava, ti e lotou fakakololia latou i le nea leia e tonu ke lotou luma ai, talie lotou manatu fai ki nea o le malama nei. 20Kae kia tatou, e tuu lotatou kolo i lagi, leia e tou talitali foki mei ai ki lotatou fakamauli, le Aliki ko Sesu-Kilisito,

21leia e fetogi ia loa lotatou tino fakaaloalofa, ke tatau mo lona tino fakakololia, i le pule leia e maua e ia ke aumai ai a nea fuli ke fakalogo kiate ia.

Currently Selected:

Filipe 3: FB2000

Highlight

Copy

Compare