Filipe 2

Kilisito, faifaitakiaga o le fakataulalo

1Koia kapau e i ai se fakapelepele ia Kilisito, kapau e i ai se fimalie i le alofa, kapau e i ai se komunio i le Laumalie, kapau e i ai se alofa mamae ti mo se manavaalofa, 2kotou fakakatoa loku fiafia, o kotou maua se manatu loto e tasi, mo se alofa e tasi, mo se laumalie e tasi, ti mo se manatu e tasi. 3Aua na kotou fai se nea i se loto fakatautau pe i se loto fia sa, kae i le loto agamalu ke kotou tio ki la ake o sakinake e lotou taualuga ake ia koutou totonu. 4Ke aua na tasi tokaga fua le tagata ki ana nea fua, kae ke tokaga foki a ia ki nea a la ake. 5Kotou maua a manatu loto ala na maua e Sesu-Kilisito : 6Ko ia, na natula tatau a ia mo le Atua, kae na leaise tio a ia ki lona tatau mo le Atua ofaipe se nea ke tatai fakamakeke, 7kae na fakamativa a ia totonu, o fakatatau a ia ki se tagata fakasausau, o liliu a ia o tatau mo tagata ; ti na sa loa a ia ofaipe se tagata maoki, 8ti na fakataulalo a ia totonu, o liliu a ia o fakalogo o kaku ki le mate, ki le mate foki o le koluse. 9Koia foki leia na siki ai a ia e le Atua ke taualuga oki, ti na soli ai e ia kiate ia le igoa leia e taualuga ake i igoa fuli, 10o tupu ke tutuli i le igoa o Sesu a tuli fuli i le lagi, mo le kele, ti mo le lalo kele, 11ti ke fakasa e alelo fuli ko Sesu-Kilisito ko le Aliki, ki le kololia o le Atua ko le Tamana.

Gigila ofaipe ni fa malama

12Koia, ei oku alofaaga, ofaipe lakoutou patigaofie tuumau, o leaise gato fua mo ka kau nofo mo koutou, kae toe asili ake mo ka kau puli, kotou gaoi ki lokoutou saofaki i le i mo le lulu ; 13talie ko le Atua leia e fakatupu ia ia koutou le loto mo le fai o lona finegalo malie. 14Kotou fai a nea fuli, sala lauga mo sala lotolotolua, 15o tupu ke kotou lee mele mo mea, ofaipe ni fanau a le Atua lee valoki i loto malie o se tautupu fakalialia mo agaveli, leia e kotou mu ai ofaipe ni malama i le malama nei, 16o amo le folafola o le mauli ; ti e mafai loa ke kau fiafia i le aso o Kilisito, na leaise kau makape noa ti na leaise kau gaoi noa. 17Ti kapau e kau aoga ki le lipasio o lakoutou sakilifisio ti mo le tausi o lakoutou tui, e kau fiafia i ai, ti e kau fiafia fakatasi mo koutou fuli. 18Ko koutou foki, kotou fiafia, ti kotou fiafia fakatasi mo au.

Gaoi a Timoteo mo Epafolotito

19E kau fanaki ki le Aliki ko Sesu, e kau kakau vave atu kia koutou Timoteo, o tupu ke kau maua ai se fimalie i le iloa o lokotou anoaga. 20Talie e leaise kau maua se tasi i leinei ke manatu tatau mo au, ti ke tokaga maoki kia koutou ; 21talie e lotou afa fuli a nea ala e aoga kia latou, kae leai a nea ala e aoga kia Sesu-Kilisito. 22E kotou iloa kua fakamaoki a ia, i lana gaoi fakatasi mo au ki le Evaselio, ofaipe se fanau mo lona tamana. 23Koia e kau amanaki malie ai ke kakau atu a ia kia koutou, mo ka kau iloa totonu loa le nea leia ka fai loa kiate au.

24Kae e kau maua le fanaki leinei i le Aliki e vave foki laku natu, a au totonu kia koutou.

25Na kau manatu e aoga ke kakau atu kia koutou loku taina ko Epafolotito, loku kaukau soa i le gaoi ti mo le tau, leia kua kotou fakakaku mai ai kiate au le tokoi leia na aoga kiate au. 26Talie na manatu lasi a ia kia koutou fuli, ti na mamae lasi ai a ia o tupu ko lakotou iloa lona masaki. 27Talie na masaki a ia, ti na teiteiki a ia ke mate ; kae na manavaalofa le Atua kiate ia, ti na leaise gato fua kiate ia, kae kiate au foki, talie ke aua na kau maua ni iki mamae i le oki o la mamae. 28Koia na kau kakau fakatavili atu ai a ia kia koutou, o tupu ke kotou fiafia i lakoutou toe tio kiate ia, ti ke teifo ai loku mamae. 29Koia kotou tali a ia i le Aliki i se fiafia katoa, ti kotou fakamauiga a tau tagata fenaaki. 30Talie ko le gaoi kia Kilisito leia na tupu ai lana ofi ki le mate, o leaise mamae a ia ki lona mauli, o tupu ke fetogi e ia koutou i le tokoi leia na leaise mafai ke kotou aumai kiate au.

Currently Selected:

Filipe 2: FB2000

Highlight

Copy

Compare