Numelo 16
16
Agatuu a Kole, mo Tatane,
mo Apilame
1Ti ko leinei na agatuu loa a Kole, vosa o Isa, vosa o Keasi, vosa o Levi, mo Tatane mo Apilame, vosa o Eliape, mo Oni, vosa o Peleti, ko vosa toka tolu latou o Lupeni. 2Na lotou fakatutuu loa kia Moisese, mo tagata e tino lelau lua tino lima o fanau a Iselaele, ko ni pule o le fakatasi, ko ni iki o latou ala na kau i le fono ti na kau ki le kau tagata mauiga o Iselaele. 3Na lotou fakatasi loa o fakatutuu kia Moisese mo Alone, ti na lotou pati loa kia laua : Kua lasi ai lakoulua fia pule kia matou ! talie e maokioki le fakatasi katoa, e motou maokioki fuli, ti e nofo le Eteleno i loto malie o lona kakai, ti e nofo le Eteleno i loto malie o latou. Kolea e kolua malaga ai i aluga o le fakatasi a le Eteleno ?
4I le logo a Moisese ki le nea lena na fakavilo loa a ia o fakapulou ona mata i le kele. 5Na masau loa a ia kia Kole mo lana kakai katoa, o pati : I le usu apogipogi, e fakasa loa e le Eteleno pe ko ai leia kua filifili e ia, pe ko ai leia kua fakanofo e ia ke fakafeofi kiate ia. E fakafeofi ake loa e ia kiate ia leia ka filifili loa e ia. 6Ke kotou fai loa le nea leinei, e koe Kole mo lau kakai katoa : Ke kotou too ni ipu tutuaga kaloni. 7I apogipogi, ke kotou tuku ki ai se afi, ti ke kotou liligi ki aluga se kaloni i mua o le Eteleno ; ti ko le tagata leia e filifili loa e le Eteleno, ko ia leia e maokioki loa. Kua feauga le loto lasi, ei fanau a Levi ! 8Na pati loa Moisese kia Kole : Kotou fakalogo mai loa, ei vosa o Levi ! 9Pe ko se nea noa kia koutou ke filifili koutou e le Atua o Iselaele i le fakatasi katoa o Iselaele, ke kotou fakafeofi kiate ia, o tupu ke kotou gaoi ki le tapenakulo o le Eteleno, ti ke kotou tutuu i mua o le fakatasi o tausi kiate ia ? 10Na fakafeofi e ia koutou kiate ia, a koe mo ou fetaina fuli, fanau a Levi, ti e kotou toe loto foki ki le gaoi fakapelepitelo ! 11Talie ko le tupuaga lena o lau fakafesagai mo lou kakai ki le Eteleno ! Talie ko ai Alone ke kotou lauveli ai kiate ia ?
12Na kakau loa e Moisese se tasi ke ano o afa ake Tatane mo Apilame, vosa o Eliape, kae na la tali loa : E leaise ma pale loa ! 13Pe leaise feauga kiate koe, Moisese, ke ke fakamavae matou i se fenua leia na tafe ai le sua manu mo le sua meli ke motou mamate i le toafa leinei, kae ko leinei e leaise gato lau pulei matou ? 14Ti e leaise ko se fenua leia e tafe ai le sua manu mo le sua meli na ke taki matou ki ai, ti e leaise ko ni faisaga magiti mo ni faisaga vite ala na ke soli mai kia matou. Pe ke masalo e kivi a mata o le kakai leinei ? E leaise ma pale atu loa !
15Na ita lasi ai Moisese, ti na pati loa a ia ki le Eteleno : Aua na ke tali alatou moliga. Na leaise kau too se asino fua e tasi ia latou, ti na leaise kau fai se nea veli fua e tasi ki se toka tasi o latou.
16Na pati loa Moisese kia Kole : Ko koe mo lou kakai, ke kotou fakatasi i le aso apogipogi i mua o le Eteleno, a koe mo latou, mo Alone. 17Ke kotou tasi too loa lana ipu tutuaga kaloni, ti ke kotou liligi loa ki aluga se kaloni, ti ke kotou tuku loa akoutou ipu tutuaga kaloni i mua o le Eteleno : E maua loa ni ipu tutuaga kaloni e kau lelau e lua kau lima ; ko Alone mo koe, e kolua too loa akoulua ipu tutuaga kaloni taki tasi. 18Na lotou tasi too loa lana ipu tutuaga kaloni, ti na lotou tuku loa ki ai le afi, ti na lotou liligi loa ki ai le kaloni, ti na lotou ano loa o tutuu i mua o le falela tapu mo Moisese mo Alone. 19Ti na fakatasii ake loa e Kole le fakatasi katoa kia Moisese mo Alone, i le uluaga o le falela tapu. Ti na sa loa le kololia o le Eteleno ki le fakatasi katoa. 20Ti na masau loa le Eteleno kia Moisese mo Alone, o pati : 21Kolua mavae kese i le fakatasi leinei, ti e kau tamate loa a ia i se temi e tasi. 22Na la fakapulou loa o fakatuu ola mata ki le kele, o pati : Ei Atua, ko le Atua o laumalie o kanofi fuli ! ko le tagata fai e toka tasi leia kua agasala, ti e ke sausaua loa ki le fakatasi katoa ? 23Na masau loa le Eteleno kia Moisese, o pati : 24Masau ki le kakai, o pati : Ke kotou fakamamao mei le nofoaga o Kole, mo Tatane, mo Apilame.
25Na tuu ake loa Moisese ki aluga, o ano kia Tatane mo Apilame ; ti na mulimuli loa le kau fakamatuatua o Iselaele iate ia. 26Na masau loa a ia ki le fakatasi, o pati : Ke kotou fakamamao mei falela o tagata agaveveli ana ti ke aua na kotou fafa fua ki se nea e tasi o alatou nea, ke aua na kotou mamate fakatasi loa mo latou, o tupu ko alatou agasala fuli. 27Na lotou fakamamao loa mei le nofoaga o Kole, mo Tatane, mo Apilame. Na mavae ake loa Tatane mo Apilame, o tutuu i mua o ola falela, mo ola avaga, mo ola vosa, ti mo ola makopuna.
28Na pati loa Moisese : I le nea leinei e kotou iloa ai loa ko le Eteleno totonu leia na kakau ia mai au o fai a nea fuli anei, ti na leaise kau fai ia fua se nea e tasi i loku loto toka tasi. 29Kapau e mate loa a kakai anei ofaipe le mate a tagata fuli, ti kapau e soko loa kia latou le nea leia e soko ki kakai fuli, ti na leaise ko le Eteleno leia na kakau ia mai au ; 30kae kapau e fai loa e le Eteleno se nea foou, kapau e fakamavaa loa e le kele lona gutu, o folo latou mo alatou nea fuli, ti kapau e lotou ifo mauli loa ki le fenua o le kau mate, ti e kotou iloa loa i ai kua tiaki e le kakai leinei le Eteleno. 31I le oki o lana fakasa a masau fuli ana, na mafaa loa le kele i vae o Tatane mo Apilame.
32Na fakamavaa loa e le kele lona gutu, o folo laua, laua mo ola famili, ti mo le kakai fuli o Kole mo alatou nea fuli. 33Na lotou ifo mauli loa ki le fenua o le kau mate, latou mo alatou nea fuli. Na toe mapono loa le kele i aluga o latou, ti na lotou puli loa i loto malie o le fakatasi. 34Na sosola loa fanau fuli o Iselaele, ala na tutuu o takatakai latou, i le logo ki alatou tagi, talie na lotou pati loa : Tou sosola na folo tatou e le kele ! 35Na au loa se afi mei le Eteleno, o tutu le kau tagata e tino lelau lua tino lima, leia na momoli ia le kaloni.
Lauveli o le kakai kia Moisese mo Alone
36Na masau loa le Eteleno kia Moisese, o pati : 37Masau kia Eleasale, vosa o le tagata faisakilifisio ko Alone, ke too e ia mei le afi a ipu tutuaga kaloni ti ke laku e ia a malala kaka ki mamao, talie kua fakatapui a ipu ana. 38Ki ipu o tagata ana ala na agasala o lotou mamate ai, e ke fai loa ki ai ni laui ukamea lalasi ke faliki ai le aletale. E lotou fai loa pe ni fakamailoga ki fanau o Iselaele, talie na momoli latou ki le Eteleno. 39Na too loa e le tagata faisakilifisio ko Eleasale a ipu kapa tutuaga kaloni o latou ala na tutu mauli, ti na tuki loa e ia latou ki le amale o fola i aluga o le aletale.
40Ko se fakamanatu a ia ki fanau a Iselaele, o tupu ke aua na fakafeofi se tasi leia e leaise kau ki le sakoga o Alone, o momoli se kaloni i mua o le Eteleno, ti ke aua na fai loa a ia pe Kole mo lona kakai, o mulimuli ki le nea leia na fakasa e le Eteleno ia Moisese.
41I le apogipogi ake fai, na lalau loa le fakatasi katoa o Iselaele kia Moisese mo Alone, o pati : Ko koulua ala na tamate ia le kakai o le Eteleno. 42Na lolotoga tanaki ake loa le fakatasi katoa kia Moisese mo Alone, ti na lotou maliu loa o agaaga ki le fetuu o le falela tapu, ti na lotou tio loa kua kofu katoa a ia e le ao, ti na sa loa le kololia o le Eteleno. 43Na ano loa Moisese mo Alone ki mua o le falela tapu. 44Ti na masau loa le Eteleno kia Moisese, o pati : 45Ke kolua fakamamao mei le fakatasi lena, ti e kau tamate loa latou i se temi e tasi. Na la fakapulou loa ki le kele ; 46ti na pati loa Moisese kia Alone : ke ke too loa lau ipu tutuaga kaloni, ti e ke tuku loa ki ai ni malala kaka mei le aletale, ti e ke liligi loa ki ai se kaloni, ti e ke ano fakatavili loa ki le fakatasi, ti e ke fai loa kia latou le sakilifisio o le fakamalie ; talie kua mapaa le sausau o le Eteleno, ti kua kamata le malaia. 47Na too loa e Alone lana ipu tutuaga kaloni, o mulimuli ki le pati a Moisese kiate ia, ti na makape loa a ia ki loto malie o le fakatasi ; ti ko leinei kua kamata foki le malaia i le fakatasi. Na momoli loa e ia le kaloni, ti na fai loa e ia le fakamalie ki le kakai. 48Na ano loa a ia o tuu i le vasa o latou ala kua mamate ti mo latou ala koi mauuli, ti na taofi ai loa le malaia. 49Ko latou ala na mamate i le malaia lena ko le tino agafulu tupu fa afe tino lelau fitu (14 700), na leaise lau i ai latou ala na mamate o tupu ko Kole. 50Na toe liliu loa Alone kia Moisese, i le uluaga o le falela tapu. Kua taofi loa le malaia.
Currently Selected:
Numelo 16: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
