Maleko 6

Ano fakaoki ki Nasaleti

1Na mavae loa Sesu mei ai, o ano ki lona fenua. Na muli loa ana tisipulo iate ia.

2I le soko mai loa o le sapato, na akonaki loa a ia i le sinakoka. Ti na ofolele le kakai toka api leia na fakalogo kiate ia, o pati : E maua e ia meifea a nea fuli ana ? Ko le poto fea lena kua tuku kiate ia, ti ko le pule feaki lena e fai ai e ia a milakulo ana ? 3Pe se ko le tagata fau fale a ia, le tama o Malia, le taina o Sakopo, mo Sosefo, mo Suta, ti mo Simone ? Ti ko ona tuagaane, pe leaise lotou nonofo i leinei mo tatou ? Ti na leaise lotou tui kiate ia.

4Kae na pati loa Sesu kia latou : E nukinukii le polofeta i lona fenua totonu, mo lona fale, ti mo lona famili. 5Na leaise mafai loa ke fai e ia i ai se milakulo e tasi, kae na teki fua e ia ona lima ki ni iki masaki, o fakamauli latou. 6Ti na ofolele a ia ki lolatou tui gataa.

Gaoi a le tino agafulu tupu lua

Na folii e Sesu a kolo i le takatakai, o akonaki.

7Na kalagai loa e Sesu le tino agafulu tupu lua, ti na kamata kakau loa e ia latou taki toka lua, ti na soli loa e ia kia latou le pule ki laumalie veli. 8Na fakatotonu loa e ia kia latou : ke aua na lotou too se nea ki le fanoga, kae gato fua ki se tokotoko ; ke aua na lotou too se pane, pe ko se taga, pe ko se paaga i olatou kilipipi ; 9kae ke lotou tui ni taka, ti ke aua na lotou tui ni kofu e lua.

10Ti na pati loa a ia kia latou : I se fale leia e kotou ulu loa ki ai, kotou nofo i ai o kaku ki lakoutou mavae i le ganea lena. 11Ti kapau e i ai i se ganea ni kakai ala e leaise tali ia koutou pe leaise fia logo kia koutou, kotou mavae i ai, ti kotou tutuui le efu i okoutou vae, o tupu ke liliu le nea lena ko se fakamaoki kia latou.

12Na lotou ano loa, ti na lotou akonaki loa ki le fakasemala. 13Na lotou kapu ni temonio toka api, ti na lotou takai lolo ni masaki toka api ti mo fakamauli latou.

Tukipo o Soane-Patita

14Na logo loa le sau ko Elote ki le masau kia Sesu, talie na logologona lona igoa, ti na pati loa a ia : Ko Soane-Patita lena kua toe tuuake mei le kau mate, ti ko le tupuaga lena o lana fai milakulo. 15Na pati ni iki : Ko Elia. Ti na pati ni iki : Ko se polofeta ofaipe se tasi o le kau polofeta. 16Kae na pati Elote i lana logo ki le nea lena : Ko le Soane leia na kau fakatotonu ke tuuti lona ulu, ko ia lena kua toe tuuake mei le kau mate.

17Talie ko Elote totonu leia na fakatotonu ia ke too Soane, ti ke sai a ia, o tuku ki le fale pilisoni, o tupu ko Elotiasi, avaga o Filipo, lona taina, leia na toe avaga mo ia, 18kae na pati Soane kiate ia : E leaise taga ke ke nofo mo le avaga o lou taina. 19Koia na ita ai Elotiasi kia Soane, o loto ke tamate a ia. 20Kae na leaise mafai e ia o tupu ko Elote. Ti na i Elote kia Soane, talie na iloa e ia ko se tagata agamalie a ia mo maokioki ; ti na puipui e ia Soane. I lana logo kiate ia, na tua lasi le mamae o lona loto, kae na fia logo tuumau a ia kiate ia.

21Kae na soko loa ki se aso faigamalie, ko le aso fakamanatu a ia o le tupu o Elote. Na fai loa e Elote se kaitasi ki lana kau lalasi, mo le kau pule solia ti mo le kau tagata mauiga o Kalilea. 22Na ulu ake loa le taine o Elotiasi ki le kogafale ; ti na mako loa a ia, ti na malie loa a ia kia Elote mo lana kau fakaafe. Ti na pati loa le sau ki le taine : Kole mai kiate au le nea leia e ke loto ki ai, ti e kau soli atu loa a ia kiate koe. 23Na toe fakapapau foki a ia kiate ia, o pati : Ko le nea leia e ke kole mai loa kiate au, tatau foki pe ko le vaelua o loku puleaga, e kau soli atu loa a ia kiate koe. 24Na ulu loa le taine mei le kogafale, o pati ki lona tinana : Kolea loa le nea leia e tonu ke kau kole ? Ti na tali loa lona tinana : Ko le fa ulu o Soane-Patita. 25Na ulu fakatavili aifai le taine ki le sau, o fai kiate ia le kole leinei : E kau loto ke ke soli mai nei kiate au, i se pa, le fa ulu o Soane-Patita. 26Na mamae lasi loa le sau ; kae o tupu ko ana fakapapau ti mo le kau fakaafe, na leaise loto loa a ia ke fakafiti. 27Na kakau aifai e ia ki le fale pilisoni se tagata leo, mo le fakatotonu ke aumai le fa ulu o Soane-Patita. 28Na ano loa le tagata leo o tuuti le fa ulu o Soane i le fale pilisoni, o aumai i se pa. Na soli loa e ia a ia ki le taine, ti na soli loa a ia e le taine ki lona tinana. 29I le logo a tisipulo a Soane ki le nea lena, na lotou au loa o too le tino o Soane-Patita, o tuku ki se tanuma.

Liuga o pane ki tagata e tino lima afe

30Na fakatasi mai loa le kau apositolo kia Sesu, ti na lotou fakamatala loa kiate ia a nea fuli ala na lotou fai ti mo nea fuli ala na lotou akonaki ki ai. 31Na pati loa Sesu kia latou : Kotou au ki se ganea lavaki, o malolo fakaikiiki. Talie na toka api latou na ano mo latou na au, ti na leaise lotou maua fua se ga temi ke kai ai.

32Na lotou ano loa i se vaka ki se ganea lavaki. 33Ti na tio loa se kakai ki lalatou ano, ti na lotou iloa ia loa latou, ti na lotou fai makape mai loa i uta mei kolo fuli, o muamua ia latou ki le ganea leia na lotou ano ki ai. 34I lana ifo i le vaka, na tio loa Sesu ki se kakai lasi, ti na aloalofa loa a ia kia latou, talie kua lotou faipe ni ovi ala e leaise maua ia se tagata tausi ovi ; ti na kamata ako loa e ia kia latou ni nea mauke.

35Ti kua teitei oki le aso, na fakafeofi ake loa ana tisipulo kiate ia, o pati : E lavaki le ganea leinei, ti kua teitei oki le aso ; 36kakau le kakai ke ano ki nofoaga uta mo kolo liliki i le takatakai, o totogi se nea ke kai. 37Na tali loa Sesu kia latou : Kotou soli e koutou totonu kia latou se nea ke kai. Kae na lotou pati loa kiate ia : Pe motou ano loa o totogi mai ni pane ki ni fa tenalio e kau lelau lua, ti motou soli loa kia latou ke kai ? 38Ti na pati loa Sesu kia latou : Pe fia a fa pane ala e kotou maua ? Kotou ano o tioi. Na lotou afaafa totonu loa, ti na lotou tali loa : E lima, mo ika e lua. 39Ti na fakatotonu loa e Sesu kia latou ke fakanofo ki lalo le kakai katoa o fakamuimuiga i le mutie sesega, 40ti na lotou tonatona loa, i ni atu e taki tino lelau mo tino lima. 41Na too loa e Sesu a fa pane e lima mo ga ika e lua, ti na tagaki loa ona mata ki le lagi, o fakafetai. Ti na tofitofi loa e ia a fa pane, o soli ki le kau tisipulo, ke lotou tufa ki le kakai. Na toe vae foki e ia a ga ika e lua kia latou fuli. 42Na lotou kai fuli loa ti na lotou makokona loa, 43ti na ave loa ni polapola e kau agafulu tupu lua kua apele i potu pane mo toei ika. 44Ko latou ala na kai ia a pane ko tagata e tino lima afe.

Saele a Sesu i le tai

45I le oki fai o le nea lena, na fakamaua loa e Sesu ana tisipulo ke sopo ki le vaka, o muamua iate ia ki leia ake fetuu, ki Petesaita, kae kakau e ia totonu le kakai. 46I le oki o lana kakau le kakai, na ano loa a ia ki le mauga, o faikole.

47Ti kua soko le afiafi, ti kua kaku le vaka ki loto malie o le tai, ti na nofo toka tasi Sesu i uta. 48Na tio loa a ia kua lotou pakia ai i le foe ; talie na fakatau le matagi kia latou. I le vae ola tolu mafoata, na ano loa a ia kia latou, o saele i aluga o le tai, ti na fia fakalaka loa a ia ia latou. 49I lalatou tio ki le saele a Sesu i le tai, na lotou pati loa : Ko se tuuola, ti na lotou kalaga ; 50talie na lotou tio fuli kiate ia, ti na lotou i. I le lakaga fai lena na masau loa Sesu kia latou, o pati : Kotou fimalie, ko au, aua na kotou i ! 51Ti na ano loa a ia kia latou, o sopo ki le vaka, ti na malu loa le matagi. Na lotou ofolele fuli loa i olatou loto mo apele i le i. 52Talie na leaise lotou matala ki le milakulo o pane, o tupu na fefeka ai olatou loto.

Fakamauli o kau masaki i Senesaleti

53I le oki o lalatou fakalaka i le tai, na lotou tau loa ki le fenua ko Senesaleti, ti na lotou pale loa i ai. 54I lalatou ifo i le vaka, na iloa aifai Sesu e le kakai, 55ti na lotou ano loa i le fenua katoa lena, ti na kamata aumai loa a masaki i ni palepale, ki ganea fuli ala na logo kua i ai Sesu. 56I ganea fuli na kaku a ia ki ai, i kolo liliki, mo kolo lalasi, ti mo nofoaga uta, na tuku a masaki i lapalasi fakafenua, ti na kole kia Sesu ke fakataga ake fua ke lotou lave ki le tapatapa o lona kofu. Ti na mauli loa latou fuli ala na lave kiate ia.

Currently Selected:

Maleko 6: FB2000

Highlight

Copy

Compare