Maleko 5

Fakamauli o se tagata avagaia i Katala

1Na lotou kaku ki leia atu fetuu o le tai, ki le fenua o le kau Katala. 2I le lakaga fai leia na ifo ai loa Sesu i le vaka, na au loa se tagata ki ona mua, leia na ulu mei ni tanuma, talie na nofo iate ia se laumalie veli. 3Na maua e le tagata lena lona nofoaga i tanuma, ti na leaise se mafai e se tasi ke sai ia a ia ki ni kaui tini. 4Talie kua tua lasi le tau sai o ona vae ki ni ukamea ti mo ona lima ki ni kaui tini, kae na motumotusi e ia a kaui tini ti na fatifatii e ia a ukamea, ti na leaise mafai e se tasi lona fakalalata. 5Na nofo tuumau a ia, i le pouli mo le ao, i tanuma ti mo mauga, o tagi, mo tafatafai lona kuaga ki ni fatu. 6I lana tio kia Sesu mei mamao, na makape loa a ia, o tulolo i ona mua, 7ti mo tagi leo lasi : Kolea au kiate koe, Sesu, Alo o le Atua taualuga ? E kau kole fakamakeke atu kiate koe i le suafa o le Atua, aua na ke fakamamae au. 8Talie na pati Sesu kiate ia : Mavae i le tagata lena, laumalie veli ! 9Ti na vesili loa Sesu kiate ia : Ko ai lou igoa ? Na tali loa a ia kia Sesu : Ko loku igoa ko Lesio, talie e motou toka api. 10Ti na kolekole loa a ia kia Sesu ke aua na kapu e ia latou i le fenua. 11Na i ai i le ganea lena, o ofi ki le mauga, se kau puaka lasi leia na fagai. 12Ti na kole loa e le kau temonio kiate ia, o pati : Kakau matou ki puaka ana, o tupu ke motou ulu kia latou. 13Na fakataga loa e ia kia latou le nea lena. Ti na mavae loa a laumalie veli, o ulu ki puaka, ti na fekapu mai loa le kau puaka i le fetuu o le mauga, o maluluku ki le tai : (Na maua ni puaka e lua afe), ti na lotou malelemo fuli loa i le tai. 14Ko latou ala na fagai ia a puaka na fesolaki loa, ti na lotou fakamafola loa le logo i le kolo ti mo kolo uta. Na ano loa le kakai o tio ki le nea kua soko. 15Na lotou au loa kia Sesu, ti na lotou tio loa ki le tagata leia na nofo ai le lesio kua tonatona, kua teuteu, ti kua malama lona atamai ; ti na lotou i lasi loa. 16Ko latou ala na tio ki le nea leia na soko na fakamatala ia loa a ia kia latou le nea leia na soko ki le tagata avagaia ti mo le kau puaka. 17Ti na lotou kolekole loa kia Sesu ke mavae i lolatou fenua.

18I lana sopo ki le vaka, na kole ake loa kiate ia e le tagata leia na avagaia ke fakataga ake kiate ia ke nofo mo ia. 19Na leaise fakataga loa e Sesu kiate ia le nea lena, kae na pati loa a ia kiate ia : Ano ki lou fale, ki lou famili, ti ke fakamatala kia latou a nea fuli ala na fai e le Aliki kiate koe, pe na feaki lona manavaalofa kiate koe. 20Na ano loa a ia, o kamata fakasa i le Tekapole a nea fuli ala na fai e Sesu kiate ia. Ti na ofolele a kakai fuli.

Le taine o Sailusi ; mo le fafine pupuke

21Na toe liliu loa Sesu i le vaka ki leia ake fetuu o le tai, ti na fakatasi loa se kakai lasi kiate ia. Na nofo a ia i le mata tai. 22Ti na au loa se tasi o le kau pule o le sinakoka, ko Sailusi lona igoa : i lana tio kia Sesu, na fakapulou loa a ia ki ona vae, 23o fai kiate ia le kole makeke leinei : Kua vave mate fua loku taine ; au, o teki kiate ia ou lima, o tupu ke ke fakamauli a ia, ti e mauli loa a ia. 24Na ano loa Sesu mo ia. Ti na muli loa iate ia se kakai toka api, leia na teke ia a ia mei potu fuli.

25Ti na i ai se fafine leia na pupuke talu mei fetuu e kau agafulu tupu lua. 26Na mamae lasi ai le fafine lena i lima o ni toketa toka api, ti na puli lasi a ia i lolatou totogi, kae na leaise maua fua e ia se ga fimalie, ti na asilisili ake lona veli. 27I lana logo ki le masau kia Sesu, na au loa a ia i loto malie o le kakai mei muli, o lave ki lona kofu : 28Talie na pati a ia : Kapau e mafai fua ke kau lave ki lona kofu, ti e kau mauli loa. 29I le lakaga fai lena na gato loa lona pupuke, ti na logoi loa e ia i lona tino kua mauli a ia i lona masaki. 30Na iloa loa e Sesu iate ia i le lakaga fai lena na mavae se makeke meiate ia ; ti na mafuli loa a ia ki le kakai, o pati : Ko ai leia na lave mai ki loku kofu ? 31Na pati loa ana tisipulo kiate ia : E ke tio ki le kakai leia e feteke ia a koe, ti e ke pati : Ko ai leia na lave mai kiate au ? 32Ti na tio saele a ia ki ona tafatafa ke tio ki leia na fai ia le nea lena. 33Na i lasi ai le fafine ti na lulu loa a ia i lana iloa le nea leia kua soko kiate ia, ti na au loa a ia o punou i vae o Sesu, o fakasa kiate ia le maoki katoa. 34Kae na pati loa Sesu kiate ia : Ei loku taine, kua saofaki a koe e lau tui ; ano i le tokamalie, talie kua ke mauli i lou masaki.

35I lana lolotoga masau, na kaku ake loa ni kakai mei le fale o le pule o le sinakoka, o pati : Kua mate lou taine ; kolea e ke toe fakapakia ai ki le pule ? 36Kae na leaise tokaga Sesu ki masau ana, ti na pati a ia ki le pule o le sinakoka : Aua na ke i, kae ke ke tui fua. 37Ti na leaise fakataga loa e ia ki se tasi ke ano mo ia, gato fai kia Petelo, mo Sakopo, ti mo Soane, taina o Sakopo. 38Na lotou kaku loa ki le fale o le pule o le sinakoka, ti na tio loa Sesu ki se kakai logoa mo ni iki e tagilaulau. 39Na ulu loa Sesu o pati kia latou : Kolea e kotou logoa ai, ti kolea e kotou fetagisi ai ? E leaise mate le toe, kae e moe a ia. 40Ti na lotou gologolo loa kiate ia. Ti na fakamavae loa e Sesu ki fafo le kakai katoa, ti na too loa e ia mo ia le tamana mo le tinana o le toe, ti mo latou ala na kau fanoga mai mo ia, ti na ulu loa a ia ki le ganea leia na tuku ai le toe. 41Na too loa e Sesu le lima o le toe, o pati kiate ia : Talitha koumi, ko lona uiga : E kau pati atu, taine, tuu ki aluga ! 42I le lakaga fai lena na tuu ake loa le taine ki aluga, o kamata saele ; talie na fetuu kau agafulu tupu lua a ia. Ti na lotou ofolele lasi loa. 43Na tuku loa e Sesu kia latou ni fakatotonu fakamakeke, ke aua na iloa e se tasi le nea ; ti na pati loa a ia ke soli se nea kai ki le taine.

Currently Selected:

Maleko 5: FB2000

Highlight

Copy

Compare