Maleko 11

Ulu o Sesu ki Selusalemi

1Ti kua lotou ofi loa ki Selusalemi, o soko ki Petefase mo Petania, i le mauga o Oliveto, ti na kakau loa e Sesu se toka lua o ana tisipulo, 2o pati kia laua : Kolua ano ki le kolo leia e tuu i okoulua mua ; ti ka kolua ulu loa ki ai, e kolua maua loa se uviki asino kua sisi, ti e leikiaise se eke ki ai se tagata ; kolua tatala a ia, o aumai a ia. 3Kapau e pati atu loa se tasi kia koulua : Kolea e kolua fai ai le nea lena ? Kolua tali : E aoga a ia ki le Aliki. Ti e tuku loa e ia le uviki asino i le lakaga fai lena ke au ki leinei.

4Na ano loa a tisipulo, ti na la maua loa le uviki asino kua sisi i fafo o ofi ki se matapa, i se mapiko o le ala, ti na la tatala loa a ia. 5Ko ni iki o latou ala na nonofo i ai na pati loa kia laua : Kolea e kolua fai ? Kolea e kolua tatala ai le uviki asino ? 6Na la tali loa ofaipe le pati a Sesu kia laua. Ti na tuku loa ke la ano mo le asino. 7Na la taki loa le uviki asino kia Sesu, ti na la folasi loa i aluga o le asino ola kofu ; ti na eke loa Sesu ki ai. 8Na fola loa e se kakai toka api olatou kofu i le ala, ti na tuuti loa e iki ni laai laakau, o faliki i le ala. 9Ko latou ala na ano i mua ti mo latou na au i muli o Sesu, na kalaga : Osana ! Manuia leia e saele mai i le suafa o le Aliki ! 10Manuia le puleaga leia e au, le puleaga o lotatou tamana ko Tavite ! Osana i potu taualuga !

11Na ulu loa Sesu ki Selusalemi, ki le fale tapu : I le oki o lana tioi a nea fuli i ai, ti kua soko mai le afiafi, na ano loa a ia ki Petania mo le tino agafulu tupu lua.

Le fiki paa

12I leia ake a aso, i lalatou mavae mei Petania, na fia kai loa Sesu. 13I lana tio mei mamao ki se fiki laulau, na ano loa a ia o tio pe maua i ai se nea ; ti e i lana fakafeofi ki ai, na maua loa e ia ni lau ata, talie e leaise ko le temi a ia o fiki. 14Na pati loa a ia ki le fiki : Ke aua na kai fua se tasi ki lou fua ! Ti na logo loa ana tisipulo ki ai.

Kapu o le kau fai koloa i le fale tapu

15Na lotou kaku loa ki Selusalemi, ti na ulu loa Sesu ki le fale tapu. Na kapu loa e ia latou ala na fai fakatau mo totogi nea i le fale tapu ; na tekai loa e ia a laupapa a le kau fetogi paaga, ti mo ekeekeaga o le kau fakatau lupe ; 16Ti na leaise tuku e ia se tasi ke ano mo se kavega i le fale tapu. 17Ti na akonaki a ia, o pati : Pe se tosi : E igoa loa loku fale ko se fale faikole ki puleaga fuli ? Kae ko koutou, kua kotou fakaliliu a ia ko se ana o tagata kaia.

18Ko le kau pule faisakilifisio mo le kau sekelipa, i lalatou logo kiate ia, na afa ia loa ni puleaki ke tamate a ia ; talie na lotou i kiate ia, o tupu kua ofo le kakai katoa i lana akonaki.

19I le au o le afiafi, na mavae loa Sesu i le kolo.

Le kole a le tui

20I le usu, i lalatou fakalaka i le ala, na tio loa le kau tisipulo ki le fiki kua malo o kaku ki ona aka. 21Ti na fakamanatu loa e Petelo le nea na soko, o pati kia Sesu : Pule, tio, kua malo le fiki leia na ke tutuku ia. 22Na masau loa Sesu, o pati kia latou : Kotou tui ki le Atua. 23E kau pati maoki atu kia koutou, kapau e pati se tasi ki le mauga lena : Mavae mei lena, o vilo ki le tai, ti kapau e leaise lotolotolua fua a ia i lona loto, kae tui a ia e soko le nea leia e pati a ia ki ai, ti e tio loa a ia ki le soko o le nea lena. 24Koia e kau pati atu ai kia koutou : Ko nea fuli ala e kotou kole loa i le faikole, kotou tui kua kotou maua latou, ti e kotou tio loa ki lolatou fakasoko. 25Ti ka kotou tuu i aluga o faikole, kae kotou nofo mo se nea ki se tasi, kotou fakamolemole, o tupu ke fakamolemole foki akoutou agasala e lokoutou Tamana leia e nofo i le lagi. 26Kae kapau e leaise kotou fakamolemole, e leaise fakamolemole foki e lokoutou tamana leia e nofo i le lagi akoutou agasala.

Le fakavisi o le pule a Sesu

27Na lotou toe ano loa ki Selusalemi. I le evaeva a Sesu i le fale tapu, na au loa kiate ia le kau pule faisakilifisio, mo le kau sekelipa, mo le kau fakamatuatua, 28o pati : Ko le pule fea leia e ke fai ai a nea ana, ti ko ai leia na soli ia atu kiate koe le pule ke fai ai a nea ana ? 29Na tali loa Sesu kia latou : E kau toe fai atu foki kia koutou se vesili ; kotou tali mai ki ai, ti e kau fakasa atu loa pe ko le pule fea leia e kau fai ai a nea anei. 30Pe au le papitema a Soane mei lagi pe mei le tagata ? Kotou tali mai kiate au. 31Kae na lotou pati loa ia latou : Kapau e tou tali : Mei lagi, e pati loa a ia : Kolea loa na leaise kotou tui ai kiate ia ? 32Ti kapau e tou tali : Mei tagata… Na lotou tuania ia le kakai, talie na taofi fuli latou ko se polofeta maoki a Soane. 33Ti na lotou tali loa kia Sesu : E leaise motou iloa. Na pati loa Sesu kia latou : Mo au foki, e leaise kau fakasa atu loa kia koutou pe ko le pule fea leia e kau fai ai a nea anei.

Currently Selected:

Maleko 11: FB2000

Highlight

Copy

Compare