Maleko 10

Le mavete avaga

1Na mavae loa Sesu i ai, o ano ki le fenua o Sutea i leia ake fetuu o le Solotane. Na toe fakatasi loa le kakai kiate ia, ti na toe akonaki loa a ia kia latou ofaipe lana fai masani.

2Na fakafeofi ake loa le kau faliseo kia Sesu ; i lalatou fia asiasii a ia, na lotou vesili loa kiate ia pe taga ke kapu e se tagata lana avaga. 3Na tali loa Sesu kia latou : Kolea na fakatotonu atu e Moisese kia koutou ? 4Na lotou pati loa, na fakataga e Moisese ke fai se tosi mavete ti ke kapu le avaga. 5Na pati loa Sesu kia latou : Na tuku e Moisese le fakataga lena, o tupu ko le fefeka o okoutou loto. 6Kae i le kamataaga o le fakatupu o le malama nei, na fakatupu e le Atua le tagata mo le fafine ; 7Koia e mavae ai loa le tagata mei lona tamana mo lona tinana, ti e pipiki loa a ia ki lona avaga, 8ti e la liliu loa ko se tino e tasi. Koia e leaise koi la toka lua, kae kua la liliu ko se tino e tasi. 9Ke aua na veteki e le tagata le nea leia kua sai e le Atua. 10I lalatou nonofo i fale, na toe fakavesilii loa a ia e le kau tisipulo ki le nea lena. 11Ti na pati loa Sesu kia latou : Ko le tagata leia e kapu ia lona avaga kae toe avaga a ia mo se tasi ake fafine, e tono loa a ia ki le uluaki fafine ; 12Ti kapau e mavae se fafine mei lona avaga o toe avaga mo se tasi ake tagata, e tono loa le fafine lena.

Na tapuaki e Sesu a toe liliki

13Na aumai loa kiate ia ni toe liliki, o tupu ke fafa a ia kia latou. Kae na taofi loa e le kau tisipulo latou ala na aumai ia a toe liliki. 14I le tio a Sesu ki le nea lena, na mamae ai, ti na pati loa a ia kia latou : Kotou tuku ke au kiate au a toe liliki, kae aua na kotou taofi latou ; talie e fakalogo le puleaga o le Atua kia latou ala e tatau mo toe liliki. 15E kau pati maoki atu kia koutou, ko leia e leaise tali ia loa le puleaga o le Atua ofaipe se ga toe ikiiki e leaise ulu loa a ia ki ai. 16Ti na luluku loa e ia latou i ona lima, ti na tapuaki loa a ia kia latou, o teki ona lima kia latou.

Le tagata tupulaga mou koloa

17I le fanoga a Sesu i le ala, na makape mai loa se tagata, o tutuli i ona mua, o vesili kiate ia : Pule malie ai, kolea le nea leia e tonu ke kau fai ke maua ai le mauli lee gato ? 18Na pati loa Sesu kiate ia : Kolea e ke fakaigoa ai au malie ? Ko le Atua toka tasi e malie. 19E ke iloa a fakatotonu : Aua na ke tono loa mo se fafine ; aua na ke tukipo loa ; aua na ke kaia loa ; aua na ke fakamaoki loi loa ; aua na ke fai loa se nea veli ki se tasi ; fakaapaapa ki lou tamana mo lou tinana. 20Na tali loa a ia kia Sesu : Pule, na kau fai a nea fuli ana talu mei loku ikiiki. 21Na tio loa Sesu kiate ia, ti na alofa loa a ia kiate ia, o pati kiate ia : E puli le nea e tasi kiate koe ; ano, fakatau a nea fuli ala e ke maua, soli a ia ki le kau mativa, ti e ke maua loa se koloa i le lagi. Ti oki a ia, ti ke au, o muli mai iate au. 22Kae na mamae loa a ia o tupu ko le folafola lena, ti na ano loa a ia kua mamae lasi ; talie na lasi ai ona koloa. 23Na tagaki loa Sesu ki ona tafatafa, o pati ki ana tisipulo : E faigataa ai kia latou ala e mou koloa ke ulu ki le puleaga o le Atua ! 24Na ofolele loa le kau tisipulo i le masau lena a Sesu. Ti na toe masau loa a ia, o pati kia latou : Ei oku fanau, e faigataa ai kia latou ala e fanaki ki koloa ke ulu ki le puleaga o le Atua ! 25E faigaofie ake ki se kamelo ke ulu i le pu o se tui, i se tagata mou koloa ke ulu ki le puleaga o le Atua. 26Na toe ofolele lasi ake le kau tisipulo, o pati : Ti ko ai loa e feala ke saofaki ? 27Na tio loa Sesu kia latou, o pati : E leaise feala le nea a ia ki le tagata, kae e feala a ia ki le Atua : Talie e feala a nea fuli ki le Atua.

Fakapale o le agatonu ki le Atua

28Na pati loa Petelo kia Sesu : Ko leinei, kua motou tiaki a nea fuli, ti kua motou mulimuli iate koe. 29Na tali loa Sesu : E kau pati maoki atu kia koutou, e leaise tasi fua leia e tiaki ia, o tupu ko au ti mo le Evaselio, pe ko lona fale, pe ko ona fetaina, pe ko ona tuagaane, pe ko lona tinana, pe ko lona tamana, pe ko ana fanau, pe ko ona kele, 30e leaise tali ia o liuga kau lelau i le sekulo leinei, ni fale, mo ni taina, mo ni tuagaane, mo ni tinana, mo ni fanau, mo ni kele, ti mo ni fakaveliveli, ti mo le mauli lee gato i le temi ka au. 31E toka api i le kau muamua e mulimuli loa, ti e toka api i le kau mulimuli e muamua loa.

Fakasa o le mate mo le toe tuuake

32Na lotou fanoga i le ala ke pale ki Selusalemi, ti na ano Sesu i olotou mua. Na mamae le kau tisipulo, ti na lotou mulimuli iate ia mo se loto i. Ti na toe too loa e Sesu le tino agafulu tupu lua ki ona tafa, ti na kamata fakasa loa e ia kia latou le nea leia e tonu ke soko kiate ia : 33Ko leinei, e tou pale ki Selusalemi, ti e fakatau loa le Vosa o le tagata ki le kau pule faisakilifisio ti mo le kau sekelipa. E lotou fakatuaa loa a ia ki le mate, ti e lotou tuku loa a ia ki le kau pagani, 34ala e gologolo loa kiate ia, mo anuanu loa kiate ia, mo sasa loa a ia ki laakau, mo tamate loa a ia ; ti e i le sili o aso e tolu, e toe tuuake loa a ia.

Tali ki le vesili a Sakopo mo Soane

35Ko vosa o Sepeteo ko Sakopo mo Soane, na fakafeofi ake loa kia Sesu, o pati kiate ia : Pule, e ma loto ke ke fai kia maua le nea leia ka ma kole atu loa kiate koe. 36Na pati loa Sesu kia laua : Kolea le nea leia e kolua loto ke kau fai kia koulua ? 37Na la pati loa kiate ia, fakataga mai kia maua, ke tonatona se tasi i lou fetuu atamai ti ke tonatona se tasi i lou fetuu sema, mo ka ke nofo loa i lou kololia. 38Na tali loa Sesu kia laua : E leaise kolua iloa le nea leia e kolua kole. Pe mafai ke kolua inu le ipu leia e tonu ke kau inu, pe ke papitema koulua ki le papitema leia e tonu ke papitema ai au ? Na la pati loa : E ma mafai a ia. 39Ti na tali loa Sesu kia laua : E maoki e kolua inu loa le ipu leia e tonu ke kau inu, ti e papitema loa koulua ki le papitema leia e tonu ke papitema ai au ; 40kae ki le ekeeke i loku fetuu atamai pe ko loku fetuu sema, e leaise fakalogo a ia kiate au, ti e tuku fai a ia kia latou ala kua taofi ki ai le nea lena. 41I le logo a le tino agafulu ki le nea lena, na lotou kamata ita lasi loa kia Sakopo mo Soane. 42Ti na kalagai loa latou e Sesu, o pati : E kotou iloa ko latou ala kua fakanofo ko pule o puleaga e taki fakamakeke ia latou ; ti e faifaitalisa le kau lalasi kia latou. 43Ke aua na fenaaki ia koutou. Kae ko leia e loto ke lasi ia koutou, ke liliu a ia ko lakoutou tagata fakasausau ; 44ti ko leia ia koutou e loto ke pule, ke liliu a ia ko lakoutou tagata popula. 45Talie na leaise au le Vosa o le tagata ke fakasausau ake kiate ia, kae ke fakasausau mo soli lona mauli ke totogi ai le toka api.

Fakamauli o Palatimeo

46Na lotou kaku loa ki Seliko. Ti e i le mavae a Sesu mei ai mo ana tisipulo ti mo se kakai toka api, na tonatona i tafa o le ala le vosa o Time ko Palatimeo, ko se tagata kivi mo kaiisi. 47Na logo loa a ia ko Sesu mei Nasaleti, ti na kamata kalaga loa a ia : Vosa o Tavite, Sesu, alofa mai kiate au ! 48Na taofi a ia e se toka api ke fakalologo ; kae na kalaga leo lasi a ia : Vosa o Tavite, alofa mai kiate au ! 49Na tuu loa Sesu, o pati : Kotou kalagai a ia ke au. Ti na lotou kalagai loa le tagata kivi, o pati kiate ia : Ke ke loto makeke, tuu ki aluga, e kalaga mai a ia kiate koe. 50Na tiaki loa e le tagata kivi lona taupulupulu, ti na mafuta loa a ia ki aluga, o au kia Sesu. 51Ti na pati loa Sesu kiate ia : Kolea leia e ke loto ke kau fai kiate koe ? Na tali loa le tagata kivi kia Sesu : Pule, ke kau tio. 52Ti na pati loa Sesu kiate ia : Ano, kua fakamauli a koe e lau tui. 53I le lakaga fai lena na tio loa a ia, ti na muli loa a ia ia Sesu i le ala.

Currently Selected:

Maleko 10: FB2000

Highlight

Copy

Compare