Maleko 1

Gaoi a Soane-Patita

1Kamataaga o le Evaselio o Sesu-Kilisito, Alo o le Atua.

2O mulimuli ki le nea leia e tuu i le tosi a le polofeta ko Esaia :

Ko leinei, e kau kakau laku tagata avelogo i ou mua,

Leia e teuteu ia loa lou ala ;

3 Ko le leo o leia e kalaga i le toafa :

Kotou teuteu le ala o le Aliki,

Kotou fakatokatoka ona ala liliki,

4Na sa loa Soane, o fai papitema i le toafa, ti mo akonaki ki le papitema o le fakasemala ki le fakamolemole o agasala. 5Na ano kiate ia le fenua katoa o Sutea ti mo le kakai fuli o Selusalemi, o kofesio alatou agasala, ti mo papitema latou e Soane i le vaitafe o le Solotane.

6Na kofu Soane ki se kofu fului kamelo, ti na toi e ia se kilipipi i ona vakavaka. Na kai a ia ki seseivaka ti mo le meli vao. 7Na akonaki a ia, o pati : E au i oku muli leia e lasi ake iate au, ti e leaise kau gali i le punou o tatala le sai o lona taka. 8Ko au, na kau papitema koutou ki le vai ; kae e papitema loa e ia koutou ki le Laumalie Maokioki.

Papitema o Sesu-Kilisito

9I le temi a ia, na au loa Sesu mei Nasaleti ki Kalilea, ti na papitema loa a ia e Soane i le Solotane. 10I le lakaga leia na mavae ai a ia mei le vai, na tio loa a ia ki le mavaa o le lagi, ti mo le Laumalie Maokioki e ifo kiate ia ofaipe se lupe. 11Ti na fakasa loa e se leo mei le lagi a folafola anei : Ko loku Alo alofaina a koe, leia kua kau tuku ki ai loku alofa katoa.

Fakasalai o Sesu-Kilisito

12I le lakaga fai lena, na taki loa Sesu e le Laumalie Maokioki ki le toafa, 13ti na nofo loa a ia i ai i ni aso e kau fa, o fakasalai e Satana. Na nofo a ia mo manu kaikivao, ti na tausi a ia e le kau aselo.

Kamata o le gaoi a Sesu i Kalilea

14I le oki o le fakaulu o Soane ki le fale pilisoni, na ano loa Sesu ki Kalilea, o fakasa le Evaselio o le Atua. 15Na pati a ia : Kua soko le temi, ti kua ofi mai le puleaga o le Atua. Kotou fakasemala, ti kotou tui ki le logo malie.

Uluaki tisipulo a Sesu-Kilisito

16I lana saele i le mata tai o Kalilea, na tio loa a ia kia Simone, mo Atelea, taina o Simone, ala na ti ia se kupega ki le tai ; talie na la tautai. 17Na pati loa Sesu kia laua : Kolua muli mai iate au, ti e kau fakaliliu loa koulua ko ni tautai tagata. 18I le lakaga fai lena, na la tuku loa ola kupega, kae na la mulimuli loa iate ia. 19Ti na fakamamao fakaikiiki atu a ia, ti na tio loa a ia kia Sakopo, vosa o Sepeteo, mo Soane, lona taina, ala na nonofo foki i se vaka ti na onoono ia ola kupega. 20I le lakaga fai lena, na kalagai loa e ia laua ; ti na la tuku loa lola tamana ko Sepeteo i le vaka mo le kau gaoi, kae na la muli loa iate ia.

Kapu o ni temonio i Kafanaume

21Na lotou ano loa ki Kafanaume. Ti na ulu loa Sesu ki le sinakoka o akonaki, i le aso o le sapato. 22Na lotou ofolele i lana akonaki ; talie na akonaki a ia ofaipe se tasi leia e nofo mo se pule, kae na leaise akonaki a ia ofaipe le kau sekelipa.

23Na nofo loa i lolatou sinakoka se tagata leia na maua ia se laumalie veli, ti na kalaga loa a ia : 24Kolea e ke loto kia matou, Sesu mei Nasaleti ? Pe na ke au o maumaui matou ? E kau iloa pe ko ai a koe : Ko le Sagato a koe o le Atua. 25Na lolomi loa a ia e Sesu, o pati : Fakalologo, ti ke mavae i le tagata lena. 26Ti na mavae loa le laumalie veli i le tagata lena, i le oki o lana lu fakaveliveli a ia, ti mo lana tagi leo lasi. 27Na lotou ofolele fuli i le nea lena, o pati : Kolea le nea leinei ? Ko se akonaki foou ! E masau a ia mo se pule ki laumalie veli foki, ti e lotou fakalogo kiate ia ! 28Ti na mafola loa lona logologona i le lakaga fai lena i potu fuli o Kalilea.

Fakamauli o le tinana o le avaga a Petelo

29I le mavae i le sinakoka, na lotou ano loa mo Sakopo mo Soane ki le fale o Simone mo Atelea. 30Na moemoe le tinana o le avaga o Simone, talie na fiva a ia ; ti na fakasa loa a ia kia Sesu i le lakaga fai lena. 31Ti na fakafeofi ake loa Sesu kiate ia, ti na too loa e ia lona lima o fakatuu a ia ki aluga, ti na puli loa le vela i le lakaga fai lena. Ti na tausi loa le fafine kia latou.

Fakamauli o masaki

32I le afiafi, i le galo o le laa, na aumai loa kia Sesu le kau masaki fuli ti mo le kau avagaia. 33Ti na fakatasi le kolo katoa i lona mua matapa. 34Na fakamauli loa e ia ni kakai toka api ai ala na maua ia ni masaki kesekese ; na kapu foki e ia ni temonio mauke ai, ti na leaise fakataga e ia ki temonio ke masau, talie na lotou iloa a ia.

35I le usu, koi fakapouli ai, na tuu ake loa a ia, o ano ki se ganea lavaki, leia na faikole ai loa a ia. 36Ko Simone mo latou ala na nonofo mo ia, na ano loa o afa a ia. 37Ti na lotou maua loa a ia, ti na lotou pati loa kiate ia : E afa a koe e le kakai katoa. 38Na tali loa Sesu kia latou : Tou ano ki se ganea kese, ki kolo liliki ala e feofi mai, ke kau akonaki foki i ai ; talie ko ia leia na kau au ai. 39Ti na ano loa a ia o akonaki i sinakoka, i Kalilea katoa, ti na kapu loa e ia le kau temonio.

Fakamauli o se tagata kilia

40Na au loa se tagata kilia kiate ia ; ti na tutuli loa a ia, o kolekole kia Sesu : Kapau e ke loto ki ai, ti e mafai ke ke fakaliliu au o mea. 41Na aloalofa loa Sesu kiate ia, ti na falo loa e ia lona lima, o fafa ki le tagata, o pati : E kau loto ki ai, ke ke mea. 42I le lakaga fai lena, na mavae loa le kilia iate ia, ti na mea loa a ia. 43Ti na kakau aifai a ia e Sesu ke ano, mo ni fakatotonu mamafa, 44o pati kiate ia : aua na ke fakasa fua se nea ki se tasi ; kae ke ano o fakasa a koe ki le tagata faisakilifisio, ti ke momoli o uiga mo lou fakamea le nea leia na fakatotonu e Moisese, o tupu ke fakamaoki kia latou. 45Kae na ano loa le tagata lena, ti na kamata fakasa loa e ia mo fakamafola i ganea fuli le nea leia na soko kiate ia. Koia na leaise toe mafai ai le ulu fakalauatea a Sesu ki se kolo. Na nofo a ia i tua kolo, i ni ganea lavaki, ti na au kiate ia mei potu fuli.

Currently Selected:

Maleko 1: FB2000

Highlight

Copy

Compare