Mateo 28

Toe tuuake o Kilisito mo nea na soko

1I le oki o le sapato, i le mafoata o le uluaki aso o le vasaa, na ano loa Malia mei Maketala, mo leia ake Malia, o tio ki le tanuma. 2Ti ko leinei, na to loa se mafuike lasi ; talie na ifo mai se aselo o le Aliki mei lagi, o fulusi le fatu, ti na ekeeke loa a ia i ona aluga. 3Na fai ona mata pe se uila, ti na tea lona kofu ofaipe le nive. 4Na lulu loa le kau tagata leo i le i, ti na lotou liliu loa ofaipe ni mate. 5Kae na masau loa le aselo, o pati ki fafine : Kia koulua, aua na kolua i ; talie e kau iloa e kolua afa Sesu leia na tutuki i le koluse. 6E leaise nofo a ia i leinei ; kua toe tuuake a ia ofaipe lana fakasa ia. Kolua au o tio ki le ganea leia na moe ai a ia,

7ti kolua ano vave o fakasa ki ana tisipulo kua toe tuuake a ia mei le kau mate. Ti ko leinei, kua muamua a ia ia koutou ki Kalilea : I ai e kotou tio loa kiate ia. Ko leinei, kua kau fakasa atu a ia kia koulua.

8Na la fakamamao fakatavili loa mei le tanuma, i se i ti mo se fiafia lasi, ti na la makape loa, o ave le logo ki le kau tisipulo.

9Ti ko leinei, na au loa Sesu o fakafelavei kia laua, o pati : E kau fakaalofa atu kia koulua. Na la fakafeofi ake loa o too ona vae, ti na la atolasio loa kiate ia. 10Ti na pati loa Sesu kia laua : Aua na kolua i ; kolua ano o pati ki oku fetaina ke lotou ano ki Kalilea : I ai e lotou tio loa kiate au.

Totogi paaga o le kau solia

11I le lolotoga o lala ano i le ala, na ulu loa ni tagata o le kau leo ki le loto kolo, o fakasa ki le kau pule faisakilifisio a nea fuli ala na soko. 12Na fakatasi loa le kau pule faisakilifisio mo le kau fakamatuatua, ti na lotou loto tasi loa ke soli se paaga lasi ki le kau solia, 13o pati : Kotou pati : Na au ana tisipulo i le pouli o kaia a ia, kae motou momoe. 14Ti kapau e logo loa le kovana ki le nea lena, e motou fakamalu ia loa lona loto, kae motou saofaki loa koutou. 15Na too loa e le kau solia le paaga, o mulimuli ki le fakatuutuu leia kua tuku ake kia latou. Ti na mafola loa le logo lena i le kau Sutea, o kaku mai ki le aso nei.

Tuku o se gaoi foou ki tisipulo i Kalilea

16Na ano loa le kau tisipulo e tino agafulu tupu tasi ki Kalilea, ki le mauga leia na fakatotonu e Sesu kia latou. 17I lalatou tio kiate ia, na lotou atolasio loa kiate ia. Kae na lotolotolua loa ni iki. 18Na fakafeofi ake loa Sesu o masau kia latou, o pati : Kua tuku mai kiate au a pule fuli i le lagi mo le kele. 19Kotou ano, kotou fai ni tisipulo i puleaga fuli, o papitema latou i le suafa o le Tamana, mo le Alo mo le Laumalie Maokioki,

20ti kotou ako latou ke lotou fai a nea fuli ala na kau fakatotonu atu kia koutou. Ti ko leinei, e kau nofo mo koutou i aso fuli, o kaku ki le fakaoki o le malama nei.

Currently Selected:

Mateo 28: FB2000

Highlight

Copy

Compare