Mikea 2
2
Le agaveli mo le tautea o Iselaele
1Malaia kia latou ala e fakakaukau ia le agaveli mo teuteu ia le veli i olatou moeaga !
I le mafoata e lotou fai a ia,
Mo ka e lotou maua ia le pule i olatou lima.
2E lotou manumanu ki ni faisaga, ti e lotou too fakamakeke latou ;
Ni fale, ti e lotou too fakamakeke latou ;
E lotou too fakamakeke le tagata mo lona famili,
Le tagata mo lona tofiga.
3Koia leia e folafola ai le Eteleno :
Ko leinei, e kau fakakaukaui loa ki le kakai lena se malaia ;
E leaise kotou fakasao loa i ai okoutou ua,
Ti e leaise kotou saele loa mo le ulu e tuu sako,
Talie e veveli loa a temi ana.
4I le aso lena, e fakaliliu loa koutou ko se nea fakakata.
E fai loa ni tagi mamae,
E pati loa : Kua motou maumau katoa !
E soli e ia ki iki le vaega o loku kakai ! Kolea koia ! E too e ia loku vaega !
E tufa e ia amatou faisaga ki le fili !…
5Koia leia e leaise ke maua ai loa se tasi
Leia e toso ia le afo i se koga kele,
I le fakatasiga a le Eteleno.
6E lotou pati : Aua na kotou kikite !
Ke aua na kotou kikite ni nea fenaaki !
E leaise koi oki a lauveli !
7Fale o Sakopo, pe ke toa i le masau felaaki ?
Pe ita vave le Eteleno ?
Pe ko lana fai masani a ia ?
Pe leaise malie aku masau
Ki leia e saele i le agatonu ?
8Talu mei fualoa na fai loku kakai ofaipe se fili ;
E kotou too le taupulupulu i aluga o kofu
O latou ala e saele i le tokamalie,
I le liliu mei le tau.
9E kotou kapu a fafine o loku kakai mei olatou fale ala e lotou pipiki ki ai.
E kotou too loku kololia i alatou fanau o lee gato.
10Kotou tutuu ki aluga, kotou saele ! talie e leaise ko se ganea malolo leinei ;
O tupu ko le kelekele, e i ai loa ni mamae, ni mamae lalasi.
11Kapau e makape se tagata i muli o le matagi ti e fai ia ni loi :
E kau fai loa ni kikite kiate koe o uiga mo le vino, mo kava makeke !
Ko lena loa se polofeta ki le kakai lena.
12E kau fakatasi fuli loa a koe, ei Sakopo !
E kau fakatasi loa a toetoega fuli o Iselaele,
E kau fakatasi loa latou ofaipe ni ovi o se fale manu,
Ofaipe se kau manu i lolatou lotoa manu ;
E i ai loa se logoa lasi o tupu ko le lasi o tagata.
13Ko leia e fakamavaa ia loa le ala e pale loa i olatou mua ;
E lotou fakamavaa loa se uluaga, e lotou fakalaka loa i le matapa ti e lotou ulu loa ki fafo ;
E saele loa lolatou sau i olatou mua,
Ti e ano loa le Eteleno i lolatou ulu.
Currently Selected:
Mikea 2: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
