Mikea 3
3
Valoki o pule o Iselaele
1E kau pati : Kotou fakalogo, pule o Sakopo,
Ti mo aliki o le fale o Iselaele !
Pe leaise ko koutou ala e tonu ke iloa ia le faitotonu ?
2E kotou vesia ki le malie, kae e kotou alofa ki le veli ;
E kotou foke le kili o le kakai ti e kotou too le kanofi i olatou ivi.
3E lotou kai le kanofi o loku kakai,
E lotou foke lona kili,
Ti e lotou fatifatii ona ivi ;
E lotou tuutuu latou ofaipe ni nea ke fakamoso i se kulo,
Ofaipe ni inati i se kulo.
4Ti e lotou kalaga loa ki le Eteleno,
Kae e leaise tali loa a ia kia latou ;
E fufu loa e ia kia latou ona mata i le temi lena,
Talie na lotou fai ni gaoi veveli.
5Koia e folafola ai le Eteleno ki le kau polofeta ala e fakasese ia loku kakai,
Ala e fakasa ia le tokamalie mo kapau e maua e olatou nifo se nea ke uuti,
Ala e fakasa ia le tau mo kapau e leaise soli ake se nea ki olatou gutu :
6O tupu ko le nea lena, e kotou maua loa le pouli…, ti e leaise kotou toe maua loa se tio !
E kotou maua loa le fakapouli… kae leai ni folafola mei le Atua !
E to loa le laa ki polofeta ana,
E fakapouli loa le malama o le ao kia latou.
7E luma loa le kau kikite, ti e kukula loa le kau polofeta,
E lotou uufi fuli loa olatou kaukava ;
Talie e leaise tali loa le Atua.
8Kae ko au, e kau apele i le makeke, i le Laumalie o le Eteleno ;
E kau apele i le faitotonu ti mo le loto makeke,
Ke fakasa kia Sakopo lana agaveli,
Kia Iselaele lana agasala.
9Koia, pule o le fale o Sakopo, mo aliki o le fale o Iselaele,
Kotou fakalogo malie mai ki le nea leinei,
Koutou ala e vesia ki le faitotonu,
Ti e pikopikoi ia le nea leia e totonu,
10Koutou ala e fakatuu ia Sione ki le toto,
Ti mo Selusalemi ki le agaveli !
11E fakamaau ona pule ki ni nea alofa,
Ona tagata faisakilifisio ki se totogi,
Ti e kikite ona polofeta ki se paaga ;
Ti e lotou toa i le fanaki ki le Eteleno, o pati :
Pe leaise nofo le Eteleno i loto malie o tatou ?
E leaise kaku mai loa le malaia kia tatou.
12Koia leia, o tupu ko koutou,
E kenu ai loa Sione ofaipe se faisaga,
E liliu ai loa Selusalemi ko se tuuga fatu,
Ti mo le mauga o le fale tapu ko se tumutumu apele i le vao.
Currently Selected:
Mikea 3: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
