Levitiko 20
20
Ni iki a lao mo tua
1Na masau loa le Eteleno kia Moisese, o pati : 2E ke pati loa ki fanau a Iselaele : kapau e soli loa e se tagata o fanau a Iselaele pe ko se matapule leia e mauli i Iselaele se tasi o ana fanau kia Moloke, e tautea loa le tagata lena ki le mate : e tuki fatui loa a ia e le kakai o le fenua. 3Ti ko au, e kau tagaki loa oku mata ki le tagata lena ti e kau tuuti loa a ia mei lona kakai, talie kua momoli e ia lana fanau kia Moloke, ti kua fakakelekele e ia loku sagatualio, ti kua fakamatagafua e ia loku suafa tapu. 4Kapau e tapono a mata o le kakai o le fenua ki le tagata lena, leia e se soli ia ona fanau kia Moloke, ti kapau e leaise lotou tamate le tagata lena, 5E kau fulusi loa, e au, oku mata ki le tagata lena mo lona famili, ti e kau tuuti loa a ia mei lona kakai, mo latou fuli ala na kau mo ia ki le tausi fakalialia kia Moloke.
6Kapau e masau se tagata ki le kau mate mo laumalie veli, o faiaga mo latou, e kau tagaki loa oku mata ki le tagata lena, ti e kau tuuti loa a ia mei lona kakai. 7E kotou fakamaokioki loa koutou ti e kotou maokioki loa, talie ko au ko le Eteleno, ko lokoutou Atua. 8Kotou tausi aku lao fuli, ti kotou fai loa latou. Ko au ko le Eteleno leia na filifili ia koutou ke kotou liliu ko se kakai maokioki.
9Kapau e lauveli loa se tagata ki lona tamana pe ki lona tinana, e tautea loa a ia ki le mate : talie kua lauveli a ia ki lona tamana mo lona tinana : e vilo loa lona toto kiate ia.
10Kapau e fai loa e se tagata se tono mo se fafine avaga, kapau e fai loa e ia se tono mo le avaga o lona oloi, e tautea loa ki le mate le tagata mo le fafine ala na tono.
11Kapau e momoe loa se tagata mo le avaga o lona tamana, ti e sufegi loa e ia le telefua o lona tamana ; e tautea loa ki le mate le tagata mo le fafine. E vilo loa lola toto kia laua.
12Kapau e momoe loa se tagata mo le avaga o lona vosa, e tautea loa laua toka lua ki le mate, talie kua la fai ia se nea fakalumaluma : e vilo loa lola toto kia laua.
13Kapau e momoe loa se tagata mo se tasi tagata ofaipe le momoe mo se fafine, kua la fai loa se agasala fakalialia ; e tautea loa laua ki le mate. E vilo loa ola toto kia laua.
14Kapau e avaga loa se tagata mo se taine mo le tinana, ko se nea veli lasi a ia : e tutu loa latou i le afi, le tagata mo fafine toka lua, o tupu ke aua na toe fai loa le veli lena i loto malie o koutou.
15Kapau e momoe loa se tagata mo se manu, e tautea loa a ia ki le mate ; ti e kotou tamate loa le manu.
16Kapau e fakafeofi loa se fafine ki se manu, ke momoe mo ia, e tamate loa le fafine mo le manu.
17Kapau e momoe loa se tagata mo lona tuagaane totonu, le taine totonu o lona tamana pe o lona tinana, ko le nea fakalumaluma a ia ; e tuuti loa laua i mata o fanau o lola kakai : kua momoe le tagata lena mo lona tuagaane, e amo loa e ia lana agasala.
18Kapau e momoe loa se tagata mo se fafine i lona menise, o tio ki lona telefua, ti kapau e tio le tagata ki le sali o le toto, ti kapau e tio foki le fafine ki le sali o lona toto, ko se nea veli a ia ; e tuuti loa laua toka lua mei lola kakai.
19Aua na ke momoe loa mo le taina o lou tinana, pe ko le tuagaane o lou tamana, talie ko lou famili totonu. Ko latou ala e fai ia loa le nea lena, e amo ia loa le veli o le agasala lena.
20Kapau e momoe loa se tagata mo le avaga o le taina o lona tamana, e fakamatagafua loa e ia lona tamana ; e tonu loa ke la amo le veli o le agasala lena, ti e la mamate loa sala fanau.
21Kapau e avaga loa se tagata mo le avaga o lona taina, e fai loa e ia se nea fakalialia. E leaise maua loa e le taumatua lena sola fanau, talie kua fakamatagafua e le tagata lena lona taina totonu.
22E kotou tausi loa aku lao fuli mo aku fakatotonu. Ti e leaise luluai loa koutou e le fenua leia e kau taki loa koutou ki ai ke koutou nofoi. 23Aua na kotou mulimuli loa ki aga o puleaga ala ka kau kapu ia loa i okoutou mua ; talie kua fai e puleaga ana ni aga fakalialia, o tupu ai laku fakalialia kia latou. 24Kua kau pati atu kia koutou : ko koutou ala e maua ia loa lolatou fenua ; e kau soli loa a ia kia koutou ke kotou pule ki ai : ko se fenua a ia leia e tafe ai le sua manu mo le sua meli. Ko au ko le Eteleno, ko lokoutou Atua, leia kua filifili ia koutou i atu puleaga.
25Kotou tokaga loa o fakakesekese a manu mea mo manu kelekele, a manu lele mea mo manu lele kelekele, o tupu ke aua na kotou kelekele loa i le lave ki ni manu, mo ni manu lele, ti mo ni manu totolo i le kele. Na kau fai le fakatuutuu lena ke kotou popoto i le iloa o nea ala e kelekele. 26E kotou maokioki loa kiate au, talie e kau maokioki, a au, ko le Eteleno ; kua kau fakamavae koutou mei atu puleaga, o tupu ke kotou liliu ko loku tofiga totonu.
27Kapau e maua e se tagata pe ko se fafine le laumalie o se mate pe ko le laumalie o le kikite, e tautea loa laua ki le mate ; e tuki fatui loa laua : e vilo loa ola toto kia laua.
Currently Selected:
Levitiko 20: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
