Levitiko 19
19
Lao fakalotu
1Na masau loa le Eteleno kia Moisese, o pati : 2Masau ki le kakai katoa o Iselaele, o pati kia latou : Ke kotou maokioki, talie e kau maokioki, a au, ko le Eteleno, ko lokoutou Atua.
3Kotou tasi fakaapaapa loa ki lona tamana mo lona tinana, ti mo tausi loa oku sapato. Ko au ko le Eteleno, ko lou Atua.
4Aua na kotou tafoki loa ki ni taulaatua loi, ti aua na kotou fai loa ni atua ki se ukamea saka. Ko au ko le Eteleno, ko lokoutou Atua.
5Ka kotou momoli loa ki le Eteleno se sakilifisio fakafetai, e kotou momoli loa a ia o mulimuli ki le lekula, ti e kau tali loa a ia. 6E kai loa le manu i le aso leia e kotou tamate ai a ia, pe i le aso leia e olo mai ki ai ; e kotou tutu loa i le afi le nea leia e toe loa o kaku ki le tolu o aso. 7Ti kapau e kai loa se nea i le tolu o aso, e veli loa a ia : e leaise tali loa le sakilifisio lena. 8Ti ko leia e kai loa ki ai e agasala loa, talie kua maumaui e ia le nea tapu a le Eteleno. E tuuti loa a ia mei lona kakai.
9Ka kotou tuuti loa a fua i lokoutou fenua, e ke tuku loa se ga potu o lau faisaga, o leaise ke tuuti loa lona fua, ti e leaise ke tanaki loa le nea leia e toe i lau faisaga.
10Aua na ke tau loa le nea leia e toe i lau vite, ti aua na ke tanaki loa a fuai vite ala kua vivilo ki lalo. E ke tuku loa a nea ana ki le mativa mo le matapule. Ko au ko le Eteleno, ko lokoutou Atua.
11Aua na kotou kaia loa, ti aua na kotou fai fakakaka loa, pe feloiaki loa leia ki leia.
12Aua na kotou fai loa se fakamaoki loi i loku suafa, talie e ke fakakelekele loa i ai le suafa o lou Atua. Ko au ko le Eteleno.
13Aua na ke pulei fakaveli loa lou oloi, ti aua na ke too fakamakeke loa se nea iate ia. Aua na ke taofi loa o kaku ki le apogipogi le totogi o le tagata gaoi.
14Aua na ke lauvelii loa se tuli, ti aua na ke tuku loa ki mua o se kivi se nea leia ke siga ai. Talie e ke maua loa le i ki lou Atua. Ko au ko le Eteleno.
15Aua na ke fai loa se tonu sala i au fakamaau : aua na ke tio loa ki le mativa o se tagata, ti aua na ke tio loa ki le mauiga o se tagata, kae e ke fakamaaui loa lou oloi o mulimuli ki le lao totonu.
16Aua na ke fakamafola loa ni fatufatu loi ki se tasi o lou kakai. Aua na ke fai loa ni fakamaoki loi ke tamate ai lou oloi. Ko au ko le Eteleno.
17Aua na ke vesia loa ki lou taina i lou loto ; e ke tokaga loa o valoki lou taina, o tupu ke aua na ke amo ia loa se agasala o tupu ko ia.
18Aua na ke taui veli loa, ti aua na ke taofi loa se kona i lou loto ki fanau o lou kakai. E ke alofa loa ki lou oloi ofaipe koe totonu. Ko au ko le Eteleno.
19Kotou tausi loa aku lao : Aua na ke fakaavaga loa ni manu o ni faasiga kesekese e lua. Aua na kotou to loa akoutou faisaga ki ni faasiga pulapula e lua. Aua na kotou tui loa ni kofu ki ni faasiga filo e lua.
20Kapau e momoe loa se tagata mo se fafine fakasausau leia kua fakapapau ki se tasi ake tagata, kae e leikiaise totogi a ia, pe leikiaise lauatea a ia, e tonu ke totogi loa e le tagata lena le fafine fakasausau. Kae e leaise tamate loa laua, talie koi nofo fakasausau le fafine lena. 21E ave loa e le tagata lena ki le uluaga o le falela tapu se ovi tagata, o fai loa e ia se sakilifisio fakamalie ki lana sala.
22E fai loa e le tagata faisakilifisio kiate ia le sakilifisio o le fakamalie, i mua o le Eteleno, ti e fakamolemole loa lana agasala kiate ia.
23Ka kotou ulu loa ki le fenua, ti ka kotou to loa i ai ni laakau fua, e kotou tuku loa a fua ke kelekele i ni fetuu e tolu ; aua na kotou kai loa latou ; e lotou kelekele loa kia koutou. 24I le fa o fetuu, e momoli mai loa kiate au a fuai laakau fuli i ni fakafiafia.
25I le lima o fetuu, e kotou kai loa olatou fua, ti e kotou tanaki loa latou. Ko au ko le Eteleno, ko lokoutou Atua.
26Aua na kotou kai loa se nea mo se toto. Aua na kotou vavakai loa a gata, pe ko ao ke kotou maua mei ai ni kikite. 27Aua na kotou koti fakamoumou loa okoutou fa ulu, ti aua na kotou tele loa a ma o okoutou kaukava. 28Aua na kotou fai loa ni masikasika i okoutou tino o tupu ko se mate ; aua na kotou fai loa ni tatau i lokoutou kili. Ko au ko le Eteleno.
29Aua na ke fakamatagafua loa lou taine o soli a ia ke faiaga fakalotu, talie e feala loa ke vilo le fenua ki le faiaga, ti ke apele a ia i aga fakalialia.
30Kotou tausi loa aku sapato, ti kotou fakaapaapa loa ki loku sagatualio. Ko au ko le Eteleno.
31Aua na kotou maliu loa kia latou ala e masau ki laumalie o le kau mate, pe ko le kau kikite ; aua na kotou afa loa latou, talie na kotou kelekele loa mo latou. Ko au ko le Eteleno, ko lokoutou Atua.
32E ke tuu loa ki aluga i mua o le ulu sina, ti ke fakaapaapa loa ki le matua. E ke i loa ki lou Atua. Ko au ko le Eteleno.
33Kapau e au loa se matapule o nofo mo koutou i lokoutou fenua, aua na kotou fakamamae loa a ia ; 34E kotou fai loa kiate ia ofaipe se tasi o koutou ; e kotou alofa loa kiate ia ofaipe koutou totonu, talie na kotou matapule foki i le fenua o Esipito. Ko au ko le Eteleno, ko lokoutou Atua.
35Aua na kotou fai loa ni kaka i akoutou fakamaau, mo akoutou meta, mo akoutou kilo, ti mo akoutou liti. 36E kotou maua loa ni fua totonu, mo ni kilo totonu, mo ni liti totonu, mo ni meta totonu. Ko au ko le Eteleno, ko lokoutou Atua, leia na fakamavae ia koutou mei Esipito.
37Kotou tausi loa aku lao fuli mo aku fakatotonu fuli, ti kotou fai loa latou. Ko au ko le Eteleno.
Currently Selected:
Levitiko 19: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
