Levitiko 21
21
Lekula ki le kau faisakilifisio
1Na pati loa le Eteleno kia Moisese : masau ki le kau faisakilifisio, vosa o Alone, o pati kia latou : E leaise fakakelekele loa le tagata faisakilifisio i lona kakai o tupu ko se mate, 2gato fuai mo kapau ko se tasi o lona famili totonu, ofaipe lona tinana, mo lona tamana, mo lona vosa, mo lona taine, mo lona taina totonu, 3ti mo lona tuagaane leia koi taupoou, leia koi kau ki lona famili totonu, talie e leikiaise avaga a ia. 4Ko le tagata faisakilifisio ko le pule a ia o lona kakai, koia e leaise tonu ai ke fakakelekele a ia, talie e matagafua loa a ia i ai.
5E leaise fai loa e le kau tagata faisakilifisio ni tosula, mo ni ma, ti mo ni masikasika i olatou tino. 6E lotou maokioki loa ki lolatou Atua ; ti e leaise lotou fakamatagafua loa le suafa o lolatou Atua, talie e lotou momoli ki le Eteleno a failaulau tutu e le afi, le nea kai o lolatou Atua : e lotou maokioki loa.
7E leaise lotou avaga loa mo se fafine faiaga pe kua maumaui, e leaise lotou too loa se fafine leia kua kapu e lona avaga, talie e lotou maokioki ki lolatou Atua. 8E ke tio loa ki le tagata faisakilifisio e maokioki, talie e momoli e ia le nea kai o lona Atua ; e maokioki loa a ia kiate koe, talie e kau maokioki, a au, ko le Eteleno, leia e fakamaokioki ia koutou.
9Kapau e faiaga loa se taine o se tagata faisakilifisio, e fakamatagafua loa e le taine lena a ia totonu, ti e toe fakamatagafua e ia mo lona tamana : e tutu loa a ia i le afi.
10Ko le tagata faisakilifisio lasi, leia kua fakanofo ko le pule o ona fetaina, leia kua fakatapui e le lolo tapu i le aso leia na kamata ai lana gaoi, ti kua tui ia a kofu tapu, e leaise veuki loa e ia lona lau ulu, ti e leaise sae loa e ia ona kofu. 11E leaise ano loa a ia ki se mate ; e leaise fakakelekele loa a ia o tupu ko lona tamana mo lona tinana. 12E leaise mavae loa a ia i le sagatualio, ti e leaise fakakelekele loa e ia le sagatualio o lona Atua ; talie kua fakatapui a ia e le lolo tapu o lona Atua. Ko au ko le Eteleno.
13E avaga loa a ia mo se taine taupoou. 14E leaise too loa e ia se fafine lokonui, pe ko se fafine na kapu, pe ko se fafine faiaga, pe ko se fafine leia kua maumaui lona taupoou ; kae e avaga loa a ia mo se taine taupoou i lona kakai.
15O tupu ke aua na fakaulu loa e ia se sakoga kese ki lona famili. Ko au ko le Eteleno leia e fakamaokioki ia a ia ke tausi kiate au.
16Na masau loa le Eteleno kia Moisese, o pati : 17Masau kia Alone, o pati kiate ia : ko le tagata fuli ai i lou lanu mo ou sakoga, leia e maua ia loa se mele i lona tino, e leaise fakafeofi loa a ia o momoli le nea kai o lona Atua. 18E leaise feala loa ke fakafeofi a tagata fuli ala e maua ia loa se maimoa : se kivi, mo se kito, mo leia e maua ia se maimoa i lona isu pe ko ona mata ; 19se tagata leia e vae fati pe lima fati ; 20se piko, mo se tagata pakisikisi, mo se tagata leia e maua ia se fa pule i lona mata, mo se tagata kama, mo se tagata leia kua maumau ona fa kou. 21Ko tagata fuli o le faasiga o Alone, leia e maua ia loa se maimoa fakatino, e leaise fakafeofi loa o momoli ki le Eteleno a sakilifisio tutu e le afi ; e maua e ia se maimoa fakatino : e leaise fakafeofi loa a ia o momoli le nea kai o lona Atua. 22E feala loa ke kai e ia le nea kai o lona Atua, ni nea maokioki lasi mo ni nea tapu. 23Kae e leaise ano loa a ia ki le lito, ti e leaise fakafeofi loa a ia ki le aletale, talie e maua e ia se maimoa fakatino ; e leaise fakakelekele loa e ia oku sagatualio, talie ko au ko le Eteleno, leia e fakamaokioki ia latou.
24Na tuku loa e Moisese a folafola ana kia Alone, mo ona vosa, ti mo fanau fuli a Iselaele.
Currently Selected:
Levitiko 21: FB2000
Highlight
Copy
Compare
Share
Want to have your highlights saved across all your devices? Sign up or sign in
© Société Biblique de Genève, 2000-2020
